៨. អដ្ឋកនិបាតោ

១. សីសូបចាលាថេរីគាថាវណ្ណនា

អដ្ឋកនិបាតេ ភិក្ខុនី សីលសម្បន្នាតិអាទិកា សីសូបចាលាយ ថេរិយា គាថា. ឥមិស្សាបិ វត្ថុ ចាលាយ ថេរិយា វត្ថុម្ហិ វុត្តនយមេវ. អយម្បិ ហិ អាយស្មតោ ធម្មសេនាបតិស្ស បព្ពជិតភាវំ សុត្វា សយម្បិ ឧស្សាហជាតា បព្ពជិត្វា កតបុព្ពកិច្ចា វិបស្សនំ បដ្ឋបេត្វា, ឃដេន្តី វាយមន្តី នចិរស្សេវ អរហត្តំ បាបុណិ. អរហត្តំ បត្វា ផលសមាបត្តិសុខេន វិហរន្តី ឯកទិវសំ អត្តនោ បដិបត្តិំ បច្ចវេក្ខិត្វា កតកិច្ចាតិ សោមនស្សជាតា ឧទានវសេន –

១៩៦. ‘‘ភិក្ខុនី សីលសម្បន្នា, ឥន្ទ្រិយេសុ សុសំវុតា;

អធិគច្ឆេ បទំ សន្តំ, អសេចនកមោជវ’’ន្តិ. – គាថមាហ;

តត្ថ សីលសម្បន្នាតិ បរិសុទ្ធេន ភិក្ខុនិសីលេន សមន្នាគតា បរិបុណ្ណា. ឥន្ទ្រិយេសុ សុសំវុតាតិ មនច្ឆដ្ឋេសុ ឥន្ទ្រិយេសុ សុដ្ឋុ សំវុតា, រូបាទិអារម្មណេ ឥដ្ឋេ រាគំ, អនិដ្ឋេ ទោសំ, អសមបេក្ខនេ មោហញ្ច បហាយ សុដ្ឋុ បិហិតិន្ទ្រិយា. អសេចនកមោជវន្តិ កេនចិ អនាសិត្តកំ ឱជវន្តំ សភាវមធុរំ សព្ពស្សាបិ កិលេសរោគស្ស វូបសមនោសធភូតំ អរិយមគ្គំ, និព្ពានមេវ វា. អរិយមគ្គម្បិ ហិ និព្ពានត្ថិកេហិ បដិបជ្ជិតព្ពតោ កិលេសបរិឡាហាភាវតោ ច បទំ សន្តន្តិ វត្តុំ វដ្ដតិ.

១៩៧. ‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ;

តត្ថ ចិត្តំ បណីធេហិ, យត្ថ តេ វុសិតំ បុរេ’’តិ. –

អយំ គាថា កាមសគ្គេសុ និកន្តិំ ឧប្បាទេហីតិ តត្ថ ឧយ្យោជនវសេន ថេរិំ សមាបត្តិយា ចាវេតុកាមេន មារេន វុត្តា.

តត្ថ សហបុញ្ញការិនោ តេត្តិំស ជនា យត្ថ ឧបបន្នា, តំ ឋានំ តាវតិំសន្តិ. តត្ថ និព្ពត្តា សព្ពេបិ ទេវបុត្តា តាវតិំសា. កេចិ បន ‘‘តាវតិំសាតិ តេសំ ទេវានំ នាមមេវា’’តិ វទន្តិ. ទ្វីហិ ទេវលោកេហិ វិសិដ្ឋំ ទិព្ពំ សុខំ យាតា ឧបយាតា សម្បន្នាតិ យាមា. ទិព្ពាយ សម្បត្តិយា តុដ្ឋា បហដ្ឋាតិ តុសិតា. បកតិបដិយត្តារម្មណតោ អតិរេកេន រមិតុកាមតាកាលេ យថារុចិតេ ភោគេ និម្មិនិត្វា រមន្តីតិ និម្មានរតិនោ. ចិត្តរុចិំ ញត្វា បរេហិ និម្មិតេសុ ភោគេសុ វសំ វត្តេន្តីតិ វសវត្តិនោ. តត្ថ ចិត្តំ បណីធេហីតិ តស្មិំ តាវតិំសាទិកេ ទេវនិកាយេ តវ ចិត្តំ ឋបេហិ, ឧបបជ្ជនាយ និកន្តិំ ករោហិ. ចាតុមហារាជិកានំ ភោគា ឥតរេហិ និហីនាតិ អធិប្បាយេន តាវតិំសាទយោវ វុត្តា. យត្ថ តេ វុសិតំ បុរេតិ យេសុ ទេវនិកាយេសុ តយា បុព្ពេ វុត្ថំ. អយំ កិរ បុព្ពេ ទេវេសុ ឧប្បជ្ជន្តី, តាវតិំសតោ បដ្ឋាយ បញ្ចកាមសគ្គេ សោធេត្វា បុន ហេដ្ឋតោ ឱតរន្តី, តុសិតេសុ ឋត្វា តតោ ចវិត្វា ឥទានិ មនុស្សេសុ និព្ពត្តា.

តំ សុត្វា ថេរី – ‘‘តិដ្ឋតុ, មារ, តយា វុត្តកាមលោកោ. អញ្ញោបិ សព្ពោ លោកោ រាគគ្គិអាទីហិ អាទិត្តោ សម្បជ្ជលិតោ. ន តត្ថ វិញ្ញូនំ ចិត្តំ រមតី’’តិ កាមតោ ច លោកតោ ច អត្តនោ វិនិវត្តិតមានសតំ ទស្សេត្វា មារំ តជ្ជេន្តី –

១៩៨. យាមា ច‘‘តាវតិំសា ច យាមា ច, តុសិតា ចាបិ ទេវតា;

និម្មានរតិនោ ទេវា, យេ ទេវា វសវត្តិនោ.

១៩៩. ‘‘កាលំ កាលំ ភវា ភវំ, សក្កាយស្មិំ បុរក្ខតា;

អវីតិវត្តា សក្កាយំ, ជាតិមរណសារិនោ.

២០០. ‘‘សព្ពោ អាទីបិតោ លោកោ, សព្ពោ លោកោ បទីបិតោ;

សព្ពោ បជ្ជលិតោ លោកោ, សព្ពោ លោកោ បកម្បិតោ.

២០១. ‘‘អកម្បិយំ អតុលិយំ, អបុថុជ្ជនសេវិតំ;

ពុទ្ធោ ធម្មមទេសេសិ, តត្ថ មេ និរតោ មនោ.

២០២. ‘‘តស្សាហំ វចនំ សុត្វា, វិហរិំ សាសនេ រតា;

តិស្សោ វិជ្ជា អនុប្បត្តា, កតំ ពុទ្ធស្ស សាសនំ.

២០៣. ‘‘សព្ពត្ថ វិហតា នន្ទី, តមោក្ខន្ធោ បទាលិតោ;

ឯវំ ជានាហិ បាបិម, និហតោ ត្វមសិ អន្តកា’’តិ. –

ឥមា គាថា អភាសិ.

តត្ថ កាលំ កាលន្តិ តំ តំ កាលំ. ភវា ភវន្តិ ភវតោ ភវំ. សក្កាយស្មិន្តិ ខន្ធបញ្ចកេ. បុរក្ខតាតិ បុរក្ខារការិនោ. ឥទំ វុត្តំ ហោតិ – មារ, តយា វុត្តា តាវតិំសាទយោ ទេវា ភវតោ ភវំ ឧបគច្ឆន្តា អនិច្ចតាទិអនេកាទីនវាកុលេ សក្កាយេ បតិដ្ឋិតា, តស្មា តស្មិំ ភវេ ឧប្បត្តិកាលេ, វេមជ្ឈកាលេ, បរិយោសានកាលេតិ តស្មិំ តស្មិំ កាលេ សក្កាយមេវ បុរក្ខត្វា ឋិតា. តតោ ឯវ អវីតិវត្តា សក្កាយំ និស្សរណាភិមុខា អហុត្វា សក្កាយតីរមេវ អនុបរិធាវន្តា ជាតិមរណសារិនោ រាគាទីហិ អនុគតត្តា បុនប្បុនំ ជាតិមរណមេវ អនុស្សរន្តិ, តតោ ន វិមុច្ចន្តីតិ.

សព្ពោ អាទីបិតោ លោកោតិ, មារ, ន កេវលំ តយា វុត្តកាមលោកោយេវ ធាតុត្តយសញ្ញិតោ, សព្ពោបិ លោកោ រាគគ្គិអាទីហិ ឯកាទសហិ អាទិត្តោ. តេហិយេវ បុនប្បុនំ អាទីបិតតាយ បទីបិតោ. និរន្តរំ ឯកជាលីភូតតាយ បជ្ជលិតោ. តណ្ហាយ សព្ពកិលេសេហិ ច ឥតោ ចិតោ ច កម្បិតតាយ ចលិតតាយ បកម្បិតោ.

ឯវំ អាទិត្តេ បជ្ជលិតេ បកម្បិតេ ច លោកេ កេនចិបិ កម្បេតុំ ចាលេតុំ អសក្កុណេយ្យតាយ អកម្បិយំ, គុណតោ ‘‘ឯត្តកោ’’តិ តុលេតុំ អសក្កុណេយ្យតាយ អត្តនា សទិសស្ស អភាវតោ ច អតុលិយំ. ពុទ្ធាទីហិ អរិយេហិ ឯវ គោចរភាវនាភិគមតោ សេវិតត្តា អបុថុជ្ជនសេវិតំ. ពុទ្ធោ ភគវា មគ្គផលនិព្ពានប្បភេទំ នវវិធំ លោកុត្តរធម្មំ មហាករុណាយ សញ្ចោទិតមានសោ អទេសេសិ សទេវកស្ស លោកស្ស កថេសិ បវេទេសិ. តត្ថ តស្មិំ អរិយធម្មេ មយ្ហំ មនោ និរតោ អភិរតោ, ន តតោ វិនិវត្តតីតិ អត្ថោ. សេសំ ហេដ្ឋា វុត្តនយមេវ.

សីសូបចាលាថេរីគាថាវណ្ណនា និដ្ឋិតា.

អដ្ឋកនិបាតវណ្ណនា និដ្ឋិតា.