២. ព្រហ្មចរិយោគធសុត្តវណ្ណនា

៩៩៨. ទុតិយេ យេសំ សទ្ធាតិ បទេន ពុទ្ធេ បសាទោ គហិតោ. សីលន្តិ បទេន អរិយកន្តានិ សីលានិ គហិតានិ. បសាទោតិ បទេន សង្ឃេ បសាទោ គហិតោ. ធម្មទស្សនន្តិ បទេន ធម្មេ បសាទោ គហិតោតិ ឯវំ ចត្តារិ សោតាបត្តិយង្គានិ វុត្តានិ. កាលេន បច្ចេន្តីតិ កាលេន បាបុណន្តិ. ព្រហ្មចរិយោគធំ សុខន្តិ ព្រហ្មចរិយំ ឱគាហិត្វា ឋិតំ ឧបរិមគ្គត្តយសម្បយុត្តំ សុខំ. យោ បនេស គាថាយ អាគតោ បសាទោ, សោ កតរបសាទោ ហោតីតិ. តិបិដកចូឡាភយត្ថេរោ តាវ ‘‘មគ្គបសាទោ’’តិ អាហ, តិបិដកចូឡនាគត្ថេរោ ‘‘អាគតមគ្គស្ស បច្ចវេក្ខណប្បសាទោ’’តិ. ឧភោបិ ថេរា បណ្ឌិតា ពហុស្សុតា, ឧភិន្នំ សុភាសិតំ. មិស្សកប្បសាទោ ឯសោតិ.