៩. បឋមសមុគ្ឃាតសប្បាយសុត្តវណ្ណនា

៣១. នវមេ សមុគ្ឃាតសប្បាយាតិ សមុគ្ឃាតស្ស ឧបការភូតា. តតោ តំ ហោតិ អញ្ញថាតិ តតោ តំ អញ្ញេនាការេន ហោតិ. អញ្ញថាភាវី ភវសត្តោ លោកោ ភវមេវាភិនន្ទតីតិ អញ្ញថាភាវំ វិបរិណាមំ ឧបគមនេន អញ្ញថាភាវី ហុត្វាបិ ភវេសុ សត្តោ លគ្គោ លគិតោ បលិពុទ្ធោ អយំ លោកោ ភវំយេវ អភិនន្ទតិ. យាវតា, ភិក្ខវេ, ខន្ធធាតុអាយតនន្តិ, ភិក្ខវេ, យត្តកំ ឥទំ ខន្ធា ច ធាតុយោ ច អាយតនានិ ចាតិ ខន្ធធាតុអាយតនំ. តម្បិ ន មញ្ញតីតិ សព្ពម្បិ ន មញ្ញតីតិ ហេដ្ឋា គហិតមេវ សំកឌ្ឍិត្វា បុន ទស្សេតិ. ឥមស្មិំ សុត្តេ អដ្ឋចត្តាលីសាយ ឋានេសុ អរហត្តំ បាបេត្វា វិបស្សនា កថិតា.