១. នឡវគ្គោ

១. ឱឃតរណសុត្តវណ្ណនា

តត្ថ សំយុត្តាគមោ នាម សគាថាវគ្គោ, និទានវគ្គោ, ខន្ធកវគ្គោ, សឡាយតនវគ្គោ, មហាវគ្គោតិ បញ្ចវគ្គោ ហោតិ. សុត្តតោ –

‘‘សត្ត សុត្តសហស្សានិ, សត្ត សុត្តសតានិ ច;

ទ្វាសដ្ឋិ ចេវ សុត្តានិ, ឯសោ សំយុត្តសង្គហោ’’.

ភាណវារតោ ភាណវារសតំ ហោតិ. តស្ស វគ្គេសុ សគាថាវគ្គោ អាទិ, សុត្តេសុ ឱឃតរណសុត្តំ. តស្សាបិ ‘‘ឯវំ មេ សុត’’ន្តិអាទិកំ អាយស្មតា អានន្ទេន បឋមមហាសង្គីតិកាលេ វុត្តំ និទានមាទិ. សា បនេសា បឋមមហាសង្គីតិ សុមង្គលវិលាសិនិយា ទីឃនិកាយដ្ឋកថាយ អាទិម្ហិ វិត្ថារិតា, តស្មា សា តត្ថ វិត្ថារិតនយេនេវ វេទិតព្ពា.

១. យំ បនេតំ ‘‘ឯវំ មេ សុត’’ន្តិអាទិកំ និទានំ, តត្ថ ឯវន្តិ និបាតបទំ. មេតិអាទីនិ នាមបទានិ. សាវត្ថិយំ វិហរតីតិ ឯត្ថ វីតិ ឧបសគ្គបទំ, ហរតីតិ អាខ្យាតបទន្តិ ឥមិនា តាវ នយេន បទវិភាគោ វេទិតព្ពោ.

អត្ថតោ បន ឯវំសទ្ទោ តាវ ឧបមូបទេស-សម្បហំសន-គរហណ-វចនសម្បដិគ្គហាការនិទស្សនាវធារណាទិ-អនេកត្ថប្បភេទោ. តថា ហេស – ‘‘ឯវំ ជាតេន មច្ចេន, កត្តព្ពំ កុសលំ ពហុ’’ន្តិ (ធ. ប. ៥៣) ឯវមាទីសុ ឧបមាយំ អាគតោ. ‘‘ឯវំ តេ អភិក្កមិតព្ពំ, ឯវំ តេ បដិក្កមិតព្ព’’ន្តិអាទីសុ (អ. និ. ៤.១២២) ឧបទេសេ. ‘‘ឯវមេតំ ភគវា, ឯវមេតំ សុគតា’’តិអាទីសុ (អ. និ. ៣.៦៦) សម្បហំសនេ. ‘‘ឯវមេវំ បនាយំ វសលី យស្មិំ វា តស្មិំ វា តស្ស មុណ្ឌកស្ស សមណកស្ស វណ្ណំ ភាសតី’’តិអាទីសុ (សំ. និ. ១.១៨៧) គរហណេ. ‘‘ឯវំ, ភន្តេតិ ខោ តេ ភិក្ខូ ភគវតោ បច្ចស្សោសុ’’ន្តិអាទីសុ (ម. និ. ១.១) វចនសម្បដិគ្គហេ. ‘‘ឯវំ ព្យា ខោ អហំ, ភន្តេ, ភគវតា ធម្មំ ទេសិតំ អាជានាមី’’តិអាទីសុ (ម. និ. ១.៣៩៨) អាការេ. ‘‘ឯហិ ត្វំ មាណវក, យេន សមណោ អានន្ទោ តេនុបសង្កម; ឧបសង្កមិត្វា មម វចនេន សមណំ អានន្ទំ អប្បាពាធំ អប្បាតង្កំ លហុដ្ឋានំ ពលំ ផាសុវិហារំ បុច្ឆ – ‘សុភោ មាណវោ តោទេយ្យបុត្តោ ភវន្តំ អានន្ទំ អប្បាពាធំ អប្បាតង្កំ លហុដ្ឋានំ ពលំ ផាសុវិហារំ បុច្ឆតី’តិ. ឯវញ្ច វទេហិ – ‘សាធុ កិរ ភវំ អានន្ទោ យេន សុភស្ស មាណវស្ស តោទេយ្យបុត្តស្ស និវេសនំ, តេនុបសង្កមតុ អនុកម្បំ ឧបាទាយា’តិ’’អាទីសុ (ទី. និ. ១.៤៤៥) និទស្សនេ. ‘‘តំ កិំ មញ្ញថ កាលាមា, ឥមេ ធម្មា កុសលា វា អកុសលា វាតិ? អកុសលា, ភន្តេ. សាវជ្ជា វា អនវជ្ជា វាតិ? សាវជ្ជា, ភន្តេ. វិញ្ញុគរហិតា វា វិញ្ញុប្បសត្ថា វាតិ? វិញ្ញុគរហិតា, ភន្តេ. សមត្តា សមាទិន្នា អហិតាយ ទុក្ខាយ សំវត្តន្តិ វា នោ វា, កថំ វោ ឯត្ថ ហោតីតិ? សមត្តា, ភន្តេ, សមាទិន្នា អហិតាយ ទុក្ខាយ សំវត្តន្តិ, ឯវំ នោ ឯត្ថ ហោតី’’តិអាទីសុ (អ. និ. ៣.៦៦) អវធារណេ. ស្វាយមិធ អាការនិទស្សនាវធារណេសុ ទដ្ឋព្ពោ.

តត្ថ អាការត្ថេន ឯវំសទ្ទេន ឯតមត្ថំ ទីបេតិ – នានានយនិបុណំ អនេកជ្ឈាសយសមុដ្ឋានំ អត្ថព្យញ្ជនសម្បន្នំ វិវិធបាដិហារិយំ ធម្មត្ថទេសនា បដិវេធគម្ភីរំ សព្ពសត្តានំ សកសកភាសានុរូបតោ សោតបថមាគច្ឆន្តំ តស្ស ភគវតោ វចនំ សព្ពប្បការេន កោ សមត្ថោ វិញ្ញាតុំ? សព្ពថាមេន បន សោតុកាមតំ ជនេត្វាបិ ឯវំ មេ សុតំ, មយាបិ ឯកេនាការេន សុតន្តិ.

និទស្សនត្ថេន – ‘‘នាហំ សយម្ភូ, ន មយា ឥទំ សច្ឆិកត’’ន្តិ អត្តានំ បរិមោចេន្តោ – ‘‘ឯវំ មេ សុតំ, មយាបិ ឯវំ សុត’’ន្តិ ឥទានិ វត្តព្ពំ សកលសុត្តំ និទស្សេតិ.

អវធារណត្ថេន – ‘‘ឯតទគ្គំ, ភិក្ខវេ, មម សាវកានំ ភិក្ខូនំ ពហុស្សុតានំ យទិទំ អានន្ទោ, គតិមន្តានំ, សតិមន្តានំ, ធិតិមន្តានំ, ឧបដ្ឋាកានំ យទិទំ អានន្ទោ’’តិ (អ. និ. ១.២២០-២២៣) ឯវំ ភគវតា – ‘‘អាយស្មា អានន្ទោ អត្ថកុសលោ ធម្មកុសលោ ព្យញ្ជនកុសលោ និរុត្តិកុសលោ បុព្ពាបរកុសលោ’’តិ (អ. និ. ៥.១៦៩) ឯវំ ធម្មសេនាបតិនា ច បសត្ថភាវានុរូបំ អត្តនោ ធារណពលំ ទស្សេន្តោ សត្តានំ សោតុកាមតំ ជនេតិ – ‘‘ឯវំ មេ សុតំ, តញ្ច ខោ អត្ថតោ វា ព្យញ្ជនតោ វា អនូនមនធិកំ, ឯវមេវ ន អញ្ញថា ទដ្ឋព្ព’’ន្តិ.

មេសទ្ទោ តីសុ អត្ថេសុ ទិស្សតិ. តថា ហិស្ស – ‘‘គាថាភិគីតំ មេ អភោជនេយ្យ’’ន្តិអាទីសុ (សុ. និ. ៨១) មយាតិ អត្ថោ. ‘‘សាធុ មេ, ភន្តេ, ភគវា សំខិត្តេន ធម្មំ ទេសេតូ ’’ តិអាទីសុ (សំ. និ. ៤.៨៨) មយ្ហន្តិ អត្ថោ. ‘‘ធម្មទាយាទា មេ, ភិក្ខវេ, ភវថា’’តិអាទីសុ (ម. និ. ១.២៩) មមាតិ អត្ថោ. ឥធ បន ‘‘មយា សុត’’ន្តិ ច ‘‘មម សុត’’ន្តិ ច អត្ថទ្វយេ យុជ្ជតិ.

សុតន្តិ អយំ សុតសទ្ទោ សឧបសគ្គោ អនុបសគ្គោ ច គមន-វិស្សុត-កិលិន្នឧបចិតានុយោគ-សោតវិញ្ញេយ្យ-សោតទ្វារានុសារវិញ្ញាតាទិអនេកត្ថប្បភេទោ. តថា ហិស្ស – ‘‘សេនាយ បសុតោ’’តិអាទីសុ គច្ឆន្តោតិ អត្ថោ. ‘‘សុតធម្មស្ស បស្សតោ’’តិអាទីសុ (ឧទា. ១១) វិស្សុតធម្មស្សាតិ អត្ថោ. ‘‘អវស្សុតា អវស្សុតស្សា’’តិអាទីសុ (បាចិ. ៦៥៧) កិលិន្នាកិលិន្នស្សាតិ អត្ថោ. ‘‘តុម្ហេហិ បុញ្ញំ បសុតំ អនប្បក’’ន្តិអាទីសុ (ខុ. បា. ៧.១២) ឧបចិតន្តិ អត្ថោ. ‘‘យេ ឈានបសុតា ធីរា’’តិអាទីសុ (ធ. ប. ១៨១) ឈានានុយុត្តាតិ អត្ថោ. ‘‘ទិដ្ឋំ សុតំ មុត’’ន្តិអាទីសុ (ម. និ. ១.២៤១) សោតវិញ្ញេយ្យន្តិ អត្ថោ. ‘‘សុតធរោ សុតសន្និចយោ’’តិអាទីសុ (ម. និ. ១.៣៣៩) សោតទ្វារានុសារវិញ្ញាតធរោតិ អត្ថោ. ឥធ បនស្ស សោតទ្វារានុសារេន ឧបធារិតន្តិ វា ឧបធារណន្តិ វា អត្ថោ. មេ-សទ្ទស្ស ហិ មយាតិ អត្ថេ សតិ – ‘‘ឯវំ មយា សុតំ, សោតទ្វារានុសារេន ឧបធារិត’’ន្តិ យុជ្ជតិ. មមាតិ អត្ថេ សតិ – ‘‘ឯវំ មម សុតំ, សោតទ្វារានុសារេន ឧបធារណ’’ន្តិ យុជ្ជតិ.

ឯវមេតេសុ តីសុ បទេសុ ឯវន្តិ សោតវិញ្ញាណាទិវិញ្ញាណកិច្ចនិទស្សនំ. មេតិ វុត្តវិញ្ញាណសមង្គិបុគ្គលនិទស្សនំ. សុតន្តិ អស្សវនភាវបដិក្ខេបតោ អនូនានធិកាវិបរីតគ្គហណនិទស្សនំ. តថា ឯវន្តិ តស្ស សោតទ្វារានុសារេន បវត្តាយ វិញ្ញាណវីថិយា នានប្បការេន អារម្មណេ បវត្តិភាវប្បកាសនំ. មេតិ អត្តប្បកាសនំ. សុតន្តិ ធម្មប្បកាសនំ. អយញ្ហេត្ថ សង្ខេបោ – ‘‘នានប្បការេន អារម្មណេ បវត្តាយ វិញ្ញាណវីថិយា មយា ន អញ្ញំ កតំ, ឥទំ បន កតំ, អយំ ធម្មោ សុតោ’’តិ.

តថា ឯវន្តិ និទ្ទិសិតព្ពប្បកាសនំ. មេតិ បុគ្គលប្បកាសនំ. សុតន្តិ បុគ្គលកិច្ចប្បកាសនំ. ឥទំ វុត្តំ ហោតិ – ‘‘យំ សុត្តំ និទ្ទិសិស្សាមិ, តំ មយា ឯវំ សុត’’ន្តិ.

