៤. ចតុត្ថបីឋវិមានវណ្ណនា

បីឋំ តេ វេឡុរិយមយន្តិ ចតុត្ថបីឋវិមានំ. ឥមស្សាបិ វត្ថុ រាជគហេ សមុដ្ឋិតំ, តំ ទុតិយវិមានេ វុត្តនយេនេវ វេទិតព្ពំ. នីលវត្ថេន ហិ អត្ថរិត្វា បីឋស្ស ទិន្នត្តា ឥមិស្សាបិ វិមានំ វេឡុរិយមយំ និព្ពត្តំ. សេសំ បឋមវិមានេ វុត្តសទិសំ. តេន វុត្តំ –

២៣. ‘‘បីឋំ តេ វេឡុរិយមយំ ឧឡារំ, មនោជវំ គច្ឆតិ យេនកាមំ;

អលង្កតេ មល្យធរេ សុវត្ថេ, ឱភាសសិ វិជ្ជុរិវព្ភកូដំ.

២៤. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

២៥. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

២៦. ‘‘សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’.

២៧. ‘‘អប្បស្ស កម្មស្ស ផលំ មមេទំ, យេនម្ហិ ឯវំ ជលិតានុភាវា;

អហំ មនុស្សេសុ មនុស្សភូតា, បុរិមាយ ជាតិយា មនុស្សលោកេ.

២៨. ‘‘អទ្ទសំ វិរជំ ភិក្ខុំ, វិប្បសន្នមនាវិលំ;

តស្ស អទាសហំ បីឋំ, បសន្នា សេហិ បាណិភិ.

២៩. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

៣០. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

ឯត្ថាបិ ហិ នីលវត្ថេន អត្ថរិត្វា បីឋស្ស ទិន្នត្តា ឥមិស្សាបិ វិមានំ វេឡុរិយមយំ និព្ពត្តំ. តេនេវេត្ថ ‘‘បីឋំ តេ វេឡុរិយមយ’’ន្តិ អាទិតោ អាគតំ. សេសំ តតិយសទិសមេវាតិ តត្ថ វុត្តនយេនេវ អត្ថោ វេទិតព្ពោ.

ចតុត្ថបីឋវិមានវណ្ណនា និដ្ឋិតា.