៨. មហទ្ធនសុត្តវណ្ណនា

២៨. អដ្ឋមេ និធានគតំ មុត្តសារាទិ មហន្តំ ធនមេតេសន្តិ មហទ្ធនា. សុវណ្ណរជតភាជនាទិ មហាភោគោ ឯតេសន្តិ មហាភោគា. អញ្ញមញ្ញាភិគិជ្ឈន្តីតិ អញ្ញមញ្ញំ អភិគិជ្ឈន្តិ បត្ថេន្តិ បិហេន្តិ. អនលង្កតាតិ អតិត្តា អបរិយត្តជាតា. ឧស្សុក្កជាតេសូតិ នានាកិច្ចជាតេសុ អនុប្បន្នានំ រូបាទីនំ ឧប្បាទនត្ថាយ ឧប្បន្នានំ អនុភវនត្ថាយ ឧស្សុក្កេសុ. ភវសោតានុសារីសូតិ វដ្ដសោតំ អនុសរន្តេសុ. អនុស្សុកាតិ អវាវដា. អគារន្តិ មាតុគាមេន សទ្ធិំ គេហំ. វិរាជិយាតិ វិរាជេត្វា. សេសំ ឧត្តានមេវាតិ. អដ្ឋមំ.