៤. ខីរសុត្តវណ្ណនា

១២៧. ចតុត្ថេ មាតុថញ្ញន្តិ ឯកនាមិកាយ មនុស្សមាតុ ខីរំ. ឥមេសញ្ហិ សត្តានំ គណ្ឌុប្បាទកិបិល្លិកាទីសុ វា មច្ឆកច្ឆបាទីសុ វា បក្ខិជាតេសុ វា និព្ពត្តកាលេ មាតុខីរមេវ នត្ថិ, អជបសុមហិំសាទីសុ និព្ពត្តកាលេ ខីរំ អត្ថិ, តថា មនុស្សេសុ. តត្ថ អជាទិកាលេ ច មនុស្សេសុ ចាបិ ‘‘ទេវី សុមនា តិស្សា’’តិ ឯវំ នានានាមិកានំ កុច្ឆិយំ និព្ពត្តកាលេ អគ្គហេត្វា តិស្សាតិ ឯកនាមិកាយ ឯវ មាតុ កុច្ឆិយំ និព្ពត្តកាលេ បីតំ ថញ្ញំ ចតូសុ មហាសមុទ្ទេសុ ឧទកតោ ពហុតរន្តិ វេទិតព្ពំ. ចតុត្ថំ.