១-១០. អារក្ខទាយកត្ថេរអបទានាទិវណ្ណនា

ពាត្តិំសតិមវគ្គេ បឋមទុតិយតតិយាបទានានិ សុវិញ្ញេយ្យានេវ.

១៦. ចតុត្ថាបទានេ ជលជគ្គេហិ ឱកិរិន្តិ ជលជេហិ ឧត្តមេហិ ឧប្បលបទុមាទីហិ បុប្ផេហិ ឱកិរិំ បូជេសិន្តិ អត្ថោ.

បញ្ចមាបទានំ ឧត្តានមេវ.

២៦-២៧. ឆដ្ឋាបទានេ ចេតិយំ ឧត្តមំ នាម, សិខិនោ លោកពន្ធុនោតិ សកលលោកត្តយស្ស ពន្ធុនោ ញាតកស្ស សិខិស្ស ភគវតោ ឧត្តមំ ចេតិយំ. ឥរីណេ ជនសញ្ចរវិរហិតេ វនេ មនុស្សានំ កោលាហលវិរហិតេ មហាអរញ្ញេ អហោសីតិ សម្ពន្ធោ. អន្ធាហិណ្ឌាមហំ តទាតិ តស្មិំ កាលេ វនេ មគ្គមូឡ្ហភាវេន អន្ធោ, ន ចក្ខុនា អន្ធោ, អហំ អាហិណ្ឌាមិ មគ្គំ បរិយេសាមីតិ អត្ថោ. បវនា និក្ខមន្តេនាតិ មហាវនតោ និក្ខមន្តេន មយា សីហាសនំ ឧត្តមាសនំ, សីហស្ស វា ភគវតោ អាសនំ ទិដ្ឋន្តិ អត្ថោ. ឯកំសំ អញ្ជលិំ កត្វាតិ ឯកំសំ ឧត្តរាសង្គំ កត្វា សិរសិ អញ្ជលិំ ឋបេត្វាតិ អត្ថោ. សន្ថវិំ លោកនាយកន្តិ សកលលោកត្តយនយំ តំ និព្ពានំ បាបេន្តំ ថោមិតំ ថុតិំ អកាសិន្តិ អត្ថោ.

៣៤. សត្តមាបទានេ សុទស្សនោ មហាវីរោតិ សុន្ទរទស្សនោ ទ្វត្តិំសមហាបុរិសលក្ខណសម្បន្នសរីរត្តា មនោហរទស្សនោ មហាវីរិយោ សិទ្ធត្ថោ ភគវាតិ សម្ពន្ធោ. វសតិឃរមុត្តមេតិ ឧត្តមេ វិហារេ វសតីតិ អត្ថោ.

អដ្ឋមនវមទសមាបទានានិ ឧត្តានានេវាតិ.

ពាត្តិំសតិមវគ្គវណ្ណនា សមត្តា.