៤. នោចេទំសុត្តវណ្ណនា

១១៧. ចតុត្ថេ និស្សដាតិអាទីនិ អាទិតោ វុត្តបដិសេធេន យោជេត្វា ‘‘ន និស្សដា, ន វិសំយុត្តា, ន វិប្បមុត្តា, ន វិមរិយាទិកតេន ចេតសា វិហរិំសូ’’តិ ឯវំ វេទិតព្ពានិ. ទុតិយនយេ វិមរិយាទិកតេនាតិ និម្មរិយាទិកតេន. តត្ថ ទុវិធា មរិយាទា កិលេសមរិយាទា វដ្ដមរិយាទាតិ. តត្ថ ច យស្ស ឧបឌ្ឍា កិលេសា បហីនា, ឧបឌ្ឍា អប្បហីនា, វដ្ដំ វា បន ឧបឌ្ឍំ បហីនំ, ឧបឌ្ឍំ អប្បហីនំ, តស្ស ចិត្តំ បហីនកិលេសេ វា វដ្ដំ វា សន្ធាយ វិមរិយាទិកតំ, អប្បហីនកិលេសេ វា វដ្ដំ វា សន្ធាយ ន វិមរិយាទិកតំ. ឥធ បន ឧភយស្សាបិ បហីនត្តា ‘‘វិមរិយាទិកតេន ចេតសា’’តិ វុត្តំ, មរិយាទំ អកត្វា ឋិតេន អតិក្កន្តមរិយាទេន ចេតសាតិ អត្ថោ. ឥតិ តីសុបិ ឥមេសុ សុត្តេសុ ចតុសច្ចមេវ កថិតំ. ចតុត្ថំ.