៧. សក្កុទានសុត្តវណ្ណនា

២៧. សត្តមេ សត្តាហំ ឯកបល្លង្កេន និសិន្នោ ហោតិ អញ្ញតរំ សមាធិំ សមាបជ្ជិត្វាតិ ឯត្ថ កេចិ តាវ អាហុ ‘‘អរហត្តផលសមាធិ ឥធ ‘អញ្ញតរោ សមាធី’តិ អធិប្បេតោ’’តិ. តញ្ហិ សោ អាយស្មា ពហុលំ សមាបជ្ជតិ ទិដ្ឋធម្មសុខវិហារត្ថំ, បហោតិ ច សត្តាហម្បិ ផលសមាបត្តិយា វីតិនាមេតុំ. តថា ហិ ភគវតា –

‘‘អហំ, ភិក្ខវេ, យាវទេ អាកង្ខាមិ វិវិច្ចេវ កាមេហិ, វិវិច្ច អកុសលេហិ ធម្មេហិ…បេ… វិហរាមិ. កស្សបោបិ, ភិក្ខវេ, យាវទេ អាកង្ខតិ វិវិច្ចេវ កាមេហិ…បេ… វិហរតី’’តិ (សំ. និ. ២.១៥២) –

អាទិនា នវានុបុព្ពវិហារឆឡភិញ្ញាទិភេទេ ឧត្តរិមនុស្សធម្មេ អត្តនា សមសមដ្ឋានេ ឋបិតោ, ន ចេត្ថ ‘‘យទិ ឯវំ ថេរោ យមកបាដិហារិយម្បិ ករេយ្យា’’តិ វត្តព្ពំ សាវកសាធារណានំយេវ ឈានាទីនំ អធិប្បេតត្តាតិ.

បោរាណា បនាហុ – អញ្ញតរំ សមាធិំ សមាបជ្ជិត្វាតិ និរោធសមាបត្តិំ សមាបជ្ជិត្វា. កថំ បន និរោធសមាបត្តិ សមាធីតិ វុត្តា? សមាធានដ្ឋេន. កោ បនាយំ សមាធានដ្ឋោ? សម្មទេវ អាធាតព្ពតា. យា ហិ ឯសា បច្ចនីកធម្មេហិ អកម្បនីយា ពលប្បត្តិយា សមថពលំ វិបស្សនាពលន្តិ ឥមេហិ ទ្វីហិ ពលេហិ, អនិច្ចទុក្ខានត្តនិព្ពិទាវិរាគនិរោធបដិនិស្សគ្គវិវដ្ដានុបស្សនា ចត្តារិ មគ្គញាណានិ ចត្តារិ ច ផលញាណានីតិ ឥមេសំ សោឡសន្នំ ញាណានំ វសេន សោឡសហិ ញាណចរិយាហិ, បឋមជ្ឈានសមាធិអាទយោ អដ្ឋ សមាធី ឯកជ្ឈំ កត្វា គហិតោ តេសំ ឧបចារសមាធិ ចាតិ ឥមេសំ នវន្នំ សមាធីនំ វសេន នវហិ សមាធិចរិយាហិ កាយសង្ខារោ វចីសង្ខារោ ចិត្តសង្ខារោតិ ឥមេសំ តិណ្ណំ សង្ខារានំ តត្ថ តត្ថ បដិប្បស្សទ្ធិយា តថា វិហរិតុកាមេន យថាវុត្តេសុ ឋានេសុ វសីភាវប្បត្តេន អរហតា អនាគាមិនា វា យថាធិប្បេតំ កាលំ ចិត្តចេតសិកសន្តានស្ស សម្មទេវ អប្បវត្តិ អាធាតព្ពា, តស្សា តថា សមាធាតព្ពតា ឥធ សមាធានដ្ឋោ, តេនាយំ វិហារោ សមាធីតិ វុត្តោ, ន អវិក្ខេបដ្ឋេន. ឯតេនស្ស សមាបត្តិអត្ថោបិ វុត្តោតិ វេទិតព្ពោ. ឥមញ្ហិ និរោធសមាបត្តិំ សន្ធាយ បដិសម្ភិទាមគ្គេ –

