១០. អានន្ទសុត្តវណ្ណនា

១៥៩. ទសមេ ឧបសង្កមីតិ អញ្ញេ ភិក្ខូ បញ្ចក្ខន្ធកម្មដ្ឋានំ កថាបេត្វា យុញ្ជិត្វា ឃដេត្វា អរហត្តំ បត្វា សត្ថុ សន្តិកេ អញ្ញំ ព្យាករោន្តេ ទិស្វា ‘‘អហម្បិ បញ្ចក្ខន្ធកម្មដ្ឋានំ កថាបេត្វា យុញ្ជន្តោ ឃដេន្តោ, អរហត្តំ បត្វា អញ្ញំ ព្យាករិស្សាមី’’តិ ចិន្តេត្វា ឧបសង្កមិ. សត្ថា បន អត្តនោ ធរមានកាលេ ថេរស្ស ឧបរិមគ្គត្តយវជ្ឈានំ កិលេសានំ បហានំ អបស្សន្តោបិ ‘‘ឥមស្ស ចិត្តំ គណ្ហិស្សាមី’’តិ កថេសិ. តស្សាបិ ឯកំ ទ្វេ វារេ មនសិ កត្វាវ ពុទ្ធុបដ្ឋានវេលា ជាតាតិ គន្តព្ពំ ហោតិ. ឥតិស្ស ចិត្តំ សម្បហំសមានោ វិមុត្តិបរិបាចនីយធម្មោវ សោ កម្មដ្ឋានានុយោគោ ជាតោតិ. ទសមំ.

ទិដ្ឋិវគ្គោ បន្នរសមោ.

ឧបរិបណ្ណាសកោ សមត្តោ.

ខន្ធសំយុត្តវណ្ណនា និដ្ឋិតា.