៦. ជាគរសុត្តវណ្ណនា

៦. ឆដ្ឋេ ជាគរតន្តិ ជាគរន្តានំ. បញ្ច ជាគរតន្តិ វិស្សជ្ជនគាថាយំ បន សទ្ធាទីសុ បញ្ចសុ ឥន្ទ្រិយេសុ ជាគរន្តេសុ បញ្ច នីវរណា សុត្តា នាម. កស្មា? យស្មា តំសមង្គីបុគ្គលោ យត្ថ កត្ថចិ និសិន្នោ វា ឋិតោ វា អរុណំ ឧដ្ឋបេន្តោបិ បមាទតាយ អកុសលសមង្គិតាយ សុត្តោ នាម ហោតិ. ឯវំ សុត្តេសុ បញ្ចសុ នីវរណេសុ បញ្ចិន្ទ្រិយានិ ជាគរានិ នាម. កស្មា? យស្មា តំសមង្គីបុគ្គលោ យត្ថ កត្ថចិ និបជ្ជិត្វា និទ្ទាយន្តោបិ អប្បមាទតាយ កុសលសមង្គិតាយ ជាគរោ នាម ហោតិ. បញ្ចហិ បន នីវរណេហេវ កិលេសរជំ អាទិយតិ គណ្ហាតិ បរាមសតិ. បុរិមា ហិ កាមច្ឆន្ទាទយោ បច្ឆិមានំ បច្ចយា ហោន្តីតិ បញ្ចហិ ឥន្ទ្រិយេហិ បរិសុជ្ឈតីតិ អយមត្ថោ វេទិតព្ពោ. ឥធាបិ បញ្ចិន្ទ្រិយានិ លោកិយលោកុត្តរានេវ កថិតានីតិ.

ជាគរសុត្តវណ្ណនា និដ្ឋិតា.