៨. នាគសមាលវគ្គោ

១. នាគសមាលត្ថេរអបទានវណ្ណនា

អាបាដលិំ អហំ បុប្ផន្តិអាទិកំ អាយស្មតោ នាគសមាលត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិខិស្ស ភគវតោ កាលេ ឯកស្មិំ កុលគេហេ និព្ពត្តោ វិញ្ញុតំ បត្តោ ឃរាវាសំ សណ្ឋបេត្វា តថារូបសជ្ជនសំសគ្គស្ស អលាភេន សត្ថរិ ធរមានកាលេ ទស្សនសវនបូជាកម្មមករិត្វា បរិនិព្ពុតកាលេ តស្ស ភគវតោ សារីរិកធាតុំ និទហិត្វា កតចេតិយម្ហិ ចិត្តំ បសាទេត្វា បាដលិបុប្ផំ បូជេត្វា សោមនស្សំ ឧប្បាទេត្វា យាវតាយុកំ ឋត្វា តេនេវ សោមនស្សេន តតោ កាលំ កតោ តុសិតាទីសុ ឆសុ ទេវលោកេសុ សុខមនុភវិត្វា អបរភាគេ មនុស្សេសុ មនុស្សសម្បត្តិំ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បត្តោ នាគរុក្ខបល្លវកោមឡសទិសសរីរត្តា នាគសមាលោតិ មាតាបិតូហិ កតនាមធេយ្យោ ភគវតិ បសន្នោ បព្ពជិត្វា នចិរស្សេវ អរហា អហោសិ.

១. សោ បច្ឆា អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ អាបាដលិំ អហំ បុប្ផន្តិអាទិមាហ. តត្ថ អាបាដលិន្តិ អា សមន្តតោ, អាទរេន វា បាដលិបុប្ផំ គហេត្វា អហំ ថូបម្ហិ អភិរោបេសិំ បូជេសិន្តិ អត្ថោ. ឧជ្ឈិតំ សុមហាបថេតិ សព្ពនគរវាសីនំ វន្ទនបូជនត្ថាយ មហាបថេ នគរមជ្ឈេ វីថិយំ ឧជ្ឈិតំ ឧដ្ឋាបិតំ, ឥដ្ឋកកម្មសុធាកម្មាទីហិ និប្ផាទិតន្តិ អត្ថោ. សេសំ ហេដ្ឋា វុត្តនយត្តា ឧត្តានត្ថត្តា ច សុវិញ្ញេយ្យមេវាតិ.

នាគសមាលត្ថេរអបទានវណ្ណនា សមត្តា.

២. បទសញ្ញកត្ថេរអបទានវណ្ណនា

អក្កន្តញ្ច បទំ ទិស្វាតិអាទិកំ អាយស្មតោ បទសញ្ញកត្ថេរស្ស អបទានំ. អយម្បិ បុរិមពុទ្ធេសុ កតាធិការោ ឧប្បន្នុប្បន្នភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ សទ្ធាសម្បន្នេ ឧបាសកគេហេ និព្ពត្តោ វិញ្ញុតំ បត្តោ រតនត្តយេ បសន្នោ ភគវតា តស្ស អនុកម្បាយ ទស្សិតំ បទចេតិយំ ទិស្វា បសន្នោ លោមហដ្ឋជាតោ វន្ទនបូជនាទិពហុមានមកាសិ. សោ តេនេវ សុខេត្តេ សុកតេន បុញ្ញេន តតោ ចុតោ សគ្គេ និព្ពត្តោ តត្ថ ទិព្ពសុខមនុភវិត្វា អបរភាគេ មនុស្សេសុ ជាតោ មនុស្សសម្បត្តិំ សព្ពមនុភវិត្វា ឥមស្មិំ ពុទ្ធុប្បាទេ វិភវសម្បន្នកុលេ និព្ពត្តោ វុទ្ធិមន្វាយ សទ្ធាជាតោ បព្ពជិត្វា នចិរស្សេវ អរហា អហោសិ, បុរាកតបុញ្ញនាមេន បទសញ្ញកត្ថេរោតិ បាកដោ.