‘‘កថំ ទ្វីហិ ពលេហិ សមន្នាគតត្តា តិណ្ណំ សង្ខារានំ បដិប្បស្សទ្ធិយា សោឡសហិ ញាណចរិយាហិ នវហិ សមាធិចរិយាហិ វសីភាវតាយ សញ្ញានិរោធសមាបត្តិយា ញាណ’’ន្តិ (បដិ. ម. ១.៨៣) –

បុច្ឆិត្វា ‘‘ទ្វីហិ ពលេហី’’តិ ទ្វេ ពលានិ សមថពលំ វិបស្សនាពលន្តិ វិត្ថារោ. សាយំ និរោធសមាបត្តិកថា វិសុទ្ធិមគ្គេ (វិសុទ្ធិ. ២.៨៦៧ អាទយោ) សំវណ្ណិតាវ. កស្មា បនាយំ ថេរោ ផលសមាបត្តិំ អសមាបជ្ជិត្វា និរោធំ សមាបជ្ជិ? សត្តេសុ អនុកម្បាយ. អយញ្ហិ មហាថេរោ សព្ពាបិ សមាបត្តិយោ វឡញ្ជេតិ, សត្តានុគ្គហេន បន យេភុយ្យេន និរោធំ សមាបជ្ជតិ. តញ្ហិ សមាបជ្ជិត្វា វុដ្ឋិតស្ស កតោ អប្បកោបិ សក្ការោ វិសេសតោ មហប្ផលោ មហានិសំសោ ហោតីតិ.

វុដ្ឋាសីតិ អរហត្តផលចិត្តុប្បត្តិយា វុដ្ឋាសិ. និរោធំ សមាបន្នោ ហិ អរហា ចេ អរហត្តផលស្ស, អនាគាមី ចេ អនាគាមិផលស្ស ឧប្បាទេន វុដ្ឋិតោ នាម ហោតិ.

តេន ខោ បន សមយេន សក្កោ ទេវានមិន្ទោ អាយស្មតោ មហាកស្សបស្ស បិណ្ឌបាតំ ទាតុកាមោ ហោតីតិ កថំ តស្ស ទាតុកាមតា ជាតា? យានិ ‘‘តានិ បញ្ចមត្តានិ ទេវតាសតានី’’តិ វុត្តានិ, តា សក្កស្ស ទេវរញ្ញោ បរិចារិកា កកុដបាទិនិយោ បុព្ពេ ‘‘អយ្យោ មហាកស្សបោ រាជគហំ បិណ្ឌាយ បវិសតិ, គច្ឆថ ថេរស្ស ទានំ ទេថា’’តិ សក្កេន បេសិតា ឧបគន្ត្វា ទិព្ពាហារំ ទាតុកាមា ឋិតា ថេរេន បដិក្ខិត្តា ទេវលោកមេវ គតា. ឥទានិ បុរិមប្បដិក្ខេបំ ចិន្តេត្វា ‘‘កទាចិ គណ្ហេយ្យា’’តិ សមាបត្តិតោ វុដ្ឋិតស្ស ថេរស្ស ទានំ ទាតុកាមា សក្កស្ស អនារោចេត្វា សយមេវ អាគន្ត្វា ទិព្ពភោជនានិ ឧបនេន្តិយោ បុរិមនយេនេវ ថេរេន បដិក្ខិត្តា ទេវលោកំ គន្ត្វា សក្កេន ‘‘កហំ គតត្ថា’’តិ បុដ្ឋា តមត្ថំ អារោចេត្វា ‘‘ទិន្នោ វោ ថេរស្ស បិណ្ឌបាតោ’’តិ សក្កេន វុត្តេ ‘‘គណ្ហិតុំ ន ឥច្ឆតី’’តិ. ‘‘កិំ កថេសី’’តិ? ‘‘‘ទុគ្គតានំ សង្គហំ ករិស្សាមី’តិ អាហ, ទេវា’’តិ. ‘‘តុម្ហេ កេនាការេន គតា’’តិ? ‘‘ឥមិនាវ, ទេវា’’តិ. សក្កោ ‘‘តុម្ហាទិសិយោ ថេរស្ស បិណ្ឌបាតំ កិំ ទស្សន្តី’’តិ? សយំ ទាតុកាមោ, ជរាជិណ្ណោ ខណ្ឌទន្តោ បលិតកេសោ ឱភគ្គសរីរោ មហល្លកោ តន្តវាយោ ហុត្វា, សុជម្បិ អសុរធីតរំ តថារូបិមេវ មហល្លិកំ កត្វា, ឯកំ បេសការវីថិំ មាបេត្វា តន្តំ បសារេន្តោ អច្ឆិ, សុជា តសរំ បូរេតិ. តេន វុត្តំ – ‘‘តេន ខោ បន សមយេន សក្កោ ទេវានមិន្ទោ…បេ… តសរំ បូរេតី’’តិ.

