១. កម្មនិរោធសុត្តវណ្ណនា

១៤៦. នវបុរាណវគ្គស្ស បឋមេ នវបុរាណានីតិ នវានិ ច បុរាណានិ ច. ចក្ខុ, ភិក្ខវេ, បុរាណកម្មន្តិ ន ចក្ខុ បុរាណំ, កម្មមេវ បុរាណំ, កម្មតោ បន និព្ពត្តត្តា បច្ចយនាមេន ឯវំ វុត្តំ. អភិសង្ខតន្តិ បច្ចយេហិ អភិសមាគន្ត្វា កតំ. អភិសញ្ចេតយិតន្តិ ចេតនាយ បកប្បិតំ. វេទនិយំ ទដ្ឋព្ពន្តិ វេទនាយ វត្ថូតិ បស្សិតព្ពំ. និរោធា វិមុត្តិំ ផុសតីតិ ឥមស្ស តិវិធស្ស កម្មស្ស និរោធេន វិមុត្តិំ ផុសតិ. អយំ វុច្ចតីតិ អយំ តស្សា វិមុត្តិយា អារម្មណភូតោ និរោធោ កម្មនិរោធោតិ វុច្ចតិ. ឥតិ ឥមស្មិំ សុត្តេ បុព្ពភាគវិបស្សនា កថិតា.