៥. សោ ឯកទិវសំ អត្តនោ បុព្ពកម្មំ សរិត្វា បុព្ពចរិតាបទានំ បកាសេន្តោ អក្កន្តញ្ច បទំ ទិស្វាតិអាទិមាហ. តត្ថ អក្កន្តន្តិ អក្កមិតំ ទស្សិតំ. សព្ពពុទ្ធានំ សព្ពទា ចតុរង្គុលោបរិយេវ គមនំ, អយំ បន តស្ស សទ្ធាសម្បន្នតំ ញត្វា ‘‘ឯសោ ឥមំ បស្សតូ’’តិ បទចេតិយំ ទស្សេសិ, តស្មា សោ តស្មិំ បសីទិត្វា វន្ទនបូជនាទិសក្ការមកាសីតិ អត្ថោ. សេសំ សព្ពត្ថ ឧត្តានត្ថមេវាតិ.

បទសញ្ញកត្ថេរអបទានវណ្ណនា សមត្តា.

៣. ពុទ្ធសញ្ញកត្ថេរអបទានវណ្ណនា

ទុមគ្គេ បំសុកូលិកន្តិអាទិកំ អាយស្មតោ ពុទ្ធសញ្ញកត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ កុលគេហេ និព្ពត្តោ វុទ្ធិប្បត្តោ សទ្ធាជាតោ ទុមគ្គេ លគ្គិតំ ភគវតោ បំសុកូលចីវរំ ទិស្វា បសន្នមានសោ ‘‘អរហទ្ធជ’’ន្តិ ចិន្តេត្វា វន្ទនបូជនាទិសក្ការមកាសិ. សោ តេន បុញ្ញកម្មេន ទេវមនុស្សសម្បត្តិមនុភវិត្វា ឥមស្មិំ ពុទ្ធុប្បាទេ វិភវសម្បន្នេ ឯកស្មិំ កុលគេហេ និព្ពត្តោ សទ្ធាជាតោ បព្ពជិត្វា នចិរស្សេវ អរហា អហោសិ.

៩. សោ បត្តអរហត្តាធិគមោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ទុមគ្គេ បំសុកូលិកន្តិអាទិមាហ. តត្ថ ធុនាតិ កម្បតីតិ ទុមោ. ទុហតិ បូរេតិ អាកាសតលន្តិ វា ទុមោ, ទុមស្ស អគ្គោ កោដីតិ ទុមគ្គោ, តស្មិំ ទុមគ្គេ. បំសុមិវ បដិក្កូលភាវំ អមនុញ្ញភាវំ ឧលតិ គច្ឆតីតិ បំសុកូលំ, បំសុកូលមេវ បំសុកូលិកំ, សត្ថុនោ បំសុកូលំ ទុមគ្គេ លគ្គិតំ ទិស្វា អហំ អញ្ជលិំ បគ្គហេត្វា តំ បំសុកូលំ អវន្ទិំ បណាមមកាសិន្តិ អត្ថោ. តន្តិ និបាតមត្តំ. សេសំ សព្ពត្ថ ឧត្តានត្ថមេវាតិ.

ពុទ្ធសញ្ញកត្ថេរអបទានវណ្ណនា សមត្តា.

៤. ភិសាលុវទាយកត្ថេរអបទានវណ្ណនា

កាននំ វនមោគ្គយ្ហាតិអាទិកំ អាយស្មតោ ភិសាលុវទាយកត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ ហិមវន្តស្ស សមីបេ អរញ្ញាវាសេ វសន្តោ វនមូលផលាហារោ វិវេកវសេនាគតំ វិបស្សិំ ភគវន្តំ ទិស្វា បសន្នមានសោ បញ្ចភិសាលុវេ អទាសិ. ភគវា តស្ស ចិត្តំ បសាទេតុំ បស្សន្តស្សេវ បរិភុញ្ជិ. សោ តេន ចិត្តប្បសាទេន កាលំ កត្វា តុសិតាទីសុ សម្បត្តិមនុភវិត្វា បច្ឆា មនុស្សសម្បត្តិញ្ច អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វិភវសម្បត្តិំ បត្តោ តំ បហាយ សាសនេ បព្ពជិតោ នចិរស្សេវ អរហត្តំ បាបុណិ.