តត្ថ តន្តំ វិនាតីតិ បសារិតតន្តំ វិនន្តោ វិយ ហោតិ. តសរំ បូរេតីតិ តសរវដ្ដិំ វឌ្ឍេន្តី វិយ. យេន សក្កស្ស ទេវានមិន្ទស្ស និវេសនំ តេនុបសង្កមីតិ ថេរោ និវាសេត្វា បត្តចីវរមាទាយ ‘‘ទុគ្គតជនសង្គហំ ករិស្សាមី’’តិ នគរាភិមុខោ គច្ឆន្តោ ពហិនគរេ សក្កេន មាបិតំ បេសការវីថិំ បដិបជ្ជិត្វា ឱលោកេន្តោ អទ្ទស ឱលុគ្គវិលុគ្គជិណ្ណសាលំ តត្ថ ច តេ ជាយម្បតិកេ យថាវុត្តរូបេ តន្តវាយកម្មំ ករោន្តេ ទិស្វា ចិន្តេសិ – ‘‘ឥមេ មហល្លកកាលេបិ កម្មំ ករោន្តិ. ឥមស្មិំ នគរេ ឥមេហិ ទុគ្គតតរា នត្ថិ មញ្ញេ. ឥមេហិ ទិន្នំ សាកមត្តម្បិ គហេត្វា ឥមេសំ សង្គហំ ករិស្សាមី’’តិ. សោ តេសំ គេហាភិមុខោ អគមាសិ. សក្កោ តំ អាគច្ឆន្តំ ទិស្វា សុជំ អាហ – ‘‘ភទ្ទេ, មយ្ហំ អយ្យោ ឥតោ អាគច្ឆតិ, តំ ត្វំ អបស្សន្តី វិយ តុណ្ហី ហុត្វា និសីទ. ខណេនេវ វញ្ចេត្វា បិណ្ឌបាតំ ទស្សាមា’’តិ ថេរោ គន្ត្វា គេហទ្វារេ អដ្ឋាសិ. តេបិ អបស្សន្តា វិយ អត្តនោ កម្មមេវ ករោន្តា ថោកំ អាគមយិំសុ. អថ សក្កោ ‘‘គេហទ្វារេ ឋិតោ ឯកោ ថេរោ វិយ ខាយតិ, ឧបធារេហិ តាវា’’តិ អាហ. ‘‘តុម្ហេ គន្ត្វា ឧបធារេថ, សាមី’’តិ. សោ គេហា និក្ខមិត្វា ថេរំ បញ្ចបតិដ្ឋិតេន វន្ទិត្វា ឧភោហិ ហត្ថេហិ ជណ្ណុកានិ ឱលុម្ពិត្វា និត្ថុនន្តោ ឧដ្ឋាយ ‘‘កតរត្ថេរោ នុ ខោ អយ្យោ’’តិ ថោកំ ឱសក្កិត្វា ‘‘អក្ខីនិ មេ ធូមាយន្តី’’តិ វត្វា នលាដេ ហត្ថំ ឋបេត្វា ឧទ្ធំ ឧល្លោកេត្វា ‘‘អហោ ទុក្ខំ អយ្យោ នោ មហាកស្សបត្ថេរោវ ចិរស្សំ មេ កុដិទ្វារំ អាគតោ. អត្ថិ នុ ខោ កិញ្ចិ គេហេ’’តិ អាហ. សុជា ថោកំ អាកុលា វិយ ហុត្វា ‘‘អត្ថិ, សាមី’’តិ បដិវចនំ អទាសិ. សក្កោ, ‘‘ភន្តេ, លូខំ វា បណីតំ វាតិ អចិន្តេត្វា សង្គហំ នោ ករោថា’’តិ បត្តំ គណ្ហិ. ថេរោ បត្តំ ទេន្តោ ‘‘ឥមេសំ ឯវ ទុគ្គតានំ ជរាជិណ្ណានំ មយា សង្គហោ កាតព្ពោ’’តិ ចិន្តេសិ. សោ អន្តោ បវិសិត្វា ឃដិឱទនំ នាម ឃដិតោ ឧទ្ធរិត្វា, បត្តំ បូរេត្វា, ថេរស្ស ហត្ថេ ឋបេសិ. តេន វុត្តំ – ‘‘អទ្ទសា ខោ សក្កោ ទេវានមិន្ទោ…បេ… អទាសី’’តិ.

តត្ថ ឃដិយាតិ ភត្តឃដិតោ. ‘‘ឃដិឱទន’’ន្តិបិ បាឋោ, តស្ស ឃដិឱទនំ នាម ទេវានំ កោចិ អាហារវិសេសោតិ អត្ថំ វទន្តិ. ឧទ្ធរិត្វាតិ កុតោចិ ភាជនតោ ឧទ្ធរិត្វា. អនេកសូបោ សោ ឯវ អាហារោ បត្តេ បក្ខិបិត្វា ថេរស្ស ហត្ថេ ឋបនកាលេ កបណានំ ឧបកប្បនកលូខាហារោ វិយ បញ្ញាយិត្ថ, ហត្ថេ ឋបិតមត្តេ បន អត្តនោ ទិព្ពសភាវេនេវ អដ្ឋាសិ. អនេកសូបោតិ មុគ្គមាសាទិសូបេហិ ចេវ ខជ្ជវិកតីហិ ច អនេកវិធសូបោ. អនេកព្យញ្ជនោតិ នានាវិធឧត្តរិភង្គោ. អនេករសព្យញ្ជនោតិ អនេកេហិ សូបេហិ ចេវ ព្យញ្ជនេហិ ច មធុរាទិមូលរសានញ្ចេវ សម្ភិន្នរសានញ្ច អភិព្យញ្ជកោ, នានគ្គរសសូបព្យញ្ជនោតិ អត្ថោ.

សោ កិរ បិណ្ឌបាតោ ថេរស្ស ហត្ថេ ឋបិតកាលេ រាជគហនគរំ អត្តនោ ទិព្ពគន្ធេន អជ្ឈោត្ថរិ, តតោ ថេរោ ចិន្តេសិ – ‘‘អយំ បុរិសោ អប្បេសក្ខោ, បិណ្ឌបាតោ អតិវិយ បណីតោ សក្កស្ស ភោជនសទិសោ. កោ នុ ខោ ឯសោ’’តិ? អថ នំ ‘‘សក្កោ’’តិ ញត្វា អាហ – ‘‘ភារិយំ តេ, កោសិយ, កម្មំ កតំ ទុគ្គតានំ សម្បត្តិំ វិលុម្បន្តេន, អជ្ជ មយ្ហំ ទានំ ទត្វា កោចិទេវ ទុគ្គតោ សេនាបតិដ្ឋានំ វា សេដ្ឋិដ្ឋានំ វា លភេយ្យា’’តិ. ‘‘កោ មយា ទុគ្គតតរោ អត្ថិ, ភន្តេ’’តិ? ‘‘កថំ ត្វំ ទុគ្គតោ ទេវរជ្ជសិរិំ អនុភវន្តោ’’តិ? ‘‘ភន្តេ, ឯវំ នាមេតំ, មយា បន អនុប្បន្នេ ពុទ្ធេ កល្យាណកម្មំ កតំ, ពុទ្ធុប្បាទេ បន វត្តមានេ បុញ្ញកម្មំ កត្វា ចូឡរថទេវបុត្តោ មហារថទេវបុត្តោ អនេកវណ្ណទេវបុត្តោតិ ឥមេ តយោ ទេវបុត្តា មមាសន្នដ្ឋានេ និព្ពត្តា មហាតេជវន្តតរា. អហំ តេសុ ទេវបុត្តេសុ ‘នក្ខត្តំ កីឡិស្សាមា’តិ បរិចារិកាយោ គហេត្វា អន្តរវីថិំ ឱតិណ្ណេសុ បលាយិត្វា គេហំ បវិសាមិ. តេសញ្ហិ សរីរតោ តេជោ មម សរីរំ ឱត្ថរតិ, មម សរីរតោ តេជោ តេសំ សរីរំ ន ឱត្ថរតិ. កោ មយា ទុគ្គតតរោ, ភន្តេ’’តិ? ‘‘ឯវំ សន្តេបិ ឥតោ បដ្ឋាយ មយ្ហំ មា ឯវំ វញ្ចេត្វា ទានមទាសី’’តិ. ‘‘វញ្ចេត្វា តុម្ហាកំ ទានេ ទិន្នេ មយ្ហំ កុសលំ អត្ថិ នត្ថី’’តិ? ‘‘អត្ថិ, អាវុសោ’’តិ. ‘‘ឯវំ សន្តេ កុសលករណំ នាម មយ្ហំ ភារោ, ភន្តេ’’តិ វត្វា ថេរំ វន្ទិត្វា សុជំ អាទាយ ថេរំ បទក្ខិណំ កត្វា, វេហាសំ អព្ភុគ្គន្ត្វា ‘‘អហោ ទានំ បរមទានំ, កស្សបេ សុប្បតិដ្ឋិត’’ន្តិ តិក្ខត្តុំ ឧទានំ ឧទានេសិ. តេន វុត្តំ ‘‘អថ ខោ អាយស្មតោ មហាកស្សបស្ស ឯតទហោសី’’តិអាទិ.

តត្ថ កោសិយាតិ សក្កំ ទេវានមិន្ទំ គោត្តេន អាលបតិ. បុញ្ញេន អត្ថោតិ បុញ្ញេន បយោជនំ. អត្ថីតិ វចនសេសោ. វេហាសំ អព្ភុគ្គន្ត្វាតិ បថវិតោ វេហាសំ អភិឧគ្គន្ត្វា. អាកាសេ អន្តលិក្ខេតិ អាកាសមេវ បរិយាយសទ្ទេន អន្តលិក្ខេតិ វទន្តិ. អថ វា អន្តលិក្ខសង្ខាតេ អាកាសេ ន កសិណុគ្ឃាដិមាទិអាកាសេតិ វិសេសេន្តោ វទតិ. អហោ ទានន្តិ ឯត្ថ អហោតិ អច្ឆរិយត្ថេ និបាតោ. សក្កោ ហិ ទេវានមិន្ទោ, ‘‘យស្មា និរោធា វុដ្ឋិតស្ស អយ្យស្ស មហាកស្សបត្ថេរស្ស សក្កច្ចំ សហត្ថេន ចិត្តីកត្វា អនបវិទ្ធំ កាលេន បរេសំ អនុបហច្ច, សម្មាទិដ្ឋិំ បុរក្ខត្វា ឥទមីទិសំ មយា ទិព្ពភោជនទានំ ទិន្នំ, តស្មា ខេត្តសម្បត្តិ ទេយ្យធម្មសម្បត្តិ ចិត្តសម្បត្តីតិ, តិវិធាយបិ សម្បត្តិយា សមន្នាគតត្តា សព្ពង្គសម្បន្នំ វត មយា ទានំ បវត្តិត’’ន្តិ អច្ឆរិយព្ភុតចិត្តជាតោ តទា អត្តនោ ហទយព្ភន្តរគតំ បីតិសោមនស្សំ សមុគ្គិរន្តោ ‘‘អហោ ទាន’’ន្តិ វត្វា តស្ស ទានស្ស វុត្តនយេន ឧត្តមទានភាវំ ខេត្តង្គតភាវញ្ច បកាសេន្តោ ‘‘បរមទានំ កស្សបេ សុប្បតិដ្ឋិត’’ន្តិ ឧទានំ ឧទានេសិ.

