៦. ចាលាសុត្តវណ្ណនា

១៦៧. ឆដ្ឋេ កោ នុ តំ ឥទមាទបយីតិ កោ នុ មន្ទពុទ្ធិ ពាលោ តំ ឯវំ គាហាបេសិ? បរិក្លេសន្តិ អញ្ញម្បិ នានប្បការំ ឧបទ្ទវំ. ឥទានិ យំ មារោ អាហ – ‘‘កោ នុ តំ ឥទមាទបយី’’តិ, តំ មទ្ទន្តី – ‘‘ន មំ អន្ធពាលោ អាទបេសិ, លោកេ បន អគ្គបុគ្គលោ សត្ថា ធម្មំ ទេសេសី’’តិ ទស្សេតុំ, ពុទ្ធោតិអាទិមាហ. តត្ថ សច្ចេ និវេសយីតិ បរមត្ថសច្ចេ និព្ពានេ និវេសេសិ. និរោធំ អប្បជានន្តាតិ និរោធសច្ចំ អជានន្តា. ឆដ្ឋំ.