១. ឆេត្វាសុត្តវណ្ណនា

៧១. ឆេត្វាវគ្គស្ស បឋមេ ឆេត្វាតិ វធិត្វា. សុខំ សេតីតិ កោធបរិឡាហេន អបរិទយ្ហមានត្តា សុខំ សយតិ. ន សោចតីតិ កោធវិនាសេន វិនដ្ឋទោមនស្សត្តា ន សោចតិ. វិសមូលស្សាតិ ទុក្ខវិបាកស្ស. មធុរគ្គស្សាតិ កុទ្ធស្ស បដិកុជ្ឈិត្វា, អក្កុដ្ឋស្ស បច្ចក្កោសិត្វា, បហដស្ស ច បដិបហរិត្វា សុខំ ឧប្បជ្ជតិ, តំ សន្ធាយ មធុរគ្គោតិ វុត្តោ. ឥមស្មិំ ហិ ឋានេ បរិយោសានំ អគ្គន្តិ វុត្តំ. អរិយាតិ ពុទ្ធាទយោ. បឋមំ.