៥. ចិត្តាថេរីគាថាវណ្ណនា

កិញ្ចាបិ ខោម្ហិ កិសិកាតិអាទិកា ចិត្តាយ ថេរិយា គាថា. អយម្បិ បុរិមពុទ្ធេសុ កតាធិការា តត្ថ តត្ថ ភវេ វិវដ្ដូបនិស្សយំ កុសលំ ឧបចិនន្តី ឥតោ ចតុន្នវុតិកប្បេ ចន្ទភាគាយ នទិយា តីរេ កិន្នរយោនិយំ និព្ពត្តិ. សា ឯកទិវសំ ឯកំ បច្ចេកពុទ្ធំ រុក្ខមូលេ និសិន្នំ ទិស្វា បសន្នមានសា នឡបុប្ផេហិ បូជំ កត្វា វន្ទិត្វា អញ្ជលិំ បគ្គហេត្វា បទក្ខិណំ កត្វា បក្កាមិ. សា តេន បុញ្ញកម្មេន ទេវមនុស្សេសុ សំសរន្តី ឥមស្មិំ ពុទ្ធុប្បាទេ រាជគហេ គហបតិមហាសាលកុលេ និព្ពត្តិត្វា វិញ្ញុតំ បត្វា សត្ថុ រាជគហប្បវេសនេ បដិលទ្ធសទ្ធា បច្ឆា មហាបជាបតិគោតមិយា សន្តិកេ បព្ពជិត្វា មហល្លិកាកាលេ គិជ្ឈកូដបព្ពតំ អភិរុហិត្វា សមណធម្មំ ករោន្តី វិបស្សនំ វឌ្ឍេត្វា សហ បដិសម្ភិទាហិ អរហត្តំ បាបុណិ. តេន វុត្តំ អបទានេ –

‘‘ចន្ទភាគានទីតីរេ, អហោសិំ កិន្នរី តទា;

អទ្ទសំ វិរជំ ពុទ្ធំ, សយម្ភុំ អបរាជិតំ.

‘‘បសន្នចិត្តា សុមនា, វេទជាតា កតញ្ជលី;

នឡមាលំ គហេត្វាន, សយម្ភុំ អភិបូជយិំ.

‘‘តេន កម្មេន សុកតេន, ចេតនាបណិធីហិ ច;

ជហិត្វា កិន្នរីទេហំ, អគច្ឆិំ តិទសំ គតិំ.

‘‘ឆត្តិំសទេវរាជូនំ, មហេសិត្តមការយិំ;

ទសន្នំ ចក្កវត្តីនំ, មហេសិត្តមការយិំ;

សំវេជេត្វាន មេ ចិត្តំ, បព្ពជិំ អនគារិយំ.

‘‘កិលេសា ឈាបិតា មយ្ហំ, ភវា សព្ពេ សមូហតា;

សព្ពាសវបរិក្ខីណា, នត្ថិ ទានិ បុនព្ភវោ.

‘‘ចតុន្នវុតិតោ កប្បេ, យំ បុប្ផមភិបូជយិំ;

ទុគ្គតិំ នាភិជានាមិ, បុប្ផបូជាយិទំ ផលំ.

‘‘កិលេសា ឈាបិតា មយ្ហំ…បេ… កតំ ពុទ្ធស្ស សាសន’’ន្តិ.

សា បន អរហត្តំ បត្វា អត្តនោ បដិបត្តិំ បច្ចវេក្ខិត្វា –

២៧. ‘‘កិញ្ចាបិ ខោម្ហិ កិសិកា, គិលានា ពាឡ្ហទុព្ពលា;

ទណ្ឌមោលុព្ភ គច្ឆាមិ, បព្ពតំ អភិរូហិយ.

២៨. ‘‘សង្ឃាដិំ និក្ខិបិត្វាន, បត្តកញ្ច និកុជ្ជិយ;

សេលេ ខម្ភេសិមត្តានំ, តមោខន្ធំ បទាលិយា’’តិ. –

ឥមា ទ្វេ គាថា អភាសិ.

តត្ថ កិញ្ចាបិ ខោម្ហិ កិសិកាតិ យទិបិ អហំ ជរាជិណ្ណា អប្បមំសលោហិតភាវេន កិសសរីរា អម្ហិ. គិលានា ពាឡ្ហទុព្ពលាតិ ធាត្វាទិវិការេន គិលានា, តេនេវ គេលញ្ញេន អតិវិយ ទុព្ពលា. ទណ្ឌមោលុព្ភ គច្ឆាមីតិ យត្ថ កត្ថចិ គច្ឆន្តី កត្តរយដ្ឋិំ អាលម្ពិត្វាវ គច្ឆាមិ. បព្ពតំ អភិរូហិយាតិ ឯវំ ភូតាបិ វិវេកកាមតាយ គិជ្ឈកូដបព្ពតំ អភិរុហិត្វា.

សង្ឃាដិំ និក្ខិបិត្វានាតិ សន្តរុត្តរា ឯវ ហុត្វា យថាសំហតំ អំសេ ឋបិតំ សង្ឃាដិំ ហត្ថបាសេ ឋបេត្វា. បត្តកញ្ច និកុជ្ជិយាតិ មយ្ហំ វលញ្ជនមត្តិកាបត្តំ អធោមុខំ កត្វា ឯកមន្តេ ឋបេត្វា. សេលេ ខម្ភេសិមត្តានំ, តមោខន្ធំ បទាលិយាតិ បព្ពតេ និសិន្នា ឥមិនា ទីឃេន អទ្ធុនា អបទាលិតបុព្ពំ មោហក្ខន្ធំ បទាលេត្វា, តេនេវ ច មោហក្ខន្ធបទាលនេន អត្តានំ អត្តភាវំ ខម្ភេសិំ, មម សន្តានំ អាយតិំ អនុប្បត្តិធម្មតាបាទនេន វិក្ខម្ភេសិន្តិ អត្ថោ.

ចិត្តាថេរីគាថាវណ្ណនា និដ្ឋិតា.