៦. ទុតិយសីលសុត្តវណ្ណនា

៣៣. ឆដ្ឋេ ភទ្ទកេន ច សីលេនាតិ កាយសុចរិតាទិចតុបារិសុទ្ធិសីលេន. តញ្ហិ អខណ្ឌាទិសីលភាវេន សយញ្ច កល្យាណំ, សមថវិបស្សនាទិកល្យាណគុណាវហំ ចាតិ ‘‘ភទ្ទក’’ន្តិ វុច្ចតិ. ភទ្ទិកាយ ច ទិដ្ឋិយាតិ កម្មស្សកតាញាណេន ចេវ កម្មបថសម្មាទិដ្ឋិយា ច. តត្ថ ភទ្ទកេន សីលេន បយោគសម្បន្នោ ហោតិ, ភទ្ទិកាយ ទិដ្ឋិយា អាសយសម្បន្នោ. ឥតិ បយោគាសយសម្បន្នោ បុគ្គលោ សគ្គូបគោ ហោតិ. តេន វុត្តំ – ‘‘ឥមេហិ, ខោ, ភិក្ខវេ, ទ្វីហិ ធម្មេហិ សមន្នាគតោ បុគ្គលោ យថាភតំ និក្ខិត្តោ, ឯវំ សគ្គេ’’តិ. សប្បញ្ញោតិ បញ្ញវា. សេសំ សុវិញ្ញេយ្យមេវ.

ឆដ្ឋសុត្តវណ្ណនា និដ្ឋិតា.