៧. ឥស្សរិយសុត្តវណ្ណនា

៧៧. សត្តមេ សត្ថមលន្តិ មលគ្គហិតសត្ថំ. កិំ សុ ហរន្តំ វារេន្តីតិ កំ ហរន្តំ និសេធេន្តិ. វសោតិ អាណាបវត្តនំ. ឥត្ថីតិ អវិស្សជ្ជនីយភណ្ឌត្តា ‘‘ឥត្ថី ភណ្ឌានមុត្តមំ, វរភណ្ឌ’’ន្តិ អាហ. អថ វា សព្ពេបិ ពោធិសត្តា ច ចក្កវត្តិនោ ច មាតុកុច្ឆិយំយេវ និព្ពត្តន្តីតិ ‘‘ឥត្ថី ភណ្ឌានមុត្តម’’ន្តិ អាហ. កោធោ សត្ថមលន្តិ កោធោ មលគ្គហិតសត្ថសទិសោ, បញ្ញាសត្ថស្ស វា មលន្តិ សត្ថមលំ. អព្ពុទន្តិ វិនាសការណំ, ចោរា លោកស្មិំ វិនាសកាតិ អត្ថោ. ហរន្តោតិ សលាកភត្តាទីនិ គហេត្វា គច្ឆន្តោ. សលាកភត្តាទីនិ ហិ បដ្ឋបិតកាលេយេវ មនុស្សេហិ បរិច្ចត្តានិ. តេសំ តានិ ហរន្តោ សមណោ បិយោ ហោតិ, អនាហរន្តេ បុញ្ញហានិំ និស្សាយ វិប្បដិសារិនោ ហោន្តិ. សត្តមំ.