៤. បុញ្ញាភិសន្ទវគ្គោ

១. បឋមបុញ្ញាភិសន្ទសុត្តវណ្ណនា

១០២៧. ចតុត្ថស្ស បឋមេ បុញ្ញាភិសន្ទា កុសលាភិសន្ទាតិ បុញ្ញនទិយោ កុសលនទិយោ. សុខស្សាហារាតិ សុខស្ស បច្ចយា.

៤. បឋមទេវបទសុត្តវណ្ណនា

១០៣០. ចតុត្ថេ ទេវបទានីតិ ទេវានំ ញាណេន, ទេវស្ស វា ញាណេន អក្កន្តបទានិ. វិសុទ្ធិយាតិ វិសុជ្ឈនត្ថាយ. បរិយោទបនាយាតិ បុរិយោទបនត្ថាយ ជោតនត្ថាយ. ឥមស្មិំ សុត្តេ ចត្តារោបិ ផលដ្ឋបុគ្គលា វិសុទ្ធដ្ឋេន ទេវា នាម ជាតា.

៨. វស្សសុត្តវណ្ណនា

១០៣៤. អដ្ឋមេ បារំគន្ត្វាតិ បារំ វុច្ចតិ និព្ពានំ, តំ បត្វាតិ អត្ថោ. អាសវានំ ខយាយ សំវត្តន្តីតិ ន បឋមំ និព្ពានំ គន្ត្វា បច្ឆា សំវត្តន្តិ, គច្ឆមានា ឯវ សំវត្តន្តិ. ទេសនា បន ឯវំ កតា.

១០. នន្ទិយសក្កសុត្តវណ្ណនា

១០៣៦. ទសមេ ទិវា បវិវេកាយ រត្តិំ បដិសល្លានាយាតិ ទិវា បវិវេកត្ថាយ រត្តិំ បដិសល្លានត្ថាយ. ធម្មា ន បាតុភវន្តីតិ សមថវិបស្សនា ធម្មា ន ឧប្បជ្ជន្តិ. សេសំ សព្ពត្ថ ឧត្តានមេវាតិ.

បុញ្ញាភិសន្ទវគ្គោ ចតុត្ថោ.