ឯវំ បន សក្កស្ស ឧទានេន្តស្ស ភគវា វិហារេ ឋិតោយេវ ទិព្ពសោតេន សទ្ទំ សុត្វា ‘‘បស្សថ, ភិក្ខវេ, សក្កំ ទេវានមិន្ទំ ឧទានំ ឧទានេត្វា អាកាសេន គច្ឆន្ត’’ន្តិ ភិក្ខូនំ វត្វា តេហិ ‘‘កិំ បន, ភន្តេ, តេន កត’’ន្តិ បុដ្ឋោ ‘‘មម បុត្តស្ស កស្សបស្ស វញ្ចេត្វា ទានំ អទាសិ, តេន ច អត្តមនោ ឧទានេសី’’តិ អាហ. តេន វុត្តំ ‘‘អស្សោសិ ខោ ភគវា ទិព្ពាយ សោតធាតុយា’’តិអាទិ.

តត្ថ ទិព្ពាយ សោតធាតុយាតិ ទិព្ពសទិសត្តា ទិព្ពា. ទេវតានញ្ហិ សុចរិតកម្មនិព្ពត្តា បិត្តសេម្ហរុហិរាទីហិ អបលិពុទ្ធា ឧបក្កិលេសវិនិមុត្តតាយ ទូរេបិ អារម្មណំ គហេតុំ សមត្ថា ទិព្ពបសាទសោតធាតុ ហោតិ. អយញ្ចាបិ ភគវតោ វីរិយភាវនាពលនិព្ពត្តា ញាណមយា សោតធាតុ តាទិសា ឯវាតិ ទិព្ពសទិសត្តា ទិព្ពា. អបិ ច ទិព្ពវិហារវសេន បដិលទ្ធត្តា អត្តនា ច ទិព្ពវិហារសន្និស្សិតត្តាបិ ទិព្ពា. សវនដ្ឋេន ច សភាវធារណដ្ឋេន ច សោតធាតុ, សោតធាតុយាបិ កិច្ចករណេន សោតធាតុ វិយាតិ សោតធាតុ, តាយ ទិព្ពាយ សោតធាតុយា. វិសុទ្ធាយាតិ បរិសុទ្ធាយ និរុបក្កិលេសាយ. អតិក្កន្តមានុសិកាយាតិ មនុស្សូបចារំ អតិក្កមិត្វា សទ្ទស្សវនេន មានុសិកមំសសោតធាតុំ អតិក្កមិត្វា ឋិតាយ.

ឯតមត្ថំ វិទិត្វាតិ ‘‘សម្មាបដិបត្តិយា គុណវិសេសេ បតិដ្ឋិតំ បុរិសាតិសយំ ទេវាបិ មនុស្សាបិ អាទរជាតា អតិវិយ បិហយន្តី’’តិ ឥមមត្ថំ វិទិត្វា តទត្ថទីបនំ ឥមំ ឧទានំ ឧទានេសិ.