១៣. សោ តតោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ កាននំ វនមោគ្គយ្ហាតិអាទិមាហ. តំ ហេដ្ឋា វុត្តត្ថមេវ. វសាមិ វិបិនេ អហន្តិ វិវេកវាសោ អហំ វសាមីតិ សម្ពន្ធោ. សេសំ ឧត្តានត្ថមេវាតិ.

ភិសាលុវទាយកត្ថេរអបទានវណ្ណនា សមត្តា.

ឆដ្ឋភាណវារវណ្ណនា និដ្ឋិតា.

៥. ឯកសញ្ញកត្ថេរអបទានវណ្ណនា

ខណ្ឌោ នាមាសិ នាមេនាតិអាទិកំ អាយស្មតោ ឯកសញ្ញកត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វិបស្សិស្ស ភគវតោ កាលេ កុលគេហេ និព្ពត្តោ វិញ្ញុតំ បត្តោ រតនត្តយេ បសន្នមានសោ តស្ស សត្ថុនោ ខណ្ឌំ នាម អគ្គសាវកំ ភិក្ខាយ ចរមានំ ទិស្វា សទ្ទហិត្វា បិណ្ឌបាតមទាសិ. សោ តេន បុញ្ញកម្មេន ទេវមនុស្សសម្បត្តិយោ អនុភវិត្វា ឥមស្មិំ ពុទ្ធុប្បាទេ សាវត្ថិយំ ឯកស្មិំ កុលគេហេ និព្ពត្តោ វិញ្ញុតំ បត្តោ សត្ថុ ធម្មទេសនំ សុត្វា បដិលទ្ធសទ្ធោ បព្ពជិត្វា នចិរស្សេវ អរហា អហោសិ. សោ ឯកទិវសំ បិណ្ឌបាតស្ស សញ្ញំ មនសិករិត្វា បដិលទ្ធវិសេសត្តា ឯកសញ្ញកត្ថេរោតិ បាកដោ.

១៨. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ខណ្ឌោ នាមាសិ នាមេនាតិអាទិមាហ. តត្ថ តស្ស អគ្គសាវកត្ថេរស្ស កិលេសានំ ខណ្ឌិតត្តា ខណ្ឌោតិ នាមំ. សេសំ សព្ពត្ថ ឧត្តានមេវាតិ.

ឯកសញ្ញកត្ថេរអបទានវណ្ណនា សមត្តា.

៦. តិណសន្ថរទាយកត្ថេរអបទានវណ្ណនា

ហិមវន្តស្សាវិទូរេតិអាទិកំ អាយស្មតោ តិណសន្ថរទាយកត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ កុលគេហេ និព្ពត្តោ ពុទ្ធុប្បាទតោ បគេវ ឧប្បន្នត្តា ឃរាវាសំ បហាយ តាបសបព្ពជ្ជំ បព្ពជិត្វា ហិមវន្តស្ស អវិទូរេ ឯកំ សរំ និស្សាយ បដិវសតិ. តស្មិំ សមយេ តិស្សោ ភគវា តស្សានុកម្បាយ អាកាសេន អគមាសិ. អថ ខោ សោ តាបសោ អាកាសតោ ឱរុយ្ហ ឋិតំ តំ ភគវន្តំ ទិស្វា បសន្នមានសោ តិណំ លាយិត្វា តិណសន្ថរំ កត្វា និសីទាបេត្វា ពហុមានាទរេន បញ្ចបតិដ្ឋិតេន វន្ទិត្វា បដិកុដិកោ ហុត្វា បក្កាមិ. សោ យាវតាយុកំ ឋត្វា តតោ ចវិត្វា ទេវមនុស្សេសុ សំសរន្តោ អនេកវិធសម្បត្តិំ អនុភវិត្វា ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិប្បត្តោ សត្ថរិ បសីទិត្វា បព្ពជិតោ នចិរស្សេវ អរហា អហោសិ.

