១១. បឋមបតិព្ពតាវិមានវណ្ណនា

កោញ្ចា មយូរា ទិវិយា ច ហំសាតិ បតិព្ពតាវិមានំ. តស្ស កា ឧប្បត្តិ? ភគវា សាវត្ថិយំ វិហរតិ ជេតវនេ អនាថបិណ្ឌិកស្ស អារាមេ. តត្ថ អញ្ញតរា ឥត្ថី បតិព្ពតា អហោសិ ភត្តុ អនុកូលវត្តិនី ខមា បទក្ខិណគ្គាហិនី, ន កុទ្ធាបិ បដិប្ផរតិ, អផរុសវាចា សច្ចវាទិនី សទ្ធា បសន្នា យថាវិភវំ ទានានិ ច អទាសិ. សា កេនចិទេវ រោគេន ផុដ្ឋា កាលំ កត្វា តាវតិំសភវនេ និព្ពត្តិ. អថាយស្មា មហាមោគ្គល្លានោ បុរិមនយេនេវ ទេវចារិកំ ចរន្តោ តំ ទេវធីតរំ មហតិំ សម្បត្តិំ អនុភវន្តិំ ទិស្វា តស្សា សមីបមុបគតោ. សា អច្ឆរាសហស្សបរិវុតា សដ្ឋិសកដភារាលង្ការបដិមណ្ឌិតត្តភាវា ថេរស្ស បាទេសុ សិរសា វន្ទិត្វា ឯកមន្តំ អដ្ឋាសិ. ថេរោបិ តាយ កតបុញ្ញកម្មំ បុច្ឆន្តោ –

៩៣. ‘‘កោញ្ចា មយូរា ទិវិយា ច ហំសា, វគ្គុស្សរា កោកិលា សម្បតន្តិ;

បុប្ផាភិកិណ្ណំ រម្មមិទំ វិមានំ, អនេកចិត្តំ នរនារិសេវិតំ.

៩៤. ‘‘តត្ថច្ឆសិ ទេវិ មហានុភាវេ, ឥទ្ធី វិកុព្ពន្តិ អនេករូបា;

ឥមា ច តេ អច្ឆរាយោ សមន្តតោ, នច្ចន្តិ គាយន្តិ បមោទយន្តិ ច.

៩៥. ‘‘ទេវិទ្ធិបត្តាសិ មហានុភាវេ,

មនុស្សភូតា កិមកាសិ បុញ្ញំ;

កេនាសិ ឯវំ ជលិតានុភាវា,

វណ្ណោ ច តេ សព្ពទិសា បភាសតី’’តិ. – អាហ;

៩៦. ‘‘សា ទេវតា អត្តមនា, មោគ្គល្លានេន បុច្ឆិតា;

បញ្ហំ បុដ្ឋា វិយាកាសិ, យស្ស កម្មស្សិទំ ផលំ’’.

៩៧. ‘‘អហំ មនុស្សេសុ មនុស្សភូតា, បតិព្ពតានញ្ញមនា អហោសិំ;

មាតាវ បុត្តំ អនុរក្ខមានា, កុទ្ធាបិហំ នប្ផរុសំ អវោចំ.

៩៨. ‘‘សច្ចេ ឋិតា មោសវជ្ជំ បហាយ, ទានេ រតា សង្គហិតត្តភាវា;

អន្នញ្ច បានញ្ច បសន្នចិត្តា, សក្កច្ច ទានំ វិបុលំ អទាសិំ.

៩៩. ‘‘តេន មេតាទិសោ វណ្ណោ, តេន មេ ឥធ មិជ្ឈតិ;

ឧប្បជ្ជន្តិ ច មេ ភោគា, យេ កេចិ មនសោ បិយា.

១០០. ‘‘អក្ខាមិ តេ ភិក្ខុ មហានុភាវ, មនុស្សភូតា យមកាសិ បុញ្ញំ;

តេនម្ហិ ឯវំ ជលិតានុភាវា, វណ្ណោ ច មេ សព្ពទិសា បភាសតី’’តិ. –

សា ទេវតា វិស្សជ្ជេសិ.

៩៣. តត្ថ កោញ្ចាតិ កោញ្ចសកុណា, យេ ‘‘សារសា’’តិបិ វុច្ចន្តិ. មយូរាតិ មោរា. ទិវិយាតិ ទិព្ពានុភាវា. ឥទញ្ហិ បទំ ‘‘ទិវិយា កោញ្ចា, ទិវិយា មយូរា’’តិអាទិនា ចតូហិបិ បទេហិ យោជេតព្ពំ. ហំសាតិ សុវណ្ណហំសាទិហំសា. វគ្គុស្សរាតិ មធុរស្សរា. កោកិលាតិ កាឡកោកិលា ចេវ សុក្កកោកិលា ច. សម្បតន្តីតិ ទេវតាយ អភិរមណត្ថំ កីឡន្តា លឡន្តា សមន្តតោ បតន្តិ វិចរន្តិ. កោញ្ចាទិរូបេន ហិ ទេវតាយ រតិជននត្ថំ បរិវារភូតា ទេវតា កីឡន្តា លឡន្តា ‘‘កោញ្ចា’’តិអាទិនា វុត្តា. បុប្ផាភិកិណ្ណន្តិ គន្ថិតាគន្ថិតេហិ នានាវិធរតនកុសុមេហិ ឱកិណ្ណំ. រម្មន្តិ រមណីយំ, មនោរមន្តិ អត្ថោ. អនេកចិត្តន្តិ អនេកេហិ ឧយ្យានកប្បរុក្ខបោក្ខរណិអាទីហិ វិមានេសុ ច អនេកេហិ ភិត្តិវិសេសាទីហិ ចិត្តំ. នរនារិសេវិតន្តិ បរិវារភូតេហិ ទេវបុត្តេហិ ទេវធីតាហិ ច ឧបសេវិតំ.

៩៤. ឥទ្ធី វិកុព្ពន្តិ អនេករូបាតិ នានារូបានំ វិទំសនេន អនេករូបា កម្មានុភាវសិទ្ធា ឥទ្ធី វិកុព្ពន្តី វិកុព្ពនិទ្ធិយោ វលញ្ជេន្តី អច្ឆសីតិ យោជនា.

៩៧. អនញ្ញមនាតិ បតិព្ពតា, បតិតោ អញ្ញស្មិំ មនោ ឯតិស្សាតិ អញ្ញមនា, ន អញ្ញមនាតិ អនញ្ញមនា, មយ្ហំ សាមិកតោ អញ្ញស្មិំ បុរិសេ បាបកំ ចិត្តំ ន ឧប្បាទេសិន្តិ អត្ថោ. មាតាវ បុត្តំ អនុរក្ខមានាតិ យថា មាតា បុត្តំ, ឯវំ មយ្ហំ សាមិកំ, សព្ពេបិ វា សត្តេ ហិតេសិតាយ អហិតាបនយនកាមតាយ ច អនុទ្ទយមានា. កុទ្ធាបិហំ នប្ផរុសំ អវោចន្តិ បរេន កតំ អផាសុកំ បដិច្ច កុទ្ធាបិ សមានា អហំ ផរុសវចនំ ន កថេសិំ, អញ្ញទត្ថុ បិយវចនមេវ អភាសិន្តិ អធិប្បាយោ.

៩៨. សច្ចេ ឋិតាតិ សច្ចេ បតិដ្ឋិតា. យស្មា មុសាវាទា វេរមណិយា សច្ចេ បតិដ្ឋិតា នាម ហោតិ, ន កទាចិ សច្ចវចនមត្តេនាតិ អាហ – មោសវជ្ជំ បហាយាតិ មុសាវាទំ បហាយ. ទានេ រតាតិ ទានេ អភិរតា, យុត្តប្បយុត្តាតិ អត្ថោ. សង្គហិតត្តភាវាតិ សង្គហវត្ថូហិ អត្តានំ វិយ សភាវេនេវ បរេសំ សង្គណ្ហនសីលា អន្នញ្ច បានញ្ច កម្មផលសទ្ធាយ បសន្នចិត្តា សក្កច្ចំ ចិត្តីការេន អទាសិំ, អញ្ញញ្ច វត្ថាទិទានំ វិបុលំ ឧឡារំ អទាសិន្តិ យោជនា. សេសំ វុត្តនយមេវ.

បតិព្ពតាវិមានវណ្ណនា និដ្ឋិតា.