៩. កុតូហលសាលាសុត្តវណ្ណនា

៤១៨. នវមេ កុតូហលសាលាយន្តិ កុតូហលសាលា នាម បច្ចេកសាលា នត្ថិ, យត្ថ បន នានាតិត្ថិយា សមណព្រាហ្មណា នានាវិធំ កថំ បវត្តេន្តិ, សា ពហូនំ ‘‘អយំ កិំ វទតិ, អយំ កិំ វទតី’’តិ កុតូហលុប្បវត្តិដ្ឋានតោ កុតូហលសាលាតិ វុច្ចតិ. ទូរម្បិ គច្ឆតីតិ យាវ អាភស្សរព្រហ្មលោកា គច្ឆតិ. ឥមញ្ច កាយំ និក្ខិបតីតិ ចុតិចិត្តេន និក្ខិបតិ. អនុបបន្នោ ហោតីតិ ចុតិក្ខណេយេវ បដិសន្ធិចិត្តស្ស អនុប្បន្នត្តា អនុបបន្នោ ហោតិ.