៥. បិលិន្ទវច្ឆត្ថេរអបទានវណ្ណនា

និព្ពុតេ លោកនាថម្ហីតិអាទិកំ អាយស្មតោ បិលិន្ទវច្ឆត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ បទុមុត្តរស្ស ភគវតោ កាលេ ហំសវតីនគរេ មហាភោគកុលេ និព្ពត្តោ ហេដ្ឋា វុត្តនយេន សត្ថុ សន្តិកេ ធម្មំ សុណន្តោ សត្ថារំ ឯកំ ភិក្ខុំ ទេវតានំ បិយមនាបភាវេន អគ្គដ្ឋានេ ឋបេន្តំ ទិស្វា តំ ឋានន្តរំ បត្ថេត្វា យាវជីវំ កុសលំ កត្វា តតោ ចុតោ ទេវមនុស្សេសុ សំសរន្តោ សុមេធស្ស ភគវតោ កាលេ កុលគេហេ និព្ពត្តោ. បរិនិព្ពុតេ ភគវតិ តស្ស ថូបំ បូជេត្វា សង្ឃស្ស មហាទានំ បវត្តេត្វា តតោ ចវិត្វា ទេវមនុស្សេសុ ឧភយសម្បត្តិយោ អនុភវិត្វា អនុប្បន្នេ ពុទ្ធេ ចក្កវត្តី រាជា ហុត្វា មហាជនំ បញ្ចសីលេសុ បតិដ្ឋាបេត្វា សគ្គបរាយនំ អកាសិ. សោ អនុប្បន្នេយេវ អម្ហាកំ ភគវតិ សាវត្ថិយំ ព្រាហ្មណកុលេ និព្ពត្តិ, បិលិន្ទោតិស្ស នាមំ អកំសុ. វច្ឆោតិ គោត្តំ. សោ អបរភាគេ បិលិន្ទវច្ឆោតិ បញ្ញាយិត្ថ. សំសារេ បន សំវេគពហុលតាយ បរិព្ពាជកបព្ពជ្ជំ បព្ពជិត្វា ចូឡគន្ធារំ នាម វិជ្ជំ សាធេត្វា តាយ វិជ្ជាយ អាកាសចារី បរចិត្តវិទូ ច ហុត្វា រាជគហេ លាភគ្គយសគ្គបត្តោ បដិវសតិ.

អថ អម្ហាកំ ភគវា អភិសម្ពុទ្ធោ ហុត្វា អនុក្កមេន រាជគហំ ឧបគតោ. តតោ បដ្ឋាយ ពុទ្ធានុភាវេន តស្ស សា វិជ្ជា ន សម្បជ្ជតិ, អត្តនោ កិច្ចំ ន សាធេតិ. សោ ចិន្តេសិ – ‘‘សុតំ ខោ បនេតំ អាចរិយបាចរិយានំ ភាសមានានំ ‘យត្ថ មហាគន្ធារវិជ្ជា ធរតិ, តត្ថ ចូឡគន្ធារវិជ្ជា ន សម្បជ្ជតី’តិ សមណស្ស បន គោតមស្ស អាគតកាលតោ បដ្ឋាយ នាយំ មម វិជ្ជា សម្បជ្ជតិ, និស្សំសយំ សមណោ គោតមោ មហាគន្ធារវិជ្ជំ ជានាតិ, យំនូនាហំ តំ បយិរុបាសិត្វា តស្ស សន្តិកេ តំ វិជ្ជំ បរិយាបុណេយ្យ’’ន្តិ. សោ ភគវន្តំ ឧបសង្កមