២. ពឡិសសុត្តវណ្ណនា

១៥៨. ទុតិយេ ពាឡិសិកោតិ ពឡិសំ គហេត្វា ចរមានោ មច្ឆឃាតកោ. អាមិសគតន្តិ អាមិសមក្ខិតំ. អាមិសចក្ខូតិ អាមិសេ ចក្ខុ ទស្សនំ អស្សាតិ អាមិសចក្ខុ. គិលពឡិសោតិ គិលិតពឡិសោ. អនយំ អាបន្នោតិ ទុក្ខំ បត្តោ. ព្យសនំ អាបន្នោតិ វិនាសំ បត្តោ. យថាកាមករណីយោតិ យថាកាមេន យថារុចិយា យថេវ នំ ពាឡិសិកោ ឥច្ឆតិ, តថេវស្ស កត្តព្ពោតិ អត្ថោ. យថាកាមករណីយោ បាបិមតោតិ យថា កិលេសមារស្ស កាមោ, ឯវំ កត្តព្ពោ, និរយំ វា តិរច្ឆានយោនិំ វា បេត្តិវិសយំ វា បាបេតព្ពោ. ទុតិយំ.