៧. ទុតិយអវិជ្ជាបហានសុត្តវណ្ណនា

៨០. សត្តមេ សព្ពេ ធម្មាតិ សព្ពេ តេភូមកធម្មា. នាលំ អភិនិវេសាយាតិ អភិនិវេសបរាមាសគ្គាហេន គណ្ហិតុំ ន យុត្តា. សព្ពនិមិត្តានីតិ សព្ពានិ សង្ខារនិមិត្តានិ. អញ្ញតោ បស្សតីតិ យថា អបរិញ្ញាតាភិនិវេសោ ជនោ បស្សតិ, តតោ អញ្ញតោ បស្សតិ. អបរិញ្ញាតាភិនិវេសោ ហិ ជនោ សព្ពនិមិត្តានិបិ អត្តតោ បស្សតិ. បរិញ្ញាតាភិនិវេសោ បន អនត្តតោ បស្សតិ, នោ អត្តតោតិ ឯវំ ឥមស្មិំ សុត្តេ អនត្តលក្ខណមេវ កថិតំ.