៧. ទុតិយនាវាវិមានវណ្ណនា

សុវណ្ណច្ឆទនំ នាវន្តិ ទុតិយនាវាវិមានំ. តស្ស កា ឧប្បត្តិ? ភគវតិ សាវត្ថិយំ វិហរន្តេ អញ្ញតរោ ខីណាសវត្ថេរោ ឧបកដ្ឋាយ វស្សូបនាយិកាយ គាមកាវាសេ វស្សំ ឧបគន្តុកាមោ សាវត្ថិតោ តំ គាមំ ឧទ្ទិស្ស បច្ឆាភត្តំ អទ្ធានមគ្គបដិបន្នោ, មគ្គបរិស្សមេន កិលន្តោ តសិតោ អន្តរាមគ្គេ អញ្ញតរំ គាមំ សម្បត្តោ, ពហិគាមេ តាទិសំ ឆាយូទកសម្បន្នដ្ឋានំ អបស្សន្តោ បរិស្សមេន ច អភិភុយ្យមានោ ចីវរំ បារុបិត្វា គាមំ បវិសិត្វា ធុរគេហស្សេវ ទ្វារេ អដ្ឋាសិ. តត្ថ អញ្ញតរា ឥត្ថី ថេរំ បស្សិត្វា ‘‘កុតោ, ភន្តេ, អាគតត្ថា’’តិ បុច្ឆិត្វា មគ្គបរិស្សមំ បិបាសិតភាវញ្ច ញត្វា ‘‘ឯថ, ភន្តេ’’តិ គេហំ បវេសេត្វា ‘‘ឥធ និសីទថា’’តិ អាសនំ បញ្ញាបេត្វា អទាសិ. តត្ថ និសិន្នេ បាទោទកំ បាទព្ភញ្ជនតេលញ្ច ទត្វា តាលវណ្ដំ គហេត្វា ពីជិ. បរិឡាហេ វូបសន្តេ មធុរំ សីតលំ សុគន្ធំ បានកំ យោជេត្វា អទាសិ. ថេរោ តំ បិវិត្វា បដិប្បស្សទ្ធកិលមថោ អនុមោទនំ កត្វា បក្កាមិ. សា អបរភាគេ កាលំ កត្វា តាវតិំសភវនេ និព្ពត្តីតិ សព្ពំ អនន្តរវិមានសទិសន្តិ វេទិតព្ពំ. គាថាសុបិ អបុព្ពំ នត្ថិ. តេន វុត្តំ –

៥៣. ‘‘សុវណ្ណច្ឆទនំ នាវំ, នារិ អារុយ្ហ តិដ្ឋសិ;

ឱគាហសិ បោក្ខរណិំ, បទ្មំ ឆិន្ទសិ បាណិនា.

៥៤. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

៥៥. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

៥៦. ‘‘សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’.

៥៧. ‘‘អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ;

ទិស្វាន ភិក្ខុំ តសិតំ កិលន្តំ, ឧដ្ឋាយ បាតុំ ឧទកំ អទាសិំ.

៥៨. ‘‘យោ វេ កិលន្តស្ស បិបាសិតស្ស, ដ្ឋាយ បាតុំ ឧទកំ ទទាតិ;

សីតោទកា តស្ស ភវន្តិ នជ្ជោ, បហូតមល្យា ពហុបុណ្ឌរីកា.

៥៩. ‘‘តំ អាបគា អនុបរិយន្តិ សព្ពទា, សីតោទកា វាលុកសន្ថតា នទី;

អម្ពា ច សាលា តិលកា ច ជម្ពុយោ, ឧទ្ទាលកា បាដលិយោ ច ផុល្លា.

៦០. ‘‘តំភូមិភាគេហិ ឧបេតរូបំ, វិមានសេដ្ឋំ ភុស សោភមានំ;

តស្សីធ កម្មស្ស អយំ វិបាកោ, ឯតាទិសំ បុញ្ញកតា លភន្តិ.

៦១. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

៦២. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

អត្ថវណ្ណនាសុបិ ឥធ ឯកោវ ថេរោតិ អបុព្ពំ នត្ថិ.

ទុតិយនាវាវិមានវណ្ណនា និដ្ឋិតា.