៩. តោទេយ្យមាណវសុត្តនិទ្ទេសវណ្ណនា

៥៧. នវមេ តោទេយ្យសុត្តេ – វិមោក្ខោ តស្ស កីទិសោតិ តស្ស កីទិសោ វិមោក្ខោ ឥច្ឆិតព្ពោតិ បុច្ឆតិ.

៥៨. ឥទានិស្ស អញ្ញវិមោក្ខាភាវំ ទស្សេន្តោ ភគវា ទុតិយំ គាថមាហ. តត្ថ វិមោក្ខោ តស្ស នាបរោតិ តស្ស អញ្ញោ វិមោក្ខោ នត្ថិ.

៥៩. ឯវំ ‘‘តណ្ហក្ខយោ ឯវ វិមោក្ខោ’’តិ វុត្តេបិ តមត្ថំ អសល្លក្ខេន្តោ ‘‘និរាសសោ សោ ឧទ អាសសានោ’’តិ បុន បុច្ឆតិ. តត្ថ ឧទ បញ្ញកប្បីតិ ឧទាហុ សមាបត្តិញាណាទិនា ញាណេន តណ្ហាកប្បំ វា ទិដ្ឋិកប្បំ វា កប្បយតិ.

៦០. អថស្ស ភគវា តំ អាចិក្ខន្តោ ចតុត្ថំ គាថមាហ. តត្ថ កាមភវេតិ កាមេ ច ភវេ ច.

រូបេ នាសីសតីតិ ចតុសមុដ្ឋានិកេ រូបារម្មណេ ឆន្ទរាគវសេន ន បត្ថេតិ. សទ្ធាទីសុបិ ឯសេវ នយោ. បលិពោធដ្ឋេន រាគោ ឯវ កិញ្ចនំ រាគកិញ្ចនំ មទនដ្ឋេន វា. ទោសកិញ្ចនាទីសុបិ ឯសេវ នយោ. សេសំ សព្ពត្ថ បាកដមេវ.

ឯវំ ភគវា ឥទម្បិ សុត្តំ អរហត្តនិកូដេនេវ ទេសេសិ, ទេសនាបរិយោសានេ ច បុព្ពសទិសោ ឯវ ធម្មាភិសមយោ អហោសីតិ.

សទ្ធម្មប្បជ្ជោតិកាយ ចូឡនិទ្ទេស-អដ្ឋកថាយ

តោទេយ្យមាណវសុត្តនិទ្ទេសវណ្ណនា និដ្ឋិតា.