តថា ឯវន្តិ យស្ស ចិត្តសន្តានស្ស នានាការប្បវត្តិយា នានត្ថព្យញ្ជនគហណំ ហោតិ, តស្ស នានាការនិទ្ទេសោ. ឯវន្តិ ហិ អយំ អាការបញ្ញត្តិ. មេតិ កត្តុនិទ្ទេសោ. សុតន្តិ វិសយនិទ្ទេសោ. ឯត្តាវតា នានាការប្បវត្តេន ចិត្តសន្តានេន តំសមង្គិនោ កត្តុវិសយេ គហណសន្និដ្ឋានំ កតំ ហោតិ.

អថ វា ឯវន្តិ បុគ្គលកិច្ចនិទ្ទេសោ. សុតន្តិ វិញ្ញាណកិច្ចនិទ្ទេសោ. មេតិ ឧភយកិច្ចយុត្តបុគ្គលនិទ្ទេសោ. អយំ បនេត្ថ សង្ខេបោ – ‘‘មយា សវនកិច្ចវិញ្ញាណសមង្គិនា បុគ្គលេន វិញ្ញាណវសេន លទ្ធសវនកិច្ចវោហារេន សុត’’ន្តិ.

តត្ថ ឯវន្តិ ច មេតិ ច សច្ចិកដ្ឋបរមត្ថវសេន អវិជ្ជមានបញ្ញត្តិ. កិញ្ហេត្ថ តំ បរមត្ថតោ អត្ថិ, យំ ឯវន្តិ វា មេតិ វា និទ្ទេសំ លភេថ. សុតន្តិ វិជ្ជមានបញ្ញត្តិ. យញ្ហិ តំ ឯត្ថ សោតេន ឧបលទ្ធំ, តំ បរមត្ថតោ វិជ្ជមានន្តិ. តថា ឯវន្តិ ច មេតិ ច តំ តំ ឧបាទាយ វត្តព្ពតោ ឧបាទាបញ្ញត្តិ. សុតន្តិ ទិដ្ឋាទីនិ ឧបនិធាយ វត្តព្ពតោ ឧបនិធាបញ្ញត្តិ.

ឯត្ថ ច ឯវន្តិ វចនេន អសម្មោហំ ទីបេតិ. ន ហិ សម្មូឡ្ហោ នានប្បការបដិវេធសមត្ថោ ហោតិ. សុតន្តិ វចនេន សុតស្ស អសម្មោសំ ទីបេតិ. យស្ស ហិ សុតំ សម្មុដ្ឋំ ហោតិ, ន សោ កាលន្តរេន មយា សុតន្តិ បដិជានាតិ. ឥច្ចស្ស អសម្មោហេន បញ្ញាសិទ្ធិ, អសម្មោសេន បន សតិសិទ្ធិ. តត្ថ បញ្ញាបុព្ពង្គមាយ សតិយា ព្យញ្ជនាវធារណសមត្ថតា, សតិបុព្ពង្គមាយ បញ្ញាយ អត្ថបដិវេធសមត្ថតា. តទុភយសមត្ថតាយោគេន អត្ថព្យញ្ជនសម្បន្នស្ស ធម្មកោសស្ស អនុបាលនសមត្ថតោ ធម្មភណ្ឌាគារិកត្តសិទ្ធិ.

អបរោ នយោ – ឯវន្តិ វចនេន យោនិសោ មនសិការំ ទីបេតិ, អយោនិសោ មនសិករោតោ ហិ នានប្បការបដិវេធាភាវតោ. សុតន្តិ វចនេន អវិក្ខេបំ ទីបេតិ វិក្ខិត្តចិត្តស្ស សវនាភាវតោ. តថា ហិ វិក្ខិត្តចិត្តោ បុគ្គលោ សព្ពសម្បត្តិយា វុច្ចមានោបិ ‘‘ន មយា សុតំ, បុន ភណថា’’តិ ភណតិ. យោនិសោ មនសិការេន ចេត្ថ អត្តសម្មាបណិធិំ បុព្ពេ ច កតបុញ្ញតំ សាធេតិ, សម្មា អប្បណិហិតត្តស្ស បុព្ពេ អកតបុញ្ញស្ស វា តទភាវតោ. អវិក្ខេបេន សទ្ធម្មស្សវនំ សប្បុរិសូបនិស្សយញ្ច សាធេតិ. ន ហិ វិក្ខិត្តចិត្តោ សោតុំ សក្កោតិ, ន ច សប្បុរិសេ អនុបនិស្សយមានស្ស សវនំ អត្ថីតិ.

អបរោ នយោ – យស្មា ‘‘ឯវន្តិ យស្ស ចិត្តសន្តានស្ស នានាការប្បវត្តិយា នានត្ថព្យញ្ជនគ្គហណំ ហោតិ, តស្ស នានាការនិទ្ទេសោ’’តិ វុត្តំ, សោ ច ឯវំ ភទ្ទកោ អាការោ ន សម្មា អប្បណិហិតត្តនោ បុព្ពេ អកតបុញ្ញស្ស វា ហោតិ, តស្មា ឯវន្តិ ឥមិនា ភទ្ទកេន អាការេន បច្ឆិមចក្កទ្វយសម្បត្តិមត្តនោ ទីបេតិ. សុតន្តិ សវនយោគេន បុរិមចក្កទ្វយសម្បត្តិំ. ន ហិ អប្បតិរូបទេសេ វសតោ សប្បុរិសូបនិស្សយវិរហិតស្ស វា សវនំ អត្ថិ. ឥច្ចស្ស បច្ឆិមចក្កទ្វយសិទ្ធិយា អាសយសុទ្ធិ សិទ្ធា ហោតិ, បុរិមចក្កទ្វយសិទ្ធិយា បយោគសុទ្ធិ, តាយ ច អាសយសុទ្ធិយា អធិគមព្យត្តិសិទ្ធិ, បយោគសុទ្ធិយា អាគមព្យត្តិសិទ្ធិ. ឥតិ បយោគាសយសុទ្ធស្ស អាគមាធិគមសម្បន្នស្ស វចនំ អរុណុគ្គំ វិយ សូរិយស្ស ឧទយតោ, យោនិសោ មនសិការោ វិយ ច កុសលកម្មស្ស, អរហតិ ភគវតោ វចនស្ស បុព្ពង្គមំ ភវិតុន្តិ ឋានេ និទានំ ឋបេន្តោ ឯវំ មេ សុតន្តិអាទិមាហ.

អបរោ នយោ – ឯវន្តិ ឥមិនា នានប្បការបដិវេធទីបកេន វចនេន អត្តនោ អត្ថបដិភានបដិសម្ភិទាសម្បត្តិសព្ភាវំ ទីបេតិ. សុតន្តិ ឥមិនា សោតព្ពភេទបដិវេធទីបកេន ធម្មនិរុត្តិបដិសម្ភិទាសម្បត្តិសព្ភាវំ. ឯវន្តិ ច ឥទំ យោនិសោ មនសិការទីបកវចនំ ភាសមានោ – ‘‘ឯតេ មយា ធម្មា មនសានុបេក្ខិតា ទិដ្ឋិយា សុប្បដិវិទ្ធា’’តិ ទីបេតិ. សុតន្តិ ឥទំ សវនយោគទីបកវចនំ ភាសមានោ – ‘‘ពហូ មយា ធម្មា សុតា ធាតា វចសា បរិចិតា’’តិ ទីបេតិ. តទុភយេនបិ អត្ថព្យញ្ជនបារិបូរិំ ទីបេន្តោ សវនេ អាទរំ ជនេតិ. អត្ថព្យញ្ជនបរិបុណ្ណញ្ហិ ធម្មំ អាទរេន អស្សុណន្តោ មហតា ហិតា បរិពាហិរោ ហោតីតិ អាទរំ ជនេត្វា សក្កច្ចំ ធម្មោ សោតព្ពោតិ.

ឯវំ មេ សុតន្តិ ឥមិនា បន សកលេន វចនេន អាយស្មា អានន្ទោ តថាគតប្បវេទិតំ ធម្មំ អត្តនោ អទហន្តោ អសប្បុរិសភូមិំ អតិក្កមតិ, សាវកត្តំ បដិជានន្តោ សប្បុរិសភូមិំ ឱក្កមតិ. តថា អសទ្ធម្មា ចិត្តំ វុដ្ឋាបេតិ, សទ្ធម្មេ ចិត្តំ បតិដ្ឋាបេតិ. ‘‘កេវលំ សុតមេវេតំ មយា, តស្សេវ បន ភគវតោ វចន’’ន្តិ ទីបេន្តោ អត្តានំ បរិមោចេតិ, សត្ថារំ អបទិសតិ, ជិនវចនំ អប្បេតិ, ធម្មនេត្តិំ បតិដ្ឋាបេតិ.

អបិច ‘‘ឯវំ មេ សុត’’ន្តិ អត្តនា ឧប្បាទិតភាវំ អប្បដិជានន្តោ បុរិមវចនំ វិវរន្តោ – ‘‘សម្មុខា បដិគ្គហិតមិទំ មយា តស្ស ភគវតោ ចតុវេសារជ្ជវិសារទស្ស ទសពលធរស្ស អាសភដ្ឋានដ្ឋាយិនោ សីហនាទនាទិនោ សព្ពសត្តុត្តមស្ស ធម្មិស្សរស្ស ធម្មរាជស្ស ធម្មាធិបតិនោ ធម្មទីបស្ស ធម្មសរណស្ស សទ្ធម្មវរចក្កវត្តិនោ សម្មាសម្ពុទ្ធស្ស វចនំ, ន ឯត្ថ អត្ថេ វា ធម្មេ វា បទេ វា ព្យញ្ជនេ វា កង្ខា វា វិមតិ វា កត្តព្ពា’’តិ សព្ពទេវមនុស្សានំ ឥមស្មិំ ធម្មេ អស្សទ្ធិយំ វិនាសេតិ, សទ្ធាសម្បទំ ឧប្បាទេតីតិ. តេនេតំ វុច្ចតិ –

‘‘វិនាសយតិ អស្សទ្ធំ, សទ្ធំ វឌ្ឍេតិ សាសនេ;

ឯវំ មេ សុតមិច្ចេវំ, វទំ គោតមសាវកោ’’តិ.

ឯកន្តិ គណនបរិច្ឆេទនិទ្ទេសោ. សមយន្តិ បរិច្ឆិន្ននិទ្ទេសោ. ឯកំ សមយន្តិ អនិយមិតបរិទីបនំ. តត្ថ សមយសទ្ទោ –

‘‘សមវាយេ ខណេ កាលេ, សមូហេ ហេតុទិដ្ឋិសុ;

បដិលាភេ បហានេ ច, បដិវេធេ ច ទិស្សតិ’’.

តថា ហិស្ស ‘‘អប្បេវ នាម ស្វេបិ ឧបសង្កមេយ្យាម កាលញ្ច សមយញ្ច ឧបាទាយា’’តិ ឯវមាទីសុ (ទី. និ. ១.៤៤៧) សមវាយោ អត្ថោ. ‘‘ឯកោវ ខោ, ភិក្ខវេ, ខណោ ច សមយោ ច ព្រហ្មចរិយវាសាយា’’តិអាទីសុ (អ. និ. ៨.២៩) ខណោ. ‘‘ឧណ្ហសមយោ បរិឡាហសមយោ’’តិអាទីសុ (បាចិ. ៣៥៨) កាលោ. ‘‘មហាសមយោ បវនស្មិ’’ន្តិអាទីសុ (ទី. និ. ២.៣៣២) សមូហោ. ‘‘សមយោបិ ខោ តេ, ភទ្ទាលិ, អប្បដិវិទ្ធោ អហោសិ, ភគវា ខោ សាវត្ថិយំ វិហរតិ, ភគវាបិ មំ ជានិស្សតិ – ‘ភទ្ទាលិ, នាម ភិក្ខុ សត្ថុសាសនេ សិក្ខាយ អបរិបូរការី’តិ. អយម្បិ ខោ តេ, ភទ្ទាលិ, សមយោ អប្បដិវិទ្ធោ អហោសី’’តិអាទីសុ (ម. និ. ២.១៣៥) ហេតុ. ‘‘តេន ខោ បន សមយេន ឧគ្គាហមានោ បរិព្ពាជកោ សមណមុណ្ឌិកាបុត្តោ សមយប្បវាទកេ តិន្ទុកាចីរេ ឯកសាលកេ មល្លិកាយ អារាមេ បដិវសតី’’តិអាទីសុ (ម. និ. ២.២៦០) ទិដ្ឋិ.

