៩. អនិមិត្តបញ្ហាសុត្តវណ្ណនា

៣៤០. អនិមិត្តំ ចេតោសមាធិន្តិ និច្ចនិមិត្តាទីនិ បហាយ បវត្តំ វិបស្សនាសមាធិំយេវ សន្ធាយេតំ វុត្តន្តិ. និមិត្តានុសារិ វិញ្ញាណំ ហោតីតិ ឯវំ ឥមិនា វិបស្សនាសមាធិវិហារេន វិហរតោ វិបស្សនាញាណេ តិក្ខេ សូរេ វហមានេ. យថា នាម បុរិសស្ស តិខិណេន ផរសុនា រុក្ខំ ឆិន្ទន្តស្ស ‘‘សុដ្ឋុ វត មេ ផរសុ វហតី’’តិ ខណេ ខណេ ផរសុធារំ ឱលោកេន្តស្ស ឆេជ្ជកិច្ចំ ន និប្ផជ្ជតិ, ឯវំ ថេរស្សាបិ ‘‘សូរំ វត មេ ហុត្វា ញាណំ វហតី’’តិ វិបស្សនំ អារព្ភ និកន្តិ ឧប្បជ្ជតិ. អថ វិបស្សនាកិច្ចំ សាធេតុំ នាសក្ខិ. តំ សន្ធាយ វុត្តំ ‘‘និមិត្តានុសារិ វិញ្ញាណំ ហោតី’’តិ. សព្ពនិមិត្តានំ អមនសិការា អនិមិត្តំ ចេតោសមាធិំ ឧបសម្បជ្ជ វិហាសិន្តិ សព្ពេសំ និច្ចសុខអត្តនិមិត្តានំ អមនសិការេន អនិមិត្តំ វុដ្ឋានគាមិនិវិបស្សនាសម្បយុត្តំ ចេតោសមាធិំ និព្ពានារម្មណំ ឧបរិមគ្គផលសមាធិំ ឧបសម្បជ្ជ វិហាសិំ.