៨. អត្ថិនុខោបរិយាយសុត្តវណ្ណនា

១៥៣. អដ្ឋមេ យំ បរិយាយំ អាគម្មាតិ យំ ការណំ អាគម្ម. អញ្ញត្រេវ សទ្ធាយាតិ វិនា សទ្ធាយ សទ្ធំ អបនេត្វា. ឯត្ថ ច សទ្ធាតិ ន បច្ចក្ខា សទ្ធា. យោ បន បរស្ស ឯវំ កិរ ឯវំ កិរាតិ កថេន្តស្ស សុត្វា ឧប្បន្នោ សទ្ទហនាការោ, តំ សន្ធាយេតំ វុត្តំ. រុចិអាទីសុបិ រុចាបេត្វា ខមាបេត្វា អត្ថេតន្តិ គហណាការោ រុចិ នាម, ឯវំ កិរ ភវិស្សតីតិ អនុស្សវនំ អនុស្សវោ, និសីទិត្វា ឯកំ ការណំ ចិន្តេន្តស្ស ការណំ ឧបដ្ឋាតិ, ឯវំ ឧបដ្ឋិតស្ស អត្ថេតន្តិ គហណំ អាការបរិវិតក្កោ នាម, ការណវិតក្កោតិ អត្ថោ. ការណំ ចិន្តេន្តស្ស បាបិកា លទ្ធិ ឧប្បជ្ជតិ, តំ អត្ថេសាតិ គហណាការោ ទិដ្ឋិនិជ្ឈានក្ខន្តិ នាម. អញ្ញំ ព្យាករេយ្យាតិ ឥមានិ បញ្ច ឋានានិ មុញ្ចិត្វា អរហត្តំ ព្យាករេយ្យ. ឥមស្មិំ សុត្តេ សេខាសេខានំ បច្ចវេក្ខណា កថិតា.