‘‘ទិដ្ឋេ ធម្មេ ច យោ អត្ថោ, យោ ចត្ថោ សម្បរាយិកោ;

អត្ថាភិសមយា ធីរោ, បណ្ឌិតោតិ បវុច្ចតី’’តិ. –

អាទីសុ (សំ. និ. ១.១២៩) បដិលាភោ. ‘‘សម្មា មានាភិសមយា អន្តមកាសិ ទុក្ខស្សា’’តិអាទីសុ (ម. និ. ១.២៨) បហានំ. ‘‘ទុក្ខស្ស បីឡនដ្ឋោ សង្ខតដ្ឋោ សន្តាបដ្ឋោ វិបរិណាមដ្ឋោ អភិសមយដ្ឋោ’’តិអាទីសុ (បដិ. ម. ២.៨) បដិវេធោ. ឥធ បនស្ស កាលោ អត្ថោ. តេន សំវច្ឆរ-ឧតុ-មាសឌ្ឍមាស-រត្តិ-ទិវ-បុព្ពណ្ហ-មជ្ឈន្ហិក-សាយន្ហ-បឋមមជ្ឈិមបច្ឆិមយាម-មុហុត្តាទីសុ កាលប្បភេទភូតេសុ សមយេសុ ឯកំ សមយន្តិ ទីបេតិ.

តត្ថ កិញ្ចាបិ ឯតេសុ សំវច្ឆរាទីសុ សមយេសុ យំ យំ សុត្តំ យស្មិំ យស្មិំ សំវច្ឆរេ ឧតុម្ហិ មាសេ បក្ខេ រត្តិភាគេ ទិវសភាគេ វា វុត្តំ, សព្ពំ តំ ថេរស្ស សុវិទិតំ សុវវត្ថាបិតំ បញ្ញាយ. យស្មា បន ‘‘ឯវំ មេ សុតំ អសុកសំវច្ឆរេ អសុកឧតុម្ហិ អសុកមាសេ អសុកបក្ខេ អសុករត្តិភាគេ អសុកទិវសភាគេ វា’’តិ ឯវំ វុត្តេ ន សក្កា សុខេន ធារេតុំ វា ឧទ្ទិសិតុំ វា ឧទ្ទិសាបេតុំ វា, ពហុ ច វត្តព្ពំ ហោតិ, តស្មា ឯកេនេវ បទេន តមត្ថំ សមោធានេត្វា ‘‘ឯកំ សមយ’’ន្តិ អាហ.

យេ វា ឥមេ គព្ភោក្កន្តិសមយោ ជាតិសមយោ សំវេគសមយោ អភិនិក្ខមនសមយោ ទុក្ករការិកសមយោ មារវិជយសមយោ អភិសម្ពោធិសមយោ ទិដ្ឋធម្មសុខវិហារសមយោ ទេសនាសមយោ បរិនិព្ពានសមយោតិ ឯវមាទយោ ភគវតោ ទេវមនុស្សេសុ អតិវិយ សុប្បកាសា អនេកកាលប្បភេទា ឯវ សមយា. តេសុ សមយេសុ ទេសនាសមយសង្ខាតំ ឯកំ សមយន្តិ ទីបេតិ. យោ ចាយំ ញាណករុណាកិច្ចសមយេសុ ករុណាកិច្ចសមយោ, អត្តហិតបរហិតបដិបត្តិសមយេសុ បរហិតបដិបត្តិសមយោ, សន្និបតិតានំ ករណីយទ្វយសមយេសុ ធម្មិកថាសមយោ, ទេសនាបដិបត្តិសមយេសុ ទេសនាសមយោ, តេសុបិ សមយេសុ អញ្ញតរំ សន្ធាយ ‘‘ឯកំ សមយ’’ន្តិ អាហ.

កស្មា បនេត្ថ យថា អភិធម្មេ ‘‘យស្មិំ សមយេ កាមាវចរ’’ន្តិ ច ឥតោ អញ្ញេសុ សុត្តបទេសុ ‘‘យស្មិំ សមយេ, ភិក្ខវេ, ភិក្ខុ វិវិច្ចេវ កាមេហី’’តិ ច ភុម្មវចនេន និទ្ទេសោ កតោ, វិនយេ ច ‘‘តេន សមយេន ពុទ្ធោ ភគវា’’តិ ករណវចនេន, តថា អកត្វា ‘‘ឯកំ សមយ’’ន្តិ ឧបយោគវចនេន និទ្ទេសោ កតោតិ. តត្ថ តថា, ឥធ ច អញ្ញថា អត្ថសម្ភវតោ. តត្ថ ហិ អភិធម្មេ ឥតោ អញ្ញេសុ សុត្តបទេសុ ច អធិករណត្ថោ ភាវេនភាវលក្ខណត្ថោ ច សម្ភវតិ. អធិករណញ្ហិ កាលត្ថោ សមូហត្ថោ ច សមយោ, តត្ថ វុត្តានំ ផស្សាទិធម្មានំ ខណសមវាយហេតុសង្ខាតស្ស ច សមយស្ស ភាវេន តេសំ ភាវោ លក្ខីយតិ. តស្មា តទត្ថជោតនត្ថំ តត្ថ ភុម្មវចននិទ្ទេសោ កតោ.

វិនយេ ច ហេតុអត្ថោ ករណត្ថោ ច សម្ភវតិ. យោ ហិ សោ សិក្ខាបទបញ្ញត្តិសមយោ សារិបុត្តាទីហិបិ ទុព្ពិញ្ញេយ្យោ, តេន សមយេន ហេតុភូតេន ករណភូតេន ច សិក្ខាបទានិ បញ្ញាបយន្តោ សិក្ខាបទបញ្ញត្តិហេតុញ្ច អបេក្ខមានោ ភគវា តត្ថ តត្ថ វិហាសិ. តស្មា តទត្ថជោតនត្ថំ តត្ថ ករណវចនេន និទ្ទេសោ កតោ.

ឥធ បន អញ្ញស្មិំ ច ឯវំជាតិកេ អច្ចន្តសំយោគត្ថោ សម្ភវតិ. យញ្ហិ សមយំ ភគវា ឥមំ អញ្ញំ វា សុត្តន្តំ ទេសេសិ, អច្ចន្តមេវ តំ សមយំ ករុណាវិហារេន វិហាសិ. តស្មា តទត្ថជោតនត្ថំ ឥធ ឧបយោគវចននិទ្ទេសោ កតោតិ.

តេនេតំ វុច្ចតិ –

‘‘តំ តំ អត្ថមបេក្ខិត្វា, ភុម្មេន ករណេន ច;

អញ្ញត្រ សមយោ វុត្តោ, ឧបយោគេន សោ ឥធា’’តិ.

បោរាណា បន វណ្ណយន្តិ – ‘‘តស្មិំ សមយេ’’តិ វា ‘‘តេន សមយេនា’’តិ វា ‘‘ឯកំ សមយ’’ន្តិ វា អភិលាបមត្តភេទោ ឯស, សព្ពត្ថ ភុម្មមេវ អត្ថោតិ. តស្មា ‘‘ឯកំ សមយ’’ន្តិ វុត្តេបិ ‘‘ឯកស្មិំ សមយេ’’តិ អត្ថោ វេទិតព្ពោ.

ភគវាតិ គរុ. គរុំ ហិ លោកេ ‘‘ភគវា’’តិ វទន្តិ. អយញ្ច សព្ពគុណវិសិដ្ឋតាយ សព្ពសត្តានំ គរុ, តស្មា ‘‘ភគវា’’តិ វេទិតព្ពោ. បោរាណេហិបិ វុត្តំ –

‘‘ភគវាតិ វចនំ សេដ្ឋំ, ភគវាតិ វចនមុត្តមំ;

គរុ គារវយុត្តោ សោ, ភគវា តេន វុច្ចតី’’តិ. (វិសុទ្ធិ. ១.១៤២);

អបិច –

‘‘ភគ្យវា ភគ្គវា យុត្តោ, ភគេហិ ច វិភត្តវា;

ភត្តវា វន្តគមនោ, ភវេសុ ភគវា តតោ’’តិ. –

ឥមិស្សា គាថាយ វសេនស្ស បទស្ស វិត្ថារតោ អត្ថោ វេទិតព្ពោ. សោ ច វិសុទ្ធិមគ្គេ (វិសុទ្ធិ. ១.១៤៤) ពុទ្ធានុស្សតិនិទ្ទេសេ វុត្តោយេវ.

ឯត្តាវតា ចេត្ថ ឯវំ មេ សុតន្តិ វចនេន យថាសុតំ ធម្មំ ទស្សេន្តោ ភគវតោ ធម្មសរីរំ បច្ចក្ខំ ករោតិ. តេន ‘‘នយិទំ អតិក្កន្តសត្ថុកំ បាវចនំ, អយំ វោ សត្ថា’’តិ សត្ថុ អទស្សនេន ឧក្កណ្ឋិតំ ជនំ សមស្សាសេតិ. ឯកំ សមយំ ភគវាតិ វចនេន តស្មិំ សមយេ ភគវតោ អវិជ្ជមានភាវំ ទស្សេន្តោ រូបកាយបរិនិព្ពានំ សាធេតិ. តេន ‘‘ឯវំវិធស្ស នាម អរិយធម្មស្ស ទេសកោ ទសពលធរោ វជិរសង្ឃាតសមានកាយោ សោបិ ភគវា បរិនិព្ពុតោ, កេន អញ្ញេន ជីវិតេ អាសា ជនេតព្ពា’’តិ ជីវិតមទមត្តំ ជនំ សំវេជេតិ, សទ្ធម្មេ ចស្ស ឧស្សាហំ ជនេតិ. ឯវន្តិ ច ភណន្តោ ទេសនាសម្បត្តិំ និទ្ទិសតិ. មេ សុតន្តិ សាវកសម្បត្តិំ. ឯកំ សមយន្តិ កាលសម្បត្តិំ. ភគវាតិ ទេសកសម្បត្តិំ.

សាវត្ថិយន្តិ ឯវំនាមកេ នគរេ. សមីបត្ថេ ចេតំ ភុម្មវចនំ. វិហរតីតិ អវិសេសេន ឥរិយាបថទិព្ពព្រហ្មអរិយវិហារេសុ អញ្ញតរវិហារសមង្គីបរិទីបនមេតំ. ឥធ បន ឋានគមននិសជ្ជាសយនប្បភេទេសុ ឥរិយាបថេសុ អញ្ញតរឥរិយាបថសមាយោគបរិទីបនំ, តេន ឋិតោបិ គច្ឆន្តោបិ និសិន្នោបិ សយានោបិ ភគវា វិហរតិច្ចេវ វេទិតព្ពោ. សោ ហិ ឯកំ ឥរិយាបថពាធនំ អញ្ញេន ឥរិយាបថេន វិច្ឆិន្ទិត្វា អបរិបតន្តំ អត្តភាវំ ហរតិ បវត្តេតិ, តស្មា ‘‘វិហរតី’’តិ វុច្ចតិ.

ជេតវនេតិ ជេតស្ស រាជកុមារស្ស វនេ. តញ្ហិ តេន រោបិតំ សំវឌ្ឍិតំ បរិបាលិតំ អហោសិ, តស្មា ‘‘ជេតវន’’ន្តិ សង្ខំ គតំ. តស្មិំ ជេតវនេ. អនាថបិណ្ឌិកស្ស អារាមេតិ អនាថបិណ្ឌិកេន គហបតិនា ចតុបញ្ញាសហិរញ្ញកោដិបរិច្ចាគេន ពុទ្ធប្បមុខស្ស ភិក្ខុសង្ឃស្ស និយ្យាតិតត្តា ‘‘អនាថបិណ្ឌិកស្ស អារាមោ’’តិ សង្ខំ គតេ អារាមេ. អយមេត្ថ សង្ខេបោ, វិត្ថារោ បន បបញ្ចសូទនិយា មជ្ឈិមដ្ឋកថាយ សព្ពាសវសុត្តវណ្ណនាយំ (ម. និ. អដ្ឋ. ១.១៤) វុត្តោ.

តត្ថ សិយា – យទិ តាវ ភគវា សាវត្ថិយំ វិហរតិ, ‘‘ជេតវនេ’’តិ ន វត្តព្ពំ. អថ តត្ថ វិហរតិ, ‘‘សាវត្ថិយ’’ន្តិ ន វត្តព្ពំ. ន ហិ សក្កា ឧភយត្ថ ឯកំ សមយំ វិហរិតុន្តិ. ន ខោ បនេតំ ឯវំ ទដ្ឋព្ពំ.

