១១. អរណសុត្តវណ្ណនា

៨១. ឯកាទសមេ អរណាតិ និក្កិលេសា. វុសិតន្តិ វុសិតវាសោ. ភោជិស្សិយន្តិ អទាសភាវោ. សមណាតិ ខីណាសវសមណា. តេ ហិ ឯកន្តេន អរណា នាម. វុសិតំ ន នស្សតីតិ តេសំ អរិយមគ្គវាសោ ន នស្សតិ. បរិជានន្តីតិ បុថុជ្ជនកល្យាណកតោ បដ្ឋាយ សេខា លោកិយលោកុត្តរាយ បរិញ្ញាយ បរិជានន្តិ. ភោជិស្សិយន្តិ ខីណាសវសមណានំយេវ និច្ចំ ភុជិស្សភាវោ នាម. វន្ទន្តីតិ បព្ពជិតទិវសតោ បដ្ឋាយ វន្ទន្តិ. បតិដ្ឋិតន្តិ សីលេ បតិដ្ឋិតំ. សមណីធាតិ សមណំ ឥធ. ជាតិហីនន្តិ អបិ ចណ្ឌាលកុលា បព្ពជិតំ. ខត្តិយាតិ ន កេវលំ ខត្តិយាវ, ទេវាបិ សីលសម្បន្នំ សមណំ វន្ទន្តិយេវាតិ. ឯកាទសមំ.

ឆេត្វាវគ្គោ អដ្ឋមោ.

ឥតិ សារត្ថប្បកាសិនិយា

សំយុត្តនិកាយ-អដ្ឋកថាយ

ទេវតាសំយុត្តវណ្ណនា និដ្ឋិតា.