២២. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ហិមវន្តស្សាវិទូរេតិអាទិមាហ. តំ ហេដ្ឋា វុត្តត្ថមេវ. មហាជាតស្សរោតិ ឯត្ថ បន សរន្តិ ឯត្ថ បានីយត្ថិកា ទ្វិបទចតុប្បទាទយោ សត្តាតិ សរំ, អថ វា សរន្តិ ឯត្ថ នទីកន្ទរាទយោតិ សរំ, មហន្តោ ច សោ សយមេវ ជាតត្តា សរោ ចេតិ មហាជាតស្សរោ. អនោតត្តឆទ្ទន្តទហាទយោ វិយ អបាកដនាមត្តា ‘‘មហាជាតស្សរោ’’តិ វុត្តោតិ ទដ្ឋព្ពោ. សតបត្តេហិ សញ្ឆន្នោតិ ឯកេកស្មិំ បុប្ផេ សតសតបត្តានំ វសេន សតបត្តោ, សតបត្តសេតបទុមេហិ សញ្ឆន្នោ គហនីភូតោតិ អត្ថោ. នានាសកុណមាលយោតិ អនេកេ ហំសកុក្កុដកុក្កុហទេណ្ឌិភាទយោ ឯកតោ កុណន្តិ សទ្ទំ ករោន្តីតិ សកុណាតិ លទ្ធនាមានំ បក្ខីនំ អាលយោ អាធារភូតោតិ អត្ថោ. សេសំ សព្ពត្ថ ឧត្តានត្ថមេវាតិ.

តិណសន្ថរទាយកត្ថេរអបទានវណ្ណនា សមត្តា.

៧. សូចិទាយកត្ថេរអបទានវណ្ណនា

តិំសកប្បសហស្សម្ហីតិអាទិកំ អាយស្មតោ សូចិទាយកត្ថេរស្ស អបទានំ. អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សុមេធស្ស ភគវតោ កាលេ ឯកស្មិំ កុលគេហេ និព្ពត្តោ វុទ្ធិមន្វាយ ភគវតោ ចីវរកម្មំ កាតុំ បញ្ច សូចិយោ អទាសិ. សោ តេន បុញ្ញេន ទេវមនុស្សេសុ បុញ្ញមនុភវិត្វា វិចរន្តោ ឧប្បន្នុប្បន្នភវេ តិក្ខបញ្ញោ ហុត្វា បាកដោ ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិមន្វាយ សត្ថរិ បសីទិត្វា បព្ពជន្តោ តិក្ខបញ្ញតាយ ខុរគ្គេយេវ អរហត្តំ បាបុណិ.

៣០. សោ អបរភាគេ បុញ្ញំ បច្ចវេក្ខន្តោ តំ ទិស្វា សោមនស្សជាតោ បុព្ពចរិតាបទានំ បកាសេន្តោ តិំសកប្បសហស្សម្ហីតិអាទិមាហ. អន្តរន្តរំ បនេត្ថ សុវិញ្ញេយ្យមេវ.

៣១. បញ្ចសូចី មយា ទិន្នាតិ ឯត្ថ សូចតិ ឆិទ្ទំ ករោតិ វិជ្ឈតីតិ សូចិ, បញ្ចមត្តា សូចី បញ្ចសូចី មយា ទិន្នាតិ អត្ថោ. សេសំ សុវិញ្ញេយ្យមេវាតិ.

សូចិទាយកត្ថេរអបទានវណ្ណនា សមត្តា.

៨. បាដលិបុប្ផិយត្ថេរអបទានវណ្ណនា

សុវណ្ណវណ្ណំ សម្ពុទ្ធន្តិអាទិកំ អាយស្មតោ បាដលិបុប្ផិយត្ថេរស្ស អបទានំ. អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ កុលគេហេ សេដ្ឋិបុត្តោ ហុត្វា និព្ពត្តោ វុទ្ធិប្បត្តោ កុសលាកុសលញ្ញូ សត្ថរិ បសីទិត្វា បាដលិបុប្ផំ គហេត្វា សត្ថុ បូជេសិ. សោ តេន បុញ្ញេន ពហុធា សុខសម្បត្តិយោ អនុភវន្តោ ទេវមនុស្សេសុ សំសរន្តោ ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិមន្វាយ សត្ថរិ បសន្នោ បព្ពជិត្វា នចិរស្សេវ អរហា អហោសិ.

