៤. គិលានសុត្តវណ្ណនា

១០៥០. ចតុត្ថេ ន ខោ បនេតន្តិ ន ខោ អម្ហេហិ ឯតំ. សប្បញ្ញោ ឧបាសកោតិ សោតាបន្នោ អធិប្បេតោ. អស្សាសនីយេហិ ធម្មេហីតិ អស្សាសករេហិ ធម្មេហិ. អស្សាសតាយស្មាតិ អស្សាសតុ អាយស្មា. មារិសោតិ មរណបដិពទ្ធោ. មរណធម្មោតិ មរណសភាវោ. អធិមោចេហីតិ ឋបេហិ. អធិមោចិតន្តិ ឋបិតំ. ឯវំ វិមុត្តចិត្តស្សាតិ ឯវំ អរហត្តផលវិមុត្តិយា វិមុត្តចិត្តស្ស. យទិទំ វិមុត្តិយា វិមុត្តន្តិ យំ ឥទំ វិមុត្តិំ អារព្ភ វិមុត្តិយា នានាករណំ វត្តព្ពំ សិយា, ន តំ វទាមិ. ភិក្ខុសង្ឃស្ស ហិ ចេតិយង្គណពោធិយង្គណវត្តេសុ ចេវ អសីតិក្ខន្ធកវត្តេសុ ចាតិ អាគមនីយគុណេសុ បមាណំ នាម នត្ថិ, បដិវិទ្ធេ បន មគ្គេ វា ផលេ វា ឧបាសកានញ្ច ភិក្ខូនញ្ច នានាករណំ នត្ថិ.