៧. គុត្តាថេរីគាថាវណ្ណនា

គុត្តេ យទត្ថំ បព្ពជ្ជាតិអាទិកា គុត្តាយ ថេរិយា គាថា. អយម្បិ បុរិមពុទ្ធេសុ កតាធិការា តត្ថ តត្ថ ភវេ វិវដ្ដូបនិស្សយំ កុសលំ ឧបចិនន្តី អនុក្កមេន សម្ភតវិមោក្ខសម្ភារា ហុត្វា, បរិបក្កកុសលមូលា សុគតីសុយេវ សំសរន្តី ឥមស្មិំ ពុទ្ធុប្បាទេ សាវត្ថិយំ ព្រាហ្មណកុលេ និព្ពត្តា, គុត្តាតិស្សា នាមំ អហោសិ. សា វិញ្ញុតំ បត្វា ឧបនិស្សយសម្បត្តិយា ចោទិយមានា ឃរាវាសំ ជិគុច្ឆន្តី មាតាបិតរោ អនុជានាបេត្វា មហាបជាបតិគោតមិយា សន្តិកេ បព្ពជិ. បព្ពជិត្វា ច វិបស្សនំ បដ្ឋបេត្វា ភាវនំ អនុយុញ្ជន្តិយា តស្សា ចិត្តំ ចិរកាលបរិចយេន ពហិទ្ធារម្មណេ វិធាវតិ, ឯកគ្គំ នាហោសិ. សត្ថា ទិស្វា តំ អនុគ្គណ្ហន្តោ, គន្ធកុដិយំ យថានិសិន្នោវ ឱភាសំ ផរិត្វា តស្សា អាសន្នេ អាកាសេ និសិន្នំ វិយ អត្តានំ ទស្សេត្វា ឱវទន្តោ –

១៦៣. ‘‘គុត្តេ យទត្ថំ បព្ពជ្ជា, ហិត្វា បុត្តំ វសុំ បិយំ;

តមេវ អនុព្រូហេហិ, មា ចិត្តស្ស វសំ គមិ.

១៦៤. ‘‘ចិត្តេន វញ្ចិតា សត្តា, មារស្ស វិសយេ រតា;

អនេកជាតិសំសារំ, សន្ធាវន្តិ អវិទ្ទសូ.

១៦៥. ‘‘កាមាច្ឆន្ទញ្ច ព្យាបាទំ, សក្កាយទិដ្ឋិមេវ ច;

សីលព្ពតបរាមាសំ, វិចិកិច្ឆំ ច បញ្ចមំ.

១៦៦. ‘‘សំយោជនានិ ឯតានិ, បជហិត្វាន ភិក្ខុនី;

ឱរម្ភាគមនីយានិ, នយិទំ បុនរេហិសិ.

១៦៧. ‘‘រាគំ មានំ អវិជ្ជញ្ច, ឧទ្ធច្ចញ្ច វិវជ្ជិយ;

សំយោជនានិ ឆេត្វាន, ទុក្ខស្សន្តំ ករិស្សសិ.

១៦៨. ‘‘ខេបេត្វា ជាតិសំសារំ, បរិញ្ញាយ បុនព្ភវំ;

ទិដ្ឋេវ ធម្មេ និច្ឆាតា, ឧបសន្តា ចរិស្សសី’’តិ. – ឥមា គាថា អាភាសិ;

តត្ថ តមេវ អនុព្រូហេហីតិ យទត្ថំ យស្ស កិលេសបរិនិព្ពានស្ស ខន្ធបរិនិព្ពានស្ស ច អត្ថាយ. ហិត្វា បុត្តំ វសុំ បិយន្តិ បិយាយិតព្ពំ ញាតិបរិវដ្ដំ ភោគក្ខន្ធញ្ច ហិត្វា មម សាសនេ បព្ពជ្ជា ព្រហ្មចរិយវាសោ ឥច្ឆិតោ, តមេវ វឌ្ឍេយ្យាសិ សម្បាទេយ្យាសិ. មា ចិត្តស្ស វសំ គមីតិ ទីឃរត្តំ រូបាទិអារម្មណវសេន វឌ្ឍិតស្ស កូដចិត្តស្ស វសំ មា គច្ឆិ.

យស្មា ចិត្តំ នាមេតំ មាយូបមំ, យេន វញ្ចិតា អន្ធបុថុជ្ជនា មារវសានុគា សំសារំ នាតិវត្តន្តិ. តេន វុត្តំ ‘‘ចិត្តេន វញ្ចិតា’’តិអាទិ.

សំយោជនានិ ឯតានីតិ ឯតានិ ‘‘កាមច្ឆន្ទញ្ច ព្យាបាទ’’ន្តិអាទិនា យថាវុត្តានិ បញ្ច ពន្ធនដ្ឋេន សំយោជនានិ. បជហិត្វានាតិ អនាគាមិមគ្គេន សមុច្ឆិន្ទិត្វា. ភិក្ខុនីតិ តស្សា អាលបនំ. ឱរម្ភាគមនីយានីតិ រូបារូបធាតុតោ ហេដ្ឋាភាគេ កាមធាតុយំ មនុស្សជីវស្ស ហិតានិ ឧបការានិ តត្ថ បដិសន្ធិយា បច្ចយភាវតោ. ម-ការោ បទសន្ធិករោ. ‘‘ឱរមាគមនីយានី’’តិ បាឡិ, សោ ឯវត្ថោ. នយិទំ បុនរេហិសីតិ ឱរម្ភាគិយានំ សំយោជនានំ បហានេន ឥទំ កាមដ្ឋានំ កាមភវំ បដិសន្ធិវសេន បុន នាគមិស្សសិ. រ-ការោ បទសន្ធិករោ. ‘‘ឥត្ថ’’ន្តិ វា បាឡិ, ឥត្ថត្តំ កាមភវមិច្ចេវ អត្ថោ.

រាគន្តិ រូបរាគញ្ច អរូបរាគញ្ច. មានន្តិ អគ្គមគ្គវជ្ឈំ មានំ. អវិជ្ជញ្ច ឧទ្ធច្ចញ្ចាតិ ឯត្ថាបិ ឯសេវ នយោ. វិវជ្ជិយាតិ វិបស្សនាយ វិក្ខម្ភេត្វា. សំយោជនានិ ឆេត្វានាតិ ឯតានិ រូបរាគាទីនិ បញ្ចុទ្ធម្ភាគិយានិ សំយោជនានិ អរហត្តមគ្គេន សមុច្ឆិន្ទិត្វា. ទុក្ខស្សន្តំ ករិស្សសីតិ សព្ពស្សាបិ វដ្ដទុក្ខស្ស បរិយន្តំ បរិយោសានំ បាបុណិស្សសិ.

ខេបេត្វា ជាតិសំសារន្តិ ជាតិ សមូលិកសំសារបវត្តិំ បរិយោសាបេត្វា. និច្ឆាតាតិ និត្តណ្ហា. ឧបសន្តាតិ សព្ពសោ កិលេសានំ វូបសមេន ឧបសន្តា. សេសំ វុត្តនយមេវ.

ឯវំ សត្ថារា ឥមាសុ គាថាសុ ភាសិតាសុ គាថាបរិយោសានេ ថេរី សហ បដិសម្ភិទាហិ អរហត្តំ បត្វា ឧទានវសេន ភគវតា ភាសិតនិយាមេនេវ ឥមា គាថា អភាសិ. តេនេវ តា ថេរិយា គាថា នាម ជាតា.

គុត្តាថេរីគាថាវណ្ណនា និដ្ឋិតា.