ននុ អវោចុម្ហ ‘‘សមីបត្ថេ ភុម្មវចន’’ន្តិ. តស្មា យថា គង្គាយមុនាទីនំ សមីបេ គោយូថានិ ចរន្តានិ ‘‘គង្គាយំ ចរន្តិ, យមុនាយំ ចរន្តី’’តិ វុច្ចតិ, ឯវមិធាបិ យទិទំ សាវត្ថិយា សមីបេ ជេតវនំ, តត្ថ វិហរន្តោ វុច្ចតិ ‘‘សាវត្ថិយំ វិហរតិ ជេតវនេ’’តិ. គោចរគាមនិទស្សនត្ថំ ហិស្ស សាវត្ថិវចនំ, បព្ពជិតានុរូបនិវាសដ្ឋាននិទស្សនត្ថំ សេសវចនំ.

អញ្ញតរា ទេវតាតិ នាមគោត្តវសេន អបាកដា ឯកា ទេវតាតិ អត្ថោ. ‘‘អភិជានាតិ នោ, ភន្តេ, ភគវា អហុ ញាតញ្ញតរស្ស មហេសក្ខស្ស យក្ខស្ស សំខិត្តេន តណ្ហាសង្ខយវិមុត្តិំ ភាសិតា’’តិ ឯត្ថ បន អភិញ្ញាតោ សក្កោបិ ទេវរាជា ‘‘អញ្ញតរោ’’តិ វុត្តោ. ‘‘ទេវតា’’តិ ច ឥទំ ទេវានម្បិ ទេវធីតានម្បិ សាធារណវចនំ. ឥមស្មិំ បនត្ថេ ទេវោ អធិប្បេតោ, សោ ច ខោ រូបាវចរានំ ទេវានំ អញ្ញតរោ.

អភិក្កន្តាយ រត្តិយាតិ ឯត្ថ អភិក្កន្ត-សទ្ទោ ខយសុន្ទរាភិរូបអព្ភានុមោទនាទីសុ ទិស្សតិ. តត្ថ ‘‘អភិក្កន្តា, ភន្តេ, រត្តិ, និក្ខន្តោ បឋមោ យាមោ, ចិរនិសិន្នោ ភិក្ខុសង្ឃោ, ឧទ្ទិសតុ, ភន្តេ, ភគវា ភិក្ខូនំ បាតិមោក្ខ’’ន្តិ ឯវមាទីសុ (អ. និ. ៨.២០; ចូឡវ. ៣៨៣) ខយេ ទិស្សតិ. ‘‘អយំ ឥមេសំ ចតុន្នំ បុគ្គលានំ អភិក្កន្តតរោ ច បណីតតរោ ចា’’តិ ឯវមាទីសុ (អ. និ. ៤.១០០) សុន្ទរេ.

‘‘កោ មេ វន្ទតិ បាទានិ, ឥទ្ធិយា យសសា ជលំ;

អភិក្កន្តេន វណ្ណេន, សព្ពា ឱភាសយំ ទិសា’’តិ. –

ឯវមាទីសុ (វិ. វ. ៨៥៧) អភិរូបេ. ‘‘អភិក្កន្តំ ភោ គោតម, អភិក្កន្តំ ភោ គោតមា’’តិ ឯវមាទីសុ (បារា. ១៥) អព្ភានុមោទនេ. ឥធ បន ខយេ. តេន អភិក្កន្តាយ រត្តិយា, បរិក្ខីណាយ រត្តិយាតិ វុត្តំ ហោតិ. តត្ថាយំ ទេវបុត្តោ មជ្ឈិមយាមសមនន្តរេ អាគតោតិ វេទិតព្ពោ. និយាមោ ហិ កិរេស ទេវតានំ យទិទំ ពុទ្ធានំ វា ពុទ្ធសាវកានំ វា ឧបដ្ឋានំ អាគច្ឆន្តា មជ្ឈិមយាមសមនន្តរេយេវ អាគច្ឆន្តិ.

អភិក្កន្តវណ្ណាតិ ឥធ អភិក្កន្ត-សទ្ទោ អភិរូបេ, វណ្ណ-សទ្ទោ បន ឆវិថុតិ-កុលវគ្គ-ការណ-សណ្ឋានប្បមាណ-រូបាយតនាទីសុ ទិស្សតិ. តត្ថ ‘‘សុវណ្ណវណ្ណោសិ ភគវា’’តិ ឯវមាទីសុ (សុ. និ. ៥៥៣) ឆវិយា. ‘‘កទា សញ្ញូឡ្ហា បន តេ, គហបតិ, ឥមេ សមណស្ស វណ្ណា’’តិ ឯវមាទីសុ (ម. និ. ២.៧៧) ថុតិយំ. ‘‘ចត្តារោមេ, ភោ គោតម, វណ្ណា’’តិ ឯវមាទីសុ (ទី. និ. ៣.១១៥) កុលវគ្គេ. ‘‘អថ កេន នុ វណ្ណេន, គន្ធថេនោតិ វុច្ចតី’’តិ ឯវមាទីសុ (សំ. និ. ១.២៣៤) ការណេ. ‘‘មហន្តំ ហត្ថិរាជវណ្ណំ អភិនិម្មិនិត្វា’’តិ ឯវមាទីសុ (សំ. និ. ១.១៣៨) សណ្ឋានេ. ‘‘តយោ បត្តស្ស វណ្ណា’’តិ ឯវមាទីសុ (បារា. ៦០២) បមាណេ. ‘‘វណ្ណោ គន្ធោ រសោ ឱជា’’តិ ឯវមាទីសុ រូបាយតនេ. សោ ឥធ ឆវិយា ទដ្ឋព្ពោ. តេន អភិក្កន្តវណ្ណា អភិរូបច្ឆវិ, ឥដ្ឋវណ្ណា មនាបវណ្ណាតិ វុត្តំ ហោតិ. ទេវតា ហិ មនុស្សលោកំ អាគច្ឆមានា បកតិវណ្ណំ បកតិឥទ្ធិំ ជហិត្វា ឱឡារិកំ អត្តភាវំ កត្វា អតិរេកវណ្ណំ អតិរេកឥទ្ធិំ មាបេត្វា នដសមជ្ជាទីនិ គច្ឆន្តា មនុស្សា វិយ អភិសង្ខតេន កាយេន អាគច្ឆន្តិ. តត្ថ កាមាវចរា អនភិសង្ខតេនបិ អាគន្តុំ សក្កោន្តិ, រូបាវចរា បន ន សក្កោន្តិ. តេសញ្ហិ អតិសុខុមោ អត្តភាវោ, ន តេន ឥរិយាបថកប្បនំ ហោតិ. តស្មា អយំ ទេវបុត្តោ អភិសង្ខតេនេវ អាគតោ. តេន វុត្តំ ‘‘អភិក្កន្តវណ្ណា’’តិ.

កេវលកប្បន្តិ ឯត្ថ កេវល-សទ្ទោ អនវសេស-យេភុយ្យាព្យាមិស្សានតិរេកទឡ្ហត្ថវិសំយោគាទិអនេកត្ថោ. តថា ហិស្ស ‘‘កេវលបរិបុណ្ណំ បរិសុទ្ធំ ព្រហ្មចរិយ’’ន្តិ ឯវមាទីសុ (បារា. ១) អនវសេសត្ថមត្ថោ. ‘‘កេវលកប្បា ច អង្គមគធា បហូតំ ខាទនីយភោជនីយំ អាទាយ ឧបសង្កមិស្សន្តី’’តិ ឯវមាទីសុ (មហាវ. ៤៣) យេភុយ្យតា. ‘‘កេវលស្ស ទុក្ខក្ខន្ធស្ស សមុទយោ ហោតី’’តិ ឯវមាទីសុ (វិភ. ២២៥) អព្យាមិស្សតា. ‘‘កេវលំ សទ្ធាមត្តកំ នូន អយមាយស្មា’’តិ ឯវមាទីសុ (មហាវ. ២៤៤) អនតិរេកតា. ‘‘អាយស្មតោ, ភន្តេ, អនុរុទ្ធស្ស ពាហិយោ នាម សទ្ធិវិហារិកោ កេវលកប្បំ សង្ឃភេទាយ ឋិតោ’’តិ ឯវមាទីសុ (អ. និ. ៤.២៤៣) ទឡ្ហត្ថតា. ‘‘កេវលី វុសិតវា ឧត្តមបុរិសោតិ វុច្ចតី’’តិ ឯវមាទីសុ (សំ. និ. ៣.៥៧) វិសំយោគោ អត្ថោ. ឥធ បនស្ស អនវសេសត្ថោ អធិប្បេតោ.

កប្ប-សទ្ទោ បនាយំ អភិសទ្ទហន-វោហារ-កាល-បញ្ញត្តិ-ឆេទន-វិកប្ប-លេសសមន្តភាវាទិអនេកត្ថោ. តថា ហិស្ស ‘‘ឱកប្បនិយមេតំ ភោតោ គោតមស្ស, យថា តំ អរហតោ សម្មាសម្ពុទ្ធស្សា’’តិ ឯវមាទីសុ (ម. និ. ១.៣៨៧) អភិសទ្ទហនមត្ថោ. ‘‘អនុជានាមិ, ភិក្ខវេ, បញ្ចហិ សមណកប្បេហិ ផលំ បរិភុញ្ជិតុ’’ន្តិ ឯវមាទីសុ (ចូឡវ. ២៥០) វោហារោ. ‘‘យេន សុទំ និច្ចកប្បំ វិហរាមី’’តិ ឯវមាទីសុ (ម. និ. ១.៣៨៧) កាលោ. ‘‘ឥច្ចាយស្មា កប្បោ’’តិ ឯវមាទីសុ បញ្ញត្តិ. ‘‘អលង្កតោ កប្បិតកេសមស្សូ’’តិ ឯវមាទីសុ (វិ. វ. ១០៩៤, ១១០១) ឆេទនំ. ‘‘កប្បតិ ទ្វង្គុលកប្បោ’’តិ ឯវមាទីសុ (ចូឡវ. ៤៤៦) វិកប្បោ. ‘‘អាត្ថិ កប្បោ និបជ្ជិតុ’’ន្តិ ឯវមាទីសុ (អ. និ. ៨.៨០) លេសោ. ‘‘កេវលកប្បំ វេឡុវនំ ឱភាសេត្វា’’តិ ឯវមាទីសុ (សំ. និ. ១.៩៤) សមន្តភាវោ. ឥធ បនស្ស សមន្តភាវត្ថោ អធិប្បេតោ. តស្មា កេវលកប្បំ ជេតវនន្តិ ឯត្ថ ‘‘អនវសេសំ សមន្តតោ ជេតវន’’ន្តិ ឯវមត្ថោ ទដ្ឋព្ពោ.

ឱភាសេត្វាតិ វត្ថាលង្ការសរីរសមុដ្ឋិតាយ អាភាយ ផរិត្វា, ចន្ទិមា វិយ សូរិយោ វិយ ច ឯកោភាសំ ឯកបជ្ជោតំ ករិត្វាតិ អត្ថោ.

យេនាតិ ភុម្មត្ថេ ករណវចនំ. យេន ភគវា តេនុបសង្កមីតិ តស្មា ‘‘យត្ថ ភគវា, តត្ថ ឧបសង្កមី’’តិ ឯវមេត្ថ អត្ថោ ទដ្ឋព្ពោ. យេន វា ការណេន ភគវា ទេវមនុស្សេហិ ឧបសង្កមិតព្ពោ, តេន ការណេន ឧបសង្កមីតិ ឯវមេត្ថ អត្ថោ ទដ្ឋព្ពោ. កេន ច ការណេន ភគវា ឧបសង្កមិតព្ពោ? នានប្បការគុណវិសេសាធិគមាធិប្បាយេន, សាទុផលូបភោគាធិប្បាយេន ទិជគណេហិ និច្ចផលិតមហារុក្ខោ វិយ. ឧបសង្កមីតិ ច គតាតិ វុត្តំ ហោតិ. ឧបសង្កមិត្វាតិ ឧបសង្កមនបរិយោសានទីបនំ. អថ វា ឯវំ គតា តតោ អាសន្នតរំ ឋានំ ភគវតោ សមីបសង្ខាតំ គន្ត្វាតិបិ វុត្តំ ហោតិ.

