៤-៥. បឋមសារិបុត្តសុត្តាទិវណ្ណនា

១០០០-១០០១. ចតុត្ថ ឧត្តានមេវ. បញ្ចមេ សោតាបត្តិយង្គន្តិ សោតាបត្តិយា បុព្ពភាគបដិលាភង្គំ. ពុទ្ធេ អវេច្ចប្បសាទាទយោ បន បដិលទ្ធគុណា សោតាបន្នស្ស អង្គា នាម, តេបិ បន សោតាបត្តិយង្គន្តិ អាគតា. តត្រាយំ ទ្វិន្នម្បិ វចនត្ថោ – សប្បុរិសេ សេវន្តោ ភជន្តោ បយិរុបាសន្តោ ធម្មំ សុណន្តោ យោនិសោ មនសិករោន្តោ ធម្មានុធម្មំ បុព្ពភាគបដិបទំ បដិបជ្ជន្តោ សោតាបត្តិំ បដិលភតីតិ សប្បុរិសសំសេវាទយោ សោតាបត្តិអត្ថាយ អង្គន្តិ សោតាបត្តិយង្គំ នាម, ឥតរេ បឋមមគ្គសង្ខាតាយ សោតាបត្តិយា អង្គន្តិបិ សោតាបត្តិយង្គំ, បដិវិទ្ធសោតាបត្តិមគ្គស្ស សោតាបត្តិមគ្គោ អង្គន្តិបិ សោតាបត្តិយង្គំ.