២. ទុតិយបីឋវិមានវណ្ណនា

បីឋំ តេ វេឡុរិយមយន្តិ ទុតិយបីឋវិមានំ. តស្ស អដ្ឋុប្បត្តិ ច អត្ថវណ្ណនា ច បឋមេ វុត្តនយេនេវ វេទិតព្ពា. អយំ បន វិសេសោ – សាវត្ថិវាសិនី កិរ ឯកា ឥត្ថី អត្តនោ គេហំ បិណ្ឌាយ បវិដ្ឋំ ឯកំ ថេរំ បស្សិត្វា បសន្នចិត្តា តស្ស អាសនំ ទេន្តី អត្តនោ បីឋំ ឧបរិ នីលវត្ថេន អត្ថរិត្វា អទាសិ. តេន តស្សា ទេវលោកេ និព្ពត្តាយ វេឡុរិយមយំ បល្លង្កវិមានំ និព្ពត្តំ. តេន វុត្តំ –

៨. ‘‘បីឋំ តេ វេឡុរិយមយំ ឧឡារំ, មនោជវំ គច្ឆតិ យេនកាមំ;

អលង្កតេ មល្យធរេ សុវត្ថេ, ឱភាសសិ វិជ្ជុរិវព្ភ កូដំ.

៩. ‘‘កេន តេតាទិសោ វណ្ណោ, កេន តេ ឥធ មិជ្ឈតិ;

ឧប្បជ្ជន្តិ ច តេ ភោគា, យេ កេចិ មនសោ បិយា.

១០. ‘‘បុច្ឆាមិ តំ ទេវិ មហានុភាវេ, មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា, វណ្ណោ ច តេ សព្ពទិសា បភាសតី’’តិ.

១១. ‘‘សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’.

១២. ‘‘អហំ មនុស្សេសុ មនុស្សភូតា, អព្ភាគតានាសនកំ អទាសិំ;

អភិវាទយិំ អញ្ជលិកំ អកាសិំ, យថានុភាវញ្ច អទាសិ ទានំ.

១៣. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

១៤. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ.

៨. តត្ថ វេឡុរិយមយន្តិ វេឡុរិយមណិមយំ. វេឡុរិយមណិ នាម វិឡូរបព្ពតស្ស វិឡូរគាមស្ស ច អវិទូរេ ឧប្បជ្ជនកមណិ. តស្ស កិរ វិឡូរគាមដ្ឋានេ អាករោ, វិឡូរស្ស បន អវិទូរេ ភវត្តា វេឡុរិយន្តេវ បញ្ញាយិត្ថ. តំសទិសវណ្ណនិភតាយ ទេវលោកេបិស្ស តថេវ នាមំ ជាតំ យថា តំ មនុស្សលោកេ លទ្ធនាមវសេនេវ ទេវលោកេ ទេវបុត្តានំ. តំ បន មយូរគីវវណ្ណំ វា ហោតិ, វាយសបត្តវណ្ណំ វា, សិនិទ្ធវេណុបត្តវណ្ណំ វា. ឥធ បន មយូរគីវវណ្ណំ វេទិតព្ពំ. សេសំ សព្ពំ បឋមបីឋវិមានេ វុត្តសទិសមេវាតិ.

ទុតិយបីឋវិមានវណ្ណនា និដ្ឋិតា.