៣៦. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ សុវណ្ណវណ្ណំ សម្ពុទ្ធន្តិអាទិមាហ. តត្ថ អន្តរាបណេតិ អា សមន្តតោ ហិរញ្ញសុវណ្ណាទិកំ ភណ្ឌំ បណេន្តិ វិក្កិណន្តិ បត្ថរន្តិ ឯត្ថាតិ អាបណំ, អាបណស្ស អន្តរំ វីថីតិ អន្តរាបណំ, តស្មិំ អន្តរាបណេ. សុវណ្ណវណ្ណំ កញ្ចនគ្ឃិយសំកាសំ ទ្វត្តិំសវរលក្ខណំ សម្ពុទ្ធំ ទិស្វា បាដលិបុប្ផំ បូជេសិន្តិ អត្ថោ. សេសំ សព្ពត្ថ ឧត្តានត្ថមេវាតិ.

បាដលិបុប្ផិយត្ថេរអបទានវណ្ណនា សមត្តា.

៩. ឋិតញ្ជលិយត្ថេរអបទានវណ្ណនា

មិគលុទ្ទោ បុរេ អាសិន្តិអាទិកំ អាយស្មតោ ឋិតញ្ជលិយត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថុប្បន្នភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ បុរាកតេន ឯកេន កម្មច្ឆិទ្ទេន នេសាទយោនិយំ និព្ពត្តិត្វា វិញ្ញុតំ បត្តោ មិគសូករាទយោ មារេត្វា នេសាទកម្មេន អរញ្ញេ វាសំ កប្បេសិ. តស្មិំ សមយេ តិស្សោ ភគវា តស្សានុកម្បាយ ហិមវន្តំ អគមាសិ. សោ តំ ទ្វត្តិំសវរលក្ខណេហិ អសីតានុព្យញ្ជនព្យាមប្បភាហិ ច ជលមានំ ភគវន្តំ ទិស្វា សោមនស្សជាតោ បណាមំ កត្វា គន្ត្វា បណ្ណសន្ថរេ និសីទិ. តស្មិំ ខណេ ទេវោ គជ្ជន្តោ អសនិ បតិ, តតោ មរណសមយេ ពុទ្ធមនុស្សរិត្វា បុនញ្ជលិមកាសិ. សោ តេន បុញ្ញេន សុខេត្តេ កតកុសលត្តា អកុសលវិបាកំ បដិពាហិត្វា សគ្គេ និព្ពត្តោ កាមាវចរសម្បត្តិយោ អនុភវិត្វា មនុស្សេសុ មនុស្សសម្បត្តិយោ ច អនុភវិត្វា អបរភាគេ ឥមស្មិំ ពុទ្ធុប្បាទេ ឯកស្មិំ កុលគេហេ និព្ពត្តោ វុទ្ធិមន្វាយ បុរាកតវាសនាយ សត្ថរិ បសីទិត្វា បព្ពជិតោ នចិរស្សេវ អរហា អហោសិ.

៤២. សោ តតោ បរំ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ មិគលុទ្ទោ បុរេ អាសិន្តិអាទិមាហ. តត្ថ មិគលុទ្ទោតិ មិគានំ មារណំ ឧបគច្ឆតីតិ មិគលុទ្ទោ. មិគន្តិ សីឃំ វាតវេគេន គច្ឆន្តិ ធាវន្តីតិ មិគា, តេសំ មិគានំ មារណេ លុទ្ទោ ទារុណោ លោភីតិ មិគលុទ្ទោ. សោ អហំ បុរេ ភគវតោ ទស្សនសមយេ មិគលុទ្ទោ អាសិំ អហោសិន្តិ អត្ថោ. អរញ្ញេ កាននេតិ អរតិ គច្ឆតិ មិគសមូហោ ឯត្ថាតិ អរញ្ញំ, អថ វា អា សមន្តតោ រជ្ជន្តិ តត្ថ វិវេកាភិរតា ពុទ្ធបច្ចេកពុទ្ធាទយោ មហាសារប្បត្តា សប្បុរិសាតិ អរញ្ញំ. កា កុច្ឆិតាការេន វា ភយានកាការេន វា នទន្តិ សទ្ទំ ករោន្តិ, អានន្តិ វិន្ទន្តីតិ វា កាននំ, តស្មិំ អរញ្ញេ កាននេ មិគលុទ្ទោ បុរេ អាសិន្តិ សម្ពន្ធោ. តត្ថ អទ្ទសំ សម្ពុទ្ធន្តិ តត្ថ តស្មិំ អរញ្ញេ ឧបគតំ សម្ពុទ្ធំ អទ្ទសំ អទ្ទក្ខិន្តិ អត្ថោ. ទស្សនំ បុរេ អហោសិ អវិទូរេ, តស្មា មនោទ្វារានុសារេន ចក្ខុវិញ្ញាណំ បុរេចារិកំ កាយវិញ្ញាណសមង្គិំ បាបេតិ អប្បេតីតិ អត្ថោ.

