៦. កិលេសសំយុត្តវណ្ណនា

៣២២-៣៣១. កិលេសសំយុត្តេ ចិត្តស្សេសោ ឧបក្កិលេសោតិ កតរចិត្តស្ស? ចតុភូមកចិត្តស្ស. តេភូមកចិត្តស្ស តាវ ហោតុ, លោកុត្តរស្ស កថំ ឧបក្កិលេសោ ហោតីតិ? ឧប្បត្តិនិវារណតោ. សោ ហិ តស្ស ឧប្បជ្ជិតុំ អប្បទានេន ឧបក្កិលេសោតិ វេទិតព្ពោ. នេក្ខម្មនិន្នន្តិ នវលោកុត្តរធម្មនិន្នំ. ចិត្តន្តិ សមថវិបស្សនាចិត្តំ. អភិញ្ញា សច្ឆិករណីយេសុ ធម្មេសូតិ បច្ចវេក្ខណញាណេន អភិជានិត្វា សច្ឆិកាតព្ពេសុ ឆឡភិញ្ញាធម្មេសុ, ឯកំ ធម្មំ វា គណ្ហន្តេន នេក្ខម្មន្តិ គហេតព្ពំ. សេសំ សព្ពត្ថ ឧត្តានមេវាតិ.

កិលេសសំយុត្តវណ្ណនា និដ្ឋិតា.