ឥទានិ យេនត្ថេន លោកេ អគ្គបុគ្គលស្ស ឧបដ្ឋានំ អាគតា, តំ បុច្ឆិតុកាមា ទសនខសមោធានសមុជ្ជលំ អញ្ជុលិំ សិរសិ បតិដ្ឋបេត្វា ឯកមន្តំ អដ្ឋាសិ. ឯកមន្តន្តិ ភាវនបុំសកនិទ្ទេសោ – ‘‘វិសមំ ចន្ទិមសូរិយា បរិវត្តន្តី’’តិអាទីសុ (អ. និ. ៤.៧០) វិយ. តស្មា យថា ឋិតា ឯកមន្តំ ឋិតា ហោតិ, តថា អដ្ឋាសីតិ ឯវមេត្ថ អត្ថោ ទដ្ឋព្ពោ. ភុម្មត្ថេ វា ឯតំ ឧបយោគវចនំ. អដ្ឋាសីតិ ឋានំ កប្បេសិ. បណ្ឌិតា ហិ ទេវមនុស្សា គរុដ្ឋានិយំ ឧបសង្កមិត្វា អាសនកុសលតាយ ឯកមន្តំ តិដ្ឋន្តិ, អយញ្ច ទេវោ តេសំ អញ្ញតរោ, តស្មា ឯកមន្តំ អដ្ឋាសិ.

កថំ ឋិតោ បន ឯកមន្តំ ឋិតោ ហោតីតិ? ឆ ឋានទោសេ វជ្ជេត្វា. សេយ្យថិទំ – អតិទូរំ, អច្ចាសន្នំ, ឧបរិវាតំ, ឧន្នតប្បទេសំ, អតិសម្មុខំ, អតិបច្ឆាតិ. អតិទូរេ ឋិតោ ហិ សចេ កថេតុកាមោ ហោតិ, ឧច្ចាសទ្ទេន កថេតព្ពំ ហោតិ. អច្ចាសន្នេ ឋិតោ សង្ឃដ្ដនំ ករោតិ. ឧបរិវាតេ ឋិតោ សរីរគន្ធេន ពាធតិ. ឧន្នតប្បទេសេ ឋិតោ អគារវំ បកាសេតិ. អតិសម្មុខា ឋិតោ សចេ ទដ្ឋុកាមោ ហោតិ, ចក្ខុនា ចក្ខុំ អាហច្ច ទដ្ឋព្ពំ ហោតិ. អតិបច្ឆា ឋិតោ សចេ ទដ្ឋុកាមោ ហោតិ, គីវំ បសារេត្វា ទដ្ឋព្ពំ ហោតិ. តស្មា អយម្បិ ឯតេ ឆ ឋានទោសេ វជ្ជេត្វា អដ្ឋាសិ. តេន វុត្តំ ‘‘ឯកមន្តំ អដ្ឋាសី’’តិ.

ឯតទវោចាតិ ឯតំ អវោច. កថំ នូតិ ការណបុច្ឆា. ភគវតោ ហិ តិណ្ណោឃភាវោ ទសសហស្សិលោកធាតុយា បាកដោ, តេនិមិស្សា ទេវតាយ តត្ថ កង្ខា នត្ថិ, ឥមិនា បន ការណេន ‘‘តិណ្ណោ’’តិ ន ជានាតិ, តេន សា តំ ការណំ បុច្ឆមានា ឯវមាហ.

មារិសាតិ ទេវតានំ បិយសមុទាចារវចនមេតំ. និទ្ទុក្ខាតិ វុត្តំ ហោតិ. យទិ ឯវំ ‘‘យទា ខោ តេ, មារិស, សង្កុនា សង្កុ ហទយេ សមាគច្ឆេយ្យ, អថ នំ ត្វំ ជានេយ្យាសិ ‘វស្សសហស្សំ មេ និរយេ បច្ចមានស្សា’’’តិ (ម. និ. ១.៥១២) ឥទំ វិរុជ្ឈតិ. ន ហិ នេរយិកសត្តោ និទ្ទុក្ខោ នាម ហោតិ. កិញ្ចាបិ ន និទ្ទុក្ខោ, រុឡ្ហីសទ្ទេន បន ឯវំ វុច្ចតិ. បុព្ពេ កិរ បឋមកប្បិកានំ និទ្ទុក្ខានំ សុខសមប្បិតានំ ឯស វោហារោ, អបរភាគេ ទុក្ខំ ហោតុ វា មា វា, រុឡ្ហីសទ្ទេន អយំ វោហារោ វុច្ចតេវ និប្បទុមាបិ និរុទកាបិ វា បោក្ខរណី បោក្ខរណី វិយ.

ឱឃមតរីតិ ឯត្ថ ចត្តារោ ឱឃា, កាមោឃោ ភវោឃោ ទិដ្ឋោឃោ អវិជ្ជោឃោតិ. តត្ថ បញ្ចសុ កាមគុណេសុ ឆន្ទរាគោ កាមោឃោ នាម. រូបារូបភវេសុ ឆន្ទរាគោ ឈាននិកន្តិ ច ភវោឃោ នាម. ទ្វាសដ្ឋិ ទិដ្ឋិយោ ទិដ្ឋោឃោ នាម. ចតូសុ សច្ចេសុ អញ្ញាណំ អវិជ្ជោឃោ នាម. តត្ថ កាមោឃោ អដ្ឋសុ លោភសហគតេសុ ចិត្តុប្បាទេសុ ឧប្បជ្ជតិ, ភវោឃោ ចតូសុ ទិដ្ឋិគតវិប្បយុត្តលោភសហគតេសុ ចិត្តុប្បាទេសុ ឧប្បជ្ជតិ, ទិដ្ឋោឃោ ចតូសុ ទិដ្ឋិគតសម្បយុត្តេសុ ចិត្តុប្បាទេសុ ឧប្បជ្ជតិ, អវិជ្ជោឃោ សព្ពាកុសលេសុ ឧប្បជ្ជតិ.

សព្ពោបិ ចេស អវហននដ្ឋេន រាសដ្ឋេន ច ឱឃោតិ វេទិតព្ពោ. អវហននដ្ឋេនាតិ អធោគមនដ្ឋេន. អយញ្ហិ អត្តនោ វសំ គតេ សត្តេ អធោ គមេតិ, និរយាទិភេទាយ ទុគ្គតិយំយេវ និព្ពត្តេតិ, ឧបរិភាវំ វា និព្ពានំ គន្តុំ អទេន្តោ អធោ តីសុ ភវេសុ ចតូសុ យោនីសុ បញ្ចសុ គតីសុ សត្តសុ វិញ្ញាណដ្ឋិតីសុ នវសុ សត្តាវាសេសុ ច គមេតីតិបិ អត្ថោ. រាសដ្ឋេនាតិ មហន្តដ្ឋេន. មហា ហេសោ កិលេសរាសិ អវីចិតោ បដ្ឋាយ យាវ ភវគ្គា បត្ថដោ, យទិទំ បញ្ចសុ កាមគុណេសុ ឆន្ទរាគោ នាម. សេសេសុបិ ឯសេវ នយោ. ឯវមយំ រាសដ្ឋេនាបិ ឱឃោតិ វេទិតព្ពោ. អតរីតិ ឥមំ ចតុព្ពិធម្បិ ឱឃំ កេន នុ ត្វំ, មារិស, ការណេន តិណ្ណោតិ បុច្ឆតិ.

អថស្សា ភគវា បញ្ហំ វិស្សជ្ជេន្តោ អប្បតិដ្ឋំ ខ្វាហន្តិអាទិមាហ. តត្ថ អប្បតិដ្ឋន្តិ អប្បតិដ្ឋហន្តោ. អនាយូហន្តិ អនាយូហន្តោ, អវាយមន្តោតិ អត្ថោ. ឥតិ ភគវា គូឡ្ហំ បដិច្ឆន្នំ កត្វា បញ្ហំ កថេសិ. ទេវតាបិ នំ សុត្វា ‘‘ពាហិរកំ តាវ ឱឃំ តរន្តា នាម ឋាតព្ពដ្ឋានេ តិដ្ឋន្តា តរិតព្ពដ្ឋានេ អាយូហន្តា តរន្តិ, អយំ បន អវីចិតោ យាវ ភវគ្គា បត្ថដំ កិលេសោឃំ កិលេសរាសិំ អប្បតិដ្ឋហន្តោ អនាយូហន្តោ អតរិន្តិ អាហ. កិំ នុ ខោ ឯតំ? កថំ នុ ខោ ឯត’’ន្តិ? វិមតិំ បក្ខន្តា បញ្ហស្ស អត្ថំ ន អញ្ញាសិ.

កិំ បន ភគវតា យថា សត្តា ន ជានន្តិ, ឯវំ កថនត្ថាយ បារមិយោ បូរេត្វា សព្ពញ្ញុតា បដិវិទ្ធាតិ? ន ឯតទត្ថាយ បដិវិទ្ធា. ទ្វេ បន ភគវតោ ទេសនា និគ្គហមុខេន ច អនុគ្គហមុខេន ច. តត្ថ យេ បណ្ឌិតមានិនោ ហោន្តិ អញ្ញាតេបិ ញាតសញ្ញិនោ បញ្ចសតា ព្រាហ្មណបព្ពជិតា វិយ, តេសំ មាននិគ្គហត្ថំ យថា ន ជានន្តិ, ឯវំ មូលបរិយាយាទិសទិសំ ធម្មំ ទេសេតិ. អយំ និគ្គហមុខេន ទេសនា. វុត្តម្បិ ចេតំ ‘‘និគ្គយ្ហ និគ្គយ្ហាហំ, អានន្ទ, វក្ខាមិ, បវយ្ហ បវយ្ហ, អានន្ទ, វក្ខាមិ, យោ សារោ, សោ ឋស្សតី’’តិ (ម. និ. ៣.១៩៦). យេ បន ឧជុកា សិក្ខាកាមា, តេសំ សុវិញ្ញេយ្យំ កត្វា អាកង្ខេយ្យសុត្តាទិសទិសំ ធម្មំ ទេសេតិ, ‘‘អភិរម, តិស្ស, អភិរម, តិស្ស, អហមោវាទេន អហមនុគ្គហេន អហមនុសាសនិយា’’តិ (សំ. និ. ៣.៨៤) ច នេ សមស្សាសេតិ. អយំ អនុគ្គហមុខេន ទេសនា.

អយំ បន ទេវបុត្តោ មានត្ថទ្ធោ បណ្ឌិតមានី, ឯវំ កិរស្ស អហោសិ – អហំ ឱឃំ ជានាមិ, តថាគតស្ស ឱឃតិណ្ណភាវំ ជានាមិ, ‘‘ឥមិនា បន ការណេន តិណ្ណោ’’តិ ឯត្តកមត្តំ ន ជានាមិ. ឥតិ មយ្ហំ ញាតមេវ ពហុ, អប្បំ អញ្ញាតំ, តមហំ កថិតមត្តមេវ ជានិស្សាមិ. កិញ្ហិ នាម តំ ភគវា វទេយ្យ, យស្សាហំ អត្ថំ ន ជានេយ្យន្តិ. អថ សត្ថា ‘‘អយំ កិលិដ្ឋវត្ថំ វិយ រង្គជាតំ អភព្ពោ ឥមំ មានំ អប្បហាយ ទេសនំ សម្បដិច្ឆិតុំ, មាននិគ្គហំ តាវស្ស កត្វា បុន នីចចិត្តេន បុច្ឆន្តស្ស បកាសេស្សាមី’’តិ បដិច្ឆន្នំ កត្វា បញ្ហំ កថេសិ. សោបិ និហតមានោ អហោសិ, សា ចស្ស និហតមានតា ឧត្តរិបញ្ហបុច្ឆនេនេវ វេទិតព្ពា. តស្ស បន បញ្ហបុច្ឆនស្ស អយមត្ថោ – កថំ បន ត្វំ, មារិស, អប្បតិដ្ឋំ អនាយូហំ ឱឃមតរិ, យថាហំ ជានាមិ, ឯវំ មេ កថេហីតិ.