៤៤. តតោ មេ អសនីបាតោតិ អា សមន្តតោ សនន្តោ គជ្ជន្តោ បតតីតិ អសនិ, អសនិយា បាតោ បតនំ អសនីបាតោ, ទេវទណ្ឌោតិ អត្ថោ. សេសំ សព្ពត្ថ ឧត្តានត្ថមេវាតិ.

ឋិតញ្ជលិយត្ថេរអបទានវណ្ណនា សមត្តា.

១០. តិបទុមិយត្ថេរអបទានវណ្ណនា

បទុមុត្តរោ នាម ជិនោតិអាទិកំ អាយស្មតោ តិបទុមិយត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ ហំសវតិយំ មាលាការកុលគេហេ និព្ពត្តោ វុទ្ធិប្បត្តោ មាលាការកម្មំ កត្វា វសន្តោ ឯកទិវសំ អនេកវិធានិ ជលជថលជបុប្ផានិ គហេត្វា រញ្ញោ សន្តិកំ គន្តុកាមោ ឯវំ ចិន្តេសិ – ‘‘រាជា ឥមានិ តាវ បុប្ផានិ ទិស្វា បសន្នោ សហស្សំ វា ធនំ គាមាទិកំ វា ទទេយ្យ, លោកនាថំ បន បូជេត្វា និព្ពានាមតធនំ លភាមិ, កិំ មេ ឯតេសុ សុន្ទរ’’ន្តិ តេន ‘‘ភគវន្តំ បូជេត្វា សគ្គមោក្ខសម្បត្តិយោ និប្ផាទេតុំ វដ្ដតី’’តិ ចិន្តេត្វា វណ្ណវន្តំ អតីវ រត្តបុប្ផត្តយំ គហេត្វា បូជេសិ. តានិ គន្ត្វា អាកាសំ ឆាទេត្វា បត្ថរិត្វា អដ្ឋំសុ. នគរវាសិនោ អច្ឆរិយព្ភុតចិត្តជាតា ចេលុក្ខេបសហស្សានិ បវត្តយិំសុ. តំ ទិស្វា ភគវា អនុមោទនំ អកាសិ. សោ តេន បុញ្ញេន ទេវមនុស្សេសុ សម្បត្តិយោ អនុភវិត្វា ឥមស្មិំ ពុទ្ធុប្បាទេ គហបតិកុលេ និព្ពត្តោ វុទ្ធិមន្វាយ សត្ថរិ បសីទិត្វា ធម្មំ សុត្វា បដិលទ្ធសទ្ធោ បព្ពជិត្វា នចិរស្សេវ អរហា អហោសិ.

៤៨. សោ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ បទុមុត្តរោ នាម ជិនោតិអាទិមាហ. តស្សត្ថោ ហេដ្ឋា វុត្តោវ. សព្ពធម្មាន បារគូតិ សព្ពេសំ នវលោកុត្តរធម្មានំ បារំ និព្ពានំ គតោ បច្ចក្ខំ កតោតិ អត្ថោ. ទន្តោ ទន្តបរិវុតោតិ សយំ កាយវាចាទីហិ ទន្តោ ឯតទគ្គេ ឋបិតេហិ សាវកេហិ បរិវុតោតិ អត្ថោ. សេសំ សព្ពត្ថ សម្ពន្ធវសេន ឧត្តានត្ថមេវាតិ.

តិបទុមិយត្ថេរអបទានវណ្ណនា សមត្តា.

អដ្ឋមវគ្គវណ្ណនា សមត្តា.