តត្រ បិណ្ឌបាតិកង្គសង្ខាតំ ធុតង្គំ សមាទាយ តស្ស បរិបូរណេន បិណ្ឌបាតិកស្ស. ននុ ចាយំ គាថា អាយស្មន្តំ មហាកស្សបំ និមិត្តំ កត្វា ភាសិតា, ថេរោ ច សព្ពេសំ ធុតវាទានំ អគ្គោ តេរសធុតង្គធរោ, សោ កស្មា ឯកេនេវ ធុតង្គេន កិត្តិតោតិ? អដ្ឋុប្បត្តិវសេនាយំ និទ្ទេសោ. អថ វា ទេសនាមត្តមេតំ, ឥមិនា ទេសនាសីសេន សព្ពេបិស្ស ធុតង្គា វុត្តាតិ វេទិតព្ពា. អថ វា ‘‘យថាបិ ភមរោ បុប្ផ’’ន្តិ (ធ. ប. ៤៩) គាថាយ វុត្តនយេន បរមប្បិច្ឆតាយ កុលានុទ្ទយតាយ ចស្ស សព្ពំ បិណ្ឌបាតិកវត្តំ អក្ខណ្ឌេត្វា តត្ថ សាតិសយំ បដិបត្តិយា បកាសនត្ថំ ‘‘បិណ្ឌបាតិកស្សា’’តិ វុត្តំ. បិណ្ឌបាតិកស្សាតិ ច បិហយន្តីតិ បទំ អបេក្ខិត្វា សម្បទានវចនំ, តំ ឧបយោគត្ថេ ទដ្ឋព្ពំ. អត្តភរស្សាតិ ‘‘អប្បានិ ច តានិ សុលភានិ អនវជ្ជានី’’តិ (អ. និ. ៤.២៧; ឥតិវុ. ១០១) ឯវំ វុត្តេហិ អប្បានវជ្ជសុលភរូបេហិ ចតូហិ បច្ចយេហិ អត្តានមេវ ភរន្តស្ស. អនញ្ញបោសិនោតិ អាមិសសង្គណ្ហនេន អញ្ញេ សិស្សាទិកេ បោសេតុំ អនុស្សុក្កតាយ អនញ្ញបោសិនោ. បទទ្វយេនស្ស កាយបរិហារិកេន ចីវរេន កុច្ឆិបរិហារិកេន បិណ្ឌបាតេន វិចរណតោ សល្លហុកវុត្តិតំ សុភរតំ បរមញ្ច សន្តុដ្ឋិំ ទស្សេតិ. អថ វា អត្តភរស្សាតិ ឯកវចនិច្ឆាយ អត្តភាវសង្ខាតំ ឯកំយេវ ឥមំ អត្តានំ ភរតិ, ន ឥតោ បរំ អញ្ញន្តិ អត្តភរោ, តតោ ឯវ អត្តនា អញ្ញស្ស បោសេតព្ពស្ស អភាវតោ អនញ្ញបោសី, តស្ស អត្តភរស្ស អនញ្ញបោសិនោ. បទទ្វយេនបិ ខីណាសវភាវេន អាយតិំ អនាទានតំ ទស្សេតិ.

ទេវា បិហយន្តិ…បេ… សតីមតោតិ តំ អគ្គផលាធិគមេន សព្ពកិលេសទរថបរិឡាហានំ វូបសមេន បដិប្បស្សទ្ធិយា ឧបសន្តំ, សតិវេបុល្លប្បត្តិយា និច្ចកាលំ សតោការិតាយ សតិមន្តំ, តតោ ឯវ ឥដ្ឋានិដ្ឋាទីសុ តាទិលក្ខណប្បត្តំ ខីណាសវំ សក្កាទយោ ទេវា បិហយន្តិ បត្ថេន្តិ, តស្ស សីលាទិគុណវិសេសេសុ ពហុមានំ ឧប្បាទេន្តា អាទរំ ជនេន្តិ, បគេវ មនុស្សាតិ.

សត្តមសុត្តវណ្ណនា និដ្ឋិតា.