៥. ទាមលិសុត្តវណ្ណនា

៨៦. បញ្ចមេ ន តេនាសីសតេ ភវន្តិ តេន ការណេន យំ កិញ្ចិ ភវំ ន បត្ថេតិ. អាយតបគ្គហោ នាមេស ទេវបុត្តោ, ខីណាសវស្ស កិច្ចវោសានំ នត្ថិ. ខីណាសវេន ហិ អាទិតោ អរហត្តប្បត្តិយា វីរិយំ កតំ, អបរភាគេ មយា អរហត្តំ បត្តន្តិ មា តុណ្ហី ភវតុ, តថេវ វីរិយំ ទឡ្ហំ ករោតុ បរក្កមតូតិ ចិន្តេត្វា ឯវមាហ.

អថ ភគវា ‘‘អយំ ទេវបុត្តោ ខីណាសវស្ស កិច្ចវោសានំ អកថេន្តោ មម សាសនំ អនិយ្យានិកំ កថេតិ, កិច្ចវោសានមស្ស កថេស្សាមី’’តិ ចិន្តេត្វា នត្ថិ កិច្ចន្តិអាទិមាហ. តីសុ កិរ បិដកេសុ អយំ គាថា អសំកិណ្ណា. ភគវតា ហិ អញ្ញត្ថ វីរិយស្ស ទោសោ នាម ទស្សិតោ នត្ថិ. ឥធ បន ឥមំ ទេវបុត្តំ បដិពាហិត្វា ‘‘ខីណាសវេន បុព្ពភាគេ អាសវក្ខយត្ថាយ អរញ្ញេ វសន្តេន កម្មដ្ឋានំ អាទាយ វីរិយំ កតំ, អបរភាគេ សចេ ឥច្ឆតិ, ករោតុ, នោ ចេ ឥច្ឆតិ, យថាសុខំ វិហរតូ’’តិ ខីណាសវស្ស កិច្ចវោសានទស្សនត្ថំ ឯវមាហ. តត្ថ គាធន្តិ បតិដ្ឋំ. បញ្ចមំ.