អថស្ស ភគវា កថេន្តោ យទាស្វាហន្តិអាទិមាហ. តត្ថ យទា ស្វាហន្តិ យស្មិំ កាលេ អហំ. សុការោ និបាតមត្តំ. យថា ច ឯត្ថ, ឯវំ សព្ពបទេសុ. សំសីទាមីតិ បដិច្ឆន្នំ កត្វា អតរន្តោ តត្ថេវ ឱសីទាមិ. និព្ពុយ្ហាមីតិ ឋាតុំ អសក្កោន្តោ អតិវត្តាមិ. ឥតិ ឋានេ ច វាយាមេ ច ទោសំ ទិស្វា អតិដ្ឋន្តោ អវាយមន្តោ ឱឃមតរិន្តិ ឯវំ ភគវតា បញ្ហោ កថិតោ. ទេវតាយបិ បដិវិទ្ធោ, ន បន បាកដោ, តស្ស បាកដីករណត្ថំ សត្ត ទុកា ទស្សិតា. កិលេសវសេន ហិ សន្តិដ្ឋន្តោ សំសីទតិ នាម, អភិសង្ខារវសេន អាយូហន្តោ និព្ពុយ្ហតិ នាម. តណ្ហាទិដ្ឋីហិ វា សន្តិដ្ឋន្តោ សំសីទតិ នាម, អវសេសកិលេសានញ្ចេវ អភិសង្ខារានញ្ច វសេន អាយូហន្តោ និព្ពុយ្ហតិ នាម. តណ្ហាវសេន វា សន្តិដ្ឋន្តោ សំសីទតិ នាម, ទិដ្ឋិវសេន អាយូហន្តោ និព្ពុយ្ហតិ នាម. សស្សតទិដ្ឋិយា វា សន្តិដ្ឋន្តោ សំសីទតិ នាម, ឧច្ឆេទទិដ្ឋិយា អាយូហន្តោ និព្ពុយ្ហតិ នាម. ឱលីយនាភិនិវេសា ហិ ភវទិដ្ឋិ, អតិធាវនាភិនិវេសា វិភវទិដ្ឋិ. លីនវសេន វា សន្តិដ្ឋន្តោ សំសីទតិ នាម, ឧទ្ធច្ចវសេន អាយូហន្តោ និព្ពុយ្ហតិ នាម. តថា កាមសុខល្លិកានុយោគវសេន សន្តិដ្ឋន្តោ សំសីទតិ នាម, អត្តកិលមថានុយោគវសេន អាយូហន្តោ និព្ពុយ្ហតិ នាម. សព្ពាកុសលាភិសង្ខារវសេន សន្តិដ្ឋន្តោ សំសីទតិ នាម, សព្ពលោកិយកុសលាភិសង្ខារវសេន អាយូហន្តោ និព្ពុយ្ហតិ នាម. វុត្តម្បិ ចេតំ – ‘‘សេយ្យថាបិ, ចុន្ទ, យេ កេចិ អកុសលា ធម្មា, សព្ពេ តេ អធោភាគង្គមនីយា, យេ កេចិ កុសលា ធម្មា, សព្ពេ តេ ឧបរិភាគង្គមនីយា’’តិ (ម. និ. ១.៨៦).

ឥមំ បញ្ហវិស្សជ្ជនំ សុត្វាវ ទេវតា សោតាបត្តិផលេ បតិដ្ឋាយ តុដ្ឋា បសន្នា អត្តនោ តុដ្ឋិញ្ច បសាទញ្ច បកាសយន្តី ចិរស្សំ វតាតិ គាថមាហ. តត្ថ ចិរស្សន្តិ ចិរស្ស កាលស្ស អច្ចយេនាតិ អត្ថោ. អយំ កិរ ទេវតា កស្សបសម្មាសម្ពុទ្ធំ ទិស្វា តស្ស បរិនិព្ពានតោ បដ្ឋាយ អន្តរា អញ្ញំ ពុទ្ធំ ន ទិដ្ឋបុព្ពា, តស្មា អជ្ជ ភគវន្តំ ទិស្វា ឯវមាហ. កិំ បនិមាយ ទេវតាយ ឥតោ បុព្ពេ សត្ថា ន ទិដ្ឋបុព្ពោតិ. ទិដ្ឋបុព្ពោ វា ហោតុ អទិដ្ឋបុព្ពោ វា, ទស្សនំ ឧបាទាយ ឯវំ វត្តុំ វដ្ដតិ. ព្រាហ្មណន្តិ ពាហិតបាបំ ខីណាសវព្រាហ្មណំ. បរិនិព្ពុតន្តិ កិលេសនិព្ពានេន និព្ពុតំ. លោកេតិ សត្តលោកេ. វិសត្តិកន្តិ រូបាទីសុ អារម្មណេសុ អាសត្តវិសត្តតាទីហិ ការណេហិ វិសត្តិកា វុច្ចតិ តណ្ហា, តំ វិសត្តិកំ អប្បតិដ្ឋមានំ អនាយូហមានំ តិណ្ណំ និត្តិណ្ណំ ឧត្តិណ្ណំ ចិរស្សំ វត ខីណាសវព្រាហ្មណំ បស្សាមីតិ អត្ថោ.

សមនុញ្ញោ សត្ថា អហោសីតិ តស្សា ទេវតាយ វចនំ ចិត្តេនេវ សមនុមោទិ, ឯកជ្ឈាសយោ អហោសិ. អន្តរធាយីតិ អភិសង្ខតកាយំ ជហិត្វា អត្តនោ បកតិឧបាទិណ្ណកកាយស្មិំយេវ ឋត្វា លទ្ធាសា លទ្ធបតិដ្ឋា ហុត្វា ទសពលំ គន្ធេហិ ច មាលេហិ ច បូជេត្វា អត្តនោ ភវនំយេវ អគមាសីតិ.

ឱឃតរណសុត្តវណ្ណនា និដ្ឋិតា.

២. និមោក្ខសុត្តវណ្ណនា

២. ឥទានិ ទុតិយសុត្តតោ បដ្ឋាយ បឋមមាគតញ្ច ឧត្តានត្ថញ្ច បហាយ យំ យំ អនុត្តានំ, តំ តទេវ វណ្ណយិស្សាម. ជានាសិ នោតិ ជានាសិ នុ. និមោក្ខន្តិអាទីនិ មគ្គាទីនំ នាមានិ. មគ្គេន ហិ សត្តា កិលេសពន្ធនតោ និមុច្ចន្តិ, តស្មា មគ្គោ សត្តានំ និមោក្ខោតិ វុត្តោ. ផលក្ខណេ បន តេ កិលេសពន្ធនតោ បមុត្តា, តស្មា ផលំ សត្តានំ បមោក្ខោតិ វុត្តំ. និព្ពានំ បត្វា សត្តានំ សព្ពទុក្ខំ វិវិច្ចតិ, តស្មា និព្ពានំ វិវេកោតិ វុត្តំ. សព្ពានិ វា ឯតានិ និព្ពានស្សេវ នាមានិ. និព្ពានញ្ហិ បត្វា សត្តា សព្ពទុក្ខតោ និមុច្ចន្តិ បមុច្ចន្តិ វិវិច្ចន្តិ, តស្មា តទេវ ‘‘និមោក្ខោ បមោក្ខោ វិវេកោ’’តិ វុត្តំ. ជានាមិ ខ្វាហន្តិ ជានាមិ ខោ អហំ. អវធារណត្ថោ ខោការោ. អហំ ជានាមិយេវ. សត្តានំ និមោក្ខាទិជាននត្ថមេវ ហិ មយា សមតិំស បារមិយោ បូរេត្វា សព្ពញ្ញុតញ្ញាណំ បដិវិទ្ធន្តិ សីហនាទំ នទតិ. ពុទ្ធសីហនាទំ នាម កិរ ឯតំ សុត្តំ.

នន្ទីភវបរិក្ខយាតិ នន្ទីមូលកស្ស កម្មភវស្ស បរិក្ខយេន. នន្ទិយា ច ភវស្ស ចាតិបិ វដ្ដតិ. តត្ថ ហិ បុរិមនយេ នន្ទីភវេន តិវិធកម្មាភិសង្ខារវសេន សង្ខារក្ខន្ធោ គហិតោ, សញ្ញាវិញ្ញាណេហិ តំសម្បយុត្តា ច ទ្វេ ខន្ធា. តេហិ បន តីហិ ខន្ធេហិ សម្បយុត្តា វេទនា តេសំ គហណេន គហិតាវាតិ អនុបាទិណ្ណកានំ ចតុន្នំ អរូបក្ខន្ធានំ អប្បវត្តិវសេន សឧបាទិសេសំ និព្ពានំ កថិតំ ហោតិ. វេទនានំ និរោធា ឧបសមាតិ ឧបាទិណ្ណកវេទនានំ និរោធេន ច ឧបសមេន ច. តត្ថ វេទនាគហណេន តំសម្បយុត្តា តយោ ខន្ធា គហិតាវ ហោន្តិ, តេសំ វត្ថារម្មណវសេន រូបក្ខន្ធោបិ. ឯវំ ឥមេសំ ឧបាទិណ្ណកានំ បញ្ចន្នំ ខន្ធានំ អប្បវត្តិវសេន អនុបាទិសេសំ និព្ពានំ កថិតំ ហោតិ. ទុតិយនយេ បន នន្ទិគ្គហណេន សង្ខារក្ខន្ធោ គហិតោ, ភវគ្គហណេន ឧបបត្តិភវសង្ខាតោ រូបក្ខន្ធោ, សញ្ញាទីហិ សរូបេនេវ តយោ ខន្ធា. ឯវំ ឥមេសំ បញ្ចន្នំ ខន្ធានំ អប្បវត្តិវសេន និព្ពានំ កថិតំ ហោតីតិ វេទិតព្ពំ. ឥមមេវ ច នយំ ចតុនិកាយិកភណ្ឌិកត្ថេរោ រោចេតិ. ឥតិ និព្ពានវសេនេវ ភគវា ទេសនំ និដ្ឋាបេសីតិ.

និមោក្ខសុត្តវណ្ណនា និដ្ឋិតា.

៣. ឧបនីយសុត្តវណ្ណនា

៣. តតិយេ ឧបនីយតីតិ បរិក្ខីយតិ និរុជ្ឈតិ, ឧបគច្ឆតិ វា, អនុបុព្ពេន មរណំ ឧបេតីតិ អត្ថោ. យថា វា គោបាលេន គោគណោ នីយតិ, ឯវំ ជរាយ មរណសន្តិកំ ឧបនីយតីតិ អត្ថោ. ជីវិតន្តិ ជីវិតិន្ទ្រិយំ. អប្បន្តិ បរិត្តំ ថោកំ. តស្ស ទ្វីហាការេហិ បរិត្តតា វេទិតព្ពា សរសបរិត្តតាយ ច ខណបរិត្តតាយ ច. សរសបរិត្តតាយបិ ហិ ‘‘យោ, ភិក្ខវេ, ចិរំ ជីវតិ, សោ វស្សសតំ អប្បំ វា ភិយ្យោ’’តិ (ទី. និ. ២.៧; សំ. និ. ២.១៤៣) វចនតោ បរិត្តំ. ខណបរិត្តតាយបិ. បរមត្ថតោ ហិ អតិបរិត្តោ សត្តានំ ជីវិតក្ខណោ ឯកចិត្តប្បវត្តិមត្តោយេវ. យថា នាម រថចក្កំ បវត្តមានម្បិ ឯកេនេវ នេមិប្បទេសេន បវត្តតិ, តិដ្ឋមានម្បិ ឯកេនេវ តិដ្ឋតិ, ឯវមេវំ ឯកចិត្តក្ខណិកំ សត្តានំ ជីវិតំ, តស្មិំ ចិត្តេ និរុទ្ធមត្តេ សត្តោ និរុទ្ធោតិ វុច្ចតិ. យថាហ – អតីតេ ចិត្តក្ខណេ ជីវិត្ថ ន ជីវតិ ន ជីវិស្សតិ, អនាគតេ ចិត្តក្ខណេ ជីវិស្សតិ ន ជីវតិ ន ជីវិត្ថ, បច្ចុប្បន្នេ ចិត្តក្ខណេ ជីវតិ ន ជីវិត្ថ ន ជីវិស្សតិ.

‘‘ជីវិតំ អត្តភាវោ ច, សុខទុក្ខា ច កេវលា;

ឯកចិត្តសមាយុត្តា, លហុសោ វត្តតេ ខណោ.

‘‘យេ និរុទ្ធា មរន្តស្ស, តិដ្ឋមានស្ស វា ឥធ;

សព្ពេបិ សទិសា ខន្ធា, គតា អប្បដិសន្ធិកា.

‘‘អនិព្ពត្តេន ន ជាតោ, បច្ចុប្បន្នេន ជីវតិ;

ចិត្តភង្គា មតោ លោកោ, បញ្ញត្តិ បរមត្ថិយា’’តិ. (មហានិ. ១០);

ជរូបនីតស្សាតិ ជរំ ឧបគតស្ស, ជរាយ វា មរណសន្តិកំ ឧបនីតស្ស. ន សន្តិ តាណាតិ តាណំ លេណំ សរណំ ភវិតុំ សមត្ថា នាម កេចិ នត្ថិ. ឯតំ ភយន្តិ ឯតំ ជីវិតិន្ទ្រិយស្ស មរណូបគមនំ, អាយុបរិត្តតា, ជរូបនីតស្ស តាណាភាវោតិ តិវិធំ ភយំ ភយវត្ថុ ភយការណន្តិ អត្ថោ. បុញ្ញានិ កយិរាថ សុខាវហានីតិ វិញ្ញូ បុរិសោ សុខាវហានិ សុខទាយកានិ បុញ្ញានិ ករេយ្យ. ឥតិ ទេវតា រូបាវចរជ្ឈានំ សន្ធាយ បុព្ពចេតនំ អបរចេតនំ មុញ្ចចេតនញ្ច គហេត្វា ពហុវចនវសេន ‘‘បុញ្ញានី’’តិ អាហ. ឈានស្សាទំ ឈាននិកន្តិំ ឈានសុខញ្ច គហេត្វា ‘‘សុខាវហានី’’តិ អាហ. តស្សា កិរ ទេវតាយ សយំ ទីឃាយុកដ្ឋានេ ព្រហ្មលោកេ និព្ពត្តត្តា ហេដ្ឋា កាមាវចរទេវេសុ បរិត្តាយុកដ្ឋានេ ចវមានេ ឧបបជ្ជមានេ ច ថុល្លផុសិតកេ វុដ្ឋិបាតសទិសេ សត្តេ ទិស្វា ឯតទហោសិ ‘‘អហោវតិមេ សត្តា ឈានំ ភាវេត្វា អបរិហីនជ្ឈានា កាលំ កត្វា ព្រហ្មលោកេ ឯកកប្ប-ទ្វេកប្ប-ចតុកប្ប-អដ្ឋកប្ប-សោឡសកប្ប-ទ្វត្តិំសកប្ប-ចតុសដ្ឋិកប្បប្បមាណំ អទ្ធានំ តិដ្ឋេយ្យុ’’ន្តិ. តស្មា ឯវមាហ.

អថ ភគវា – ‘‘អយំ ទេវតា អនិយ្យានិកំ វដ្ដកថំ កថេតី’’តិ វិវដ្ដមស្សា ទស្សេន្តោ ទុតិយំ គាថមាហ. តត្ថ លោកាមិសន្តិ ទ្វេ លោកាមិសា បរិយាយេន ច និប្បរិយាយេន ច. បរិយាយេន តេភូមកវដ្ដំ លោកាមិសំ, និប្បរិយាយេន ចត្តារោ បច្ចយា. ឥធ បរិយាយលោកាមិសំ អធិប្បេតំ. និប្បរិយាយលោកាមិសម្បិ វដ្ដតិយេវ. សន្តិបេក្ខោតិ និព្ពានសង្ខាតំ អច្ចន្តសន្តិំ បេក្ខន្តោ ឥច្ឆន្តោ បត្ថយន្តោតិ.

ឧបនីយសុត្តវណ្ណនា និដ្ឋិតា.

៤. អច្ចេន្តិសុត្តវណ្ណនា

៤. ចតុត្ថេ អច្ចេន្តីតិ អតិក្កមន្តិ. កាលាតិ បុរេភត្តាទយោ កាលា. តរយន្តិ រត្តិយោតិ រត្តិយោ អតិក្កមមានា បុគ្គលំ មរណូបគមនាយ តរយន្តិ សីឃំ សីឃំ គមយន្តិ. វយោគុណាតិ បឋមមជ្ឈិមបច្ឆិមវយានំ គុណា, រាសយោតិ អត្ថោ. ‘‘អនុជានាមិ, ភិក្ខវេ, អហតានំ វត្ថានំ ទិគុណំ សង្ឃាដិ’’ន្តិ (មហាវ. ៣៤៨) ឯត្ថ ហិ បដលដ្ឋោ គុណដ្ឋោ. ‘‘សតគុណា ទក្ខិណា បាដិកង្ខិតព្ពា’’តិ (ម. និ. ៣.៣៧៩) ឯត្ថ អានិសំសដ្ឋោ. ‘‘អន្តំ អន្តគុណ’’ន្តិ ឯត្ថ កោដ្ឋាសដ្ឋោ. ‘‘កយិរា មាលាគុណេ ពហូ’’តិ (ធ. ប. ៥៣) ឯត្ថ រាសដ្ឋោ. ‘‘បញ្ច កាមគុណា’’តិ ឯត្ថ ពន្ធនដ្ឋោ. ឥធ បន រាសដ្ឋោ គុណដ្ឋោ. តស្មា វយោគុណាតិ វយោរាសយោ វេទិតព្ពា. អនុបុព្ពំ ជហន្តីតិ អនុបដិបាដិយា បុគ្គលំ ជហន្តិ. មជ្ឈិមវយេ ឋិតំ ហិ បឋមវយោ ជហតិ, បច្ឆិមវយេ ឋិតំ ទ្វេ បឋមមជ្ឈិមា ជហន្តិ, មរណក្ខណេ បន តយោបិ វយា ជហន្តេវ. ឯតំ ភយន្តិ ឯតំ កាលានំ អតិក្កមនំ, រត្តិទិវានំ តរិតភាវោ, វយោគុណានំ ជហនភាវោតិ តិវិធំ ភយំ. សេសំ បុរិមសទិសមេវាតិ.

អច្ចេន្តិសុត្តវណ្ណនា និដ្ឋិតា.

៥. កតិឆិន្ទសុត្តវណ្ណនា

៥. បញ្ចមេ កតិ ឆិន្ទេតិ ឆិន្ទន្តោ កតិ ឆិន្ទេយ្យ. សេសបទេសុបិ ឯសេវ នយោ. ឯត្ថ ច ‘‘ឆិន្ទេ ជហេ’’តិ អត្ថតោ ឯកំ. គាថាពន្ធស្ស បន មដ្ឋភាវត្ថំ អយំ ទេវតា សទ្ទបុនរុត្តិំ វជ្ជយន្តី ឯវមាហ. កតិ សង្គាតិគោតិ កតិ សង្គេ អតិគតោ, អតិក្កន្តោតិ អត្ថោ. សង្គាតិកោតិបិ បាឋោ, អយមេវ អត្ថោ. បញ្ច ឆិន្ទេតិ ឆិន្ទន្តោ បញ្ច ឱរម្ភាគិយសំយោជនានិ ឆិន្ទេយ្យ. បញ្ច ជហេតិ ជហន្តោ បញ្ចុទ្ធម្ភាគិយសំយោជនានិ ជហេយ្យ. ឥធាបិ ឆិន្ទនញ្ច ជហនញ្ច អត្ថតោ ឯកមេវ, ភគវា បន ទេវតាយ អារោបិតវចនានុរូបេនេវ ឯវមាហ. អថ វា បាទេសុ ពទ្ធបាសសកុណោ វិយ បញ្ចោរម្ភាគិយសំយោជនានិ ហេដ្ឋា អាកឌ្ឍមានាការានិ ហោន្តិ, តានិ អនាគាមិមគ្គេន ឆិន្ទេយ្យាតិ វទតិ. ហត្ថេហិ គហិតរុក្ខសាខា វិយ បញ្ចុទ្ធម្ភាគិយសំយោជនានិ ឧបរិ អាកឌ្ឍមានាការានិ ហោន្តិ, តានិ អរហត្តមគ្គេន ជហេយ្យាតិ វទតិ. បញ្ច ចុត្តរិ ភាវយេតិ ឯតេសំ សំយោជនានំ ឆិន្ទនត្ថាយ ចេវ បហានត្ថាយ ច ឧត្តរិ អតិរេកំ វិសេសំ ភាវេន្តោ សទ្ធាបញ្ចមានិ ឥន្ទ្រិយានិ ភាវេយ្យាតិ អត្ថោ. បញ្ច សង្គាតិគោតិ រាគសង្គោ ទោសសង្គោ មោហសង្គោ មានសង្គោ ទិដ្ឋិសង្គោតិ ឥមេ បញ្ច សង្គេ អតិក្កន្តោ. ឱឃតិណ្ណោតិ វុច្ចតីតិ ចតុរោឃតិណ្ណោតិ កថីយតិ. ឥមាយ បន គាថាយ បញ្ចិន្ទ្រិយានិ លោកិយលោកុត្តរានិ កថិតានីតិ.

កតិឆិន្ទសុត្តវណ្ណនា និដ្ឋិតា.

៦. ជាគរសុត្តវណ្ណនា

៦. ឆដ្ឋេ ជាគរតន្តិ ជាគរន្តានំ. បញ្ច ជាគរតន្តិ វិស្សជ្ជនគាថាយំ បន សទ្ធាទីសុ បញ្ចសុ ឥន្ទ្រិយេសុ ជាគរន្តេសុ បញ្ច នីវរណា សុត្តា នាម. កស្មា? យស្មា តំសមង្គីបុគ្គលោ យត្ថ កត្ថចិ និសិន្នោ វា ឋិតោ វា អរុណំ ឧដ្ឋបេន្តោបិ បមាទតាយ អកុសលសមង្គិតាយ សុត្តោ នាម ហោតិ. ឯវំ សុត្តេសុ បញ្ចសុ នីវរណេសុ បញ្ចិន្ទ្រិយានិ ជាគរានិ នាម. កស្មា? យស្មា តំសមង្គីបុគ្គលោ យត្ថ កត្ថចិ និបជ្ជិត្វា និទ្ទាយន្តោបិ អប្បមាទតាយ កុសលសមង្គិតាយ ជាគរោ នាម ហោតិ. បញ្ចហិ បន នីវរណេហេវ កិលេសរជំ អាទិយតិ គណ្ហាតិ បរាមសតិ. បុរិមា ហិ កាមច្ឆន្ទាទយោ បច្ឆិមានំ បច្ចយា ហោន្តីតិ បញ្ចហិ ឥន្ទ្រិយេហិ បរិសុជ្ឈតីតិ អយមត្ថោ វេទិតព្ពោ. ឥធាបិ បញ្ចិន្ទ្រិយានិ លោកិយលោកុត្តរានេវ កថិតានីតិ.

ជាគរសុត្តវណ្ណនា និដ្ឋិតា.

៧. អប្បដិវិទិតសុត្តវណ្ណនា

៧. សត្តមេ ធម្មាតិ ចតុសច្ចធម្មា. អប្បដិវិទិតាតិ ញាណេន អប្បដិវិទ្ធា. បរវាទេសូតិ ទ្វាសដ្ឋិទិដ្ឋិគតវាទេសុ. តេ ហិ ឥតោ បរេសំ តិត្ថិយានំ វាទត្តា បរវាទា នាម. នីយរេតិ អត្តនោ ធម្មតាយបិ គច្ឆន្តិ, បរេនបិ នីយន្តិ. តត្ថ សយមេវ សស្សតាទីនិ គណ្ហន្តា គច្ឆន្តិ នាម, បរស្ស វចនេន តានិ គណ្ហន្តា នីយន្តិ នាម. កាលោ តេសំ បពុជ្ឈិតុន្តិ តេសំ បុគ្គលានំ បពុជ្ឈិតុំ អយំ កាលោ. លោកស្មិញ្ហិ ពុទ្ធោ ឧប្បន្នោ, ធម្មោ ទេសិយតិ, សង្ឃោ សុប្បដិបន្នោ, បដិបទា ភទ្ទិកា, ឥមេ ច បន មហាជនា វដ្ដេ សុត្តា នប្បពុជ្ឈន្តីតិ ទេវតា អាហ. សម្ពុទ្ធាតិ សម្មា ហេតុនា ការណេន ពុទ្ធា. ចត្តារោ ហិ ពុទ្ធា – សព្ពញ្ញុពុទ្ធោ, បច្ចេកពុទ្ធោ, ចតុសច្ចពុទ្ធោ, សុតពុទ្ធោតិ. តត្ថ សមតិំសបារមិយោ បូរេត្វា សម្មាសម្ពោធិំ បត្តោ សព្ពញ្ញុពុទ្ធោ នាម. កប្បសតសហស្សាធិកានិ ទ្វេ អសង្ខ្យេយ្យានិ បារមិយោ បូរេត្វា សយម្ភុតំ បត្តោ បច្ចេកពុទ្ធោ នាម. អវសេសា ខីណាសវា ចតុសច្ចពុទ្ធា នាម. ពហុស្សុតោ សុតពុទ្ធោ នាម. ឥមស្មិំ អត្ថេ តយោបិ បុរិមា វដ្ដន្តិ. សម្មទញ្ញាតិ សម្មា ហេតុនា ការណេន ជានិត្វា. ចរន្តិ វិសមេ សមន្តិ វិសមេ វា លោកសន្និវាសេ វិសមេ វា សត្តនិកាយេ វិសមេ វា កិលេសជាតេ សមំ ចរន្តីតិ.

អប្បដិវិទិតសុត្តវណ្ណនា និដ្ឋិតា.

៨. សុសម្មុដ្ឋសុត្តវណ្ណនា

៨. អដ្ឋមេ សុសម្មុដ្ឋាតិ បញ្ញាយ អប្បដិវិទ្ធភាវេនេវ សុនដ្ឋា. យថា ហិ ទ្វេ ខេត្តានិ កសិត្វា, ឯកំ វបិត្វា, ពហុធញ្ញំ អធិគតស្ស អវាបិតខេត្តតោ អលទ្ធំ សន្ធាយ ‘‘ពហុំ មេ ធញ្ញំ នដ្ឋ’’ន្តិ វទន្តោ អលទ្ធមេវ ‘‘នដ្ឋ’’ន្តិ វទតិ, ឯវមិធាបិ អប្បដិវិទិតាវ សុសម្មុដ្ឋា នាម. អសម្មុដ្ឋាតិ បញ្ញាយ បដិវិទ្ធភាវេនេវ អនដ្ឋា. សេសំ បុរិមសទិសមេវាតិ.

សុសម្មុដ្ឋសុត្តវណ្ណនា និដ្ឋិតា.

៩. មានកាមសុត្តវណ្ណនា

៩. នវមេ មានកាមស្សាតិ មានំ កាមេន្តស្ស ឥច្ឆន្តស្ស. ទមោតិ ឯវរូបស្ស បុគ្គលស្ស សមាធិបក្ខិកោ ទមោ នត្ថីតិ វទតិ. ‘‘សច្ចេន ទន្តោ ទមសា ឧបេតោ, វេទន្តគូ វុសិតព្រហ្មចរិយោ’’តិ (សំ. និ. ១.១៩៥) ឯត្ថ ហិ ឥន្ទ្រិយសំវរោ ទមោតិ វុត្តោ. ‘‘យទិ សច្ចា ទមា ចាគា, ខន្ត្យា ភិយ្យោធ វិជ្ជតី’’តិ (សំ. និ. ១.២៤៦; សុ. និ. ១៩១) ឯត្ថ បញ្ញា. ‘‘ទានេន ទមេន សំយមេន សច្ចវជ្ជេន អត្ថិ បុញ្ញំ, អត្ថិ បុញ្ញស្ស អាគមោ’’តិ (សំ. និ. ៤.៣៦៥) ឯត្ថ ឧបោសថកម្មំ. ‘‘សក្ខិស្សសិ ខោ ត្វំ, បុណ្ណ, ឥមិនា ទមូបសមេន សមន្នាគតោ សុនាបរន្តស្មិំ ជនបទេ វិហរិតុ’’ន្តិ (សំ. និ. ៤.៨៨; ម. និ. ៣.៣៩៦) ឯត្ថ អធិវាសនខន្តិ. ឥមស្មិំ បន សុត្តេ ទមោតិ សមាធិបក្ខិកធម្មានំ ឯតំ នាមំ. តេនេវាហ – ‘‘ន មោនមត្ថិ អសមាហិតស្សា’’តិ. តត្ថ មោនន្តិ ចតុមគ្គញាណំ, តញ្ហិ មុនាតីតិ មោនំ, ចតុសច្ចធម្មេ ជានាតីតិ អត្ថោ. មច្ចុធេយ្យស្សាតិ តេភូមកវដ្ដស្ស. តញ្ហិ មច្ចុនោ បតិដ្ឋានដ្ឋេន មច្ចុធេយ្យន្តិ វុច្ចតិ. បារន្តិ តស្សេវ បារំ និព្ពានំ. តរេយ្យាតិ បដិវិជ្ឈេយ្យ បាបុណេយ្យ វា. ឥទំ វុត្តំ ហោតិ – ឯកោ អរញ្ញេ វិហរន្តោ បមត្តោ បុគ្គលោ មច្ចុធេយ្យស្ស បារំ ន តរេយ្យ ន បដិវិជ្ឈេយ្យ ន បាបុណេយ្យាតិ.

មានំ បហាយាតិ អរហត្តមគ្គេន នវវិធមានំ បជហិត្វា. សុសមាហិតត្តោតិ ឧបចារប្បនាសមាធីហិ សុដ្ឋុ សមាហិតត្តោ. សុចេតសោតិ ញាណសម្បយុត្តតាយ សុន្ទរចិត្តោ. ញាណវិប្បយុត្តចិត្តេន ហិ សុចេតសោតិ ន វុច្ចតិ, តស្មា ញាណសម្បយុត្តេន សុចេតសោ ហុត្វាតិ អត្ថោ. សព្ពធិ វិប្បមុត្តោតិ សព្ពេសុ ខន្ធាយតនាទីសុ វិប្បមុត្តោ ហុត្វា. តរេយ្យាតិ ឯត្ថ តេភូមកវដ្ដំ សមតិក្កមន្តោ និព្ពានំ បដិវិជ្ឈន្តោ តរតីតិ បដិវេធតរណំ នាម វុត្តំ. ឥតិ ឥមាយ គាថាយ តិស្សោ សិក្ខា កថិតា ហោន្តិ. កថំ – មានោ នាមាយំ សីលភេទនោ, តស្មា ‘‘មានំ បហាយា’’តិ ឥមិនា អធិសីលសិក្ខា កថិតា ហោតិ. ‘‘សុសមាហិតត្តោ’’តិ ឥមិនា អធិចិត្តសិក្ខា. ‘‘សុចេតសោ’’តិ ឯត្ថ ចិត្តេន បញ្ញា ទស្សិតា, តស្មា ឥមិនា អធិបញ្ញាសិក្ខា កថិតា. អធិសីលញ្ច នាម សីលេ សតិ ហោតិ, អធិចិត្តំ ចិត្តេ សតិ, អធិបញ្ញា បញ្ញាយ សតិ. តស្មា សីលំ នាម បញ្ចបិ ទសបិ សីលានិ, បាតិមោក្ខសំវរោ អធិសីលំ នាមាតិ វេទិតព្ពំ. អដ្ឋ សមាបត្តិយោ ចិត្តំ, វិបស្សនាបាទកជ្ឈានំ អធិចិត្តំ. កម្មស្សកតញាណំ បញ្ញា, វិបស្សនា អធិបញ្ញា. អនុប្បន្នេបិ ហិ ពុទ្ធុប្បាទេ បវត្តតីតិ បញ្ចសីលំ ទសសីលំ សីលមេវ, បាតិមោក្ខសំវរសីលំ ពុទ្ធុប្បាទេយេវ បវត្តតីតិ អធិសីលំ. ចិត្តបញ្ញាសុបិ ឯសេវ នយោ. អបិច និព្ពានំ បត្ថយន្តេន សមាទិន្នំ បញ្ចសីលម្បិ ទសសីលម្បិ អធិសីលមេវ. សមាបន្នា អដ្ឋ សមាបត្តិយោបិ អធិចិត្តមេវ. សព្ពម្បិ វា លោកិយសីលំ សីលមេវ, លោកុត្តរំ អធិសីលំ. ចិត្តបញ្ញាសុបិ ឯសេវ នយោតិ. ឥតិ ឥមាយ គាថាយ សមោធានេត្វា តិស្សោ សិក្ខា សកលសាសនំ កថិតំ ហោតីតិ.

មានកាមសុត្តវណ្ណនា និដ្ឋិតា.

១០. អរញ្ញសុត្តវណ្ណនា

១០. ទសមេ សន្តានន្តិ សន្តកិលេសានំ, បណ្ឌិតានំ វា. ‘‘សន្តោ ហវេ សព្ភិ បវេទយន្តិ (ជា. ២.២១.៤១៣), ទូរេ សន្តោ បកាសន្តី’’តិអាទីសុ (ធ. ប. ៣០៤) ហិ បណ្ឌិតាបិ សន្តោតិ វុត្តា. ព្រហ្មចារិនន្តិ សេដ្ឋចារីនំ មគ្គព្រហ្មចរិយវាសំ វសន្តានំ. កេន វណ្ណោ បសីទតីតិ កេន ការណេន ឆវិវណ្ណោ បសីទតីតិ បុច្ឆតិ. កស្មា បនេសា ឯវំ បុច្ឆតិ? ឯសា កិរ វនសណ្ឌវាសិកា ភុម្មទេវតា អារញ្ញកេ ភិក្ខូ បច្ឆាភត្តំ បិណ្ឌបាតបដិក្កន្តេ អរញ្ញំ បវិសិត្វា រត្តិដ្ឋានទិវាដ្ឋានេសុ មូលកម្មដ្ឋានំ គហេត្វា និសិន្នេ បស្សតិ. តេសញ្ច ឯវំ និសិន្នានំ ពលវចិត្តេកគ្គតា ឧប្បជ្ជតិ. តតោ វិសភាគសន្តតិ វូបសម្មតិ, សភាគសន្តតិ ឱក្កមតិ, ចិត្តំ បសីទតិ. ចិត្តេ បសន្នេ លោហិតំ បសីទតិ, ចិត្តសមុដ្ឋានានិ ឧបាទារូបានិ បរិសុទ្ធានិ ហោន្តិ, វណ្ដា បមុត្តតាលផលស្ស វិយ មុខស្ស វណ្ណោ ហោតិ. តំ ទិស្វា ទេវតា ចិន្តេសិ – ‘‘សរីរវណ្ណោ នាមាយំ បណីតានិ រសសម្បន្នានិ ភោជនានិ សុខសម្ផស្សានិ និវាសនបាបុរណសយនានិ ឧតុសុខេ តេភូមិកាទិភេទេ ច បាសាទេ មាលាគន្ធវិលេបនាទីនិ ច លភន្តានំ បសីទតិ, ឥមេ បន ភិក្ខូ បិណ្ឌាយ ចរិត្វា មិស្សកភត្តំ ភុញ្ជន្តិ, វិរឡមញ្ចកេ វា ផលកេ វា សិលាយ វា សយនានិ កប្បេន្តិ, រុក្ខមូលាទីសុ វា អព្ភោកាសេ វា វសន្តិ, កេន នុ ខោ ការណេន ឯតេសំ វណ្ណោ បសីទតី’’តិ. តស្មា បុច្ឆិ.

អថស្សា ភគវា ការណំ កថេន្តោ ទុតិយំ គាថំ អាហ. តត្ថ អតីតន្តិ អតីតេ អសុកោ នាម រាជា ធម្មិកោ អហោសិ, សោ អម្ហាកំ បណីតេ បច្ចយេ អទាសិ. អាចរិយុបជ្ឈាយា លាភិនោ អហេសុំ. អថ មយំ ឯវរូបានិ ភោជនានិ ភុញ្ជិម្ហា, ចីវរានិ បារុបិម្ហាតិ ឯវំ ឯកច្ចេ បច្ចយពាហុល្លិកា វិយ ឥមេ ភិក្ខូ អតីតំ នានុសោចន្តិ. នប្បជប្បន្តិ នាគតន្តិ អនាគតេ ធម្មិកោ រាជា ភវិស្សតិ, ផីតា ជនបទា ភវិស្សន្តិ, ពហូនិ សប្បិនវនីតាទីនិ ឧប្បជ្ជិស្សន្តិ, ‘‘ខាទថ ភុញ្ជថា’’តិ តត្ថ តត្ថ វត្តារោ ភវិស្សន្តិ, តទា មយំ ឯវរូបានិ ភោជនានិ ភុញ្ជិស្សាម, ចីវរានិ បារុបិស្សាមាតិ ឯវំ អនាគតំ ន បត្ថេន្តិ. បច្ចុប្បន្នេនាតិ យេន កេនចិ តង្ខណេ លទ្ធេន យាបេន្តិ. តេនាតិ តេន តិវិធេនាបិ ការណេន.

ឯវំ វណ្ណសម្បត្តិំ ទស្សេត្វា ឥទានិ តស្សេវ វណ្ណស្ស វិនាសំ ទស្សេន្តោ អនន្តរំ គាថមាហ. តត្ថ អនាគតប្បជប្បាយាតិ អនាគតស្ស បត្ថនាយ. ឯតេនាតិ ឯតេន ការណទ្វយេន. នឡោវ ហរិតោ លុតោតិ យថា ហរិតោ នឡោ លាយិត្វា ឧណ្ហបាសាណេ បក្ខិត្តោ សុស្សតិ, ឯវំ សុស្សន្តីតិ.

អរញ្ញសុត្តវណ្ណនា និដ្ឋិតា. នឡវគ្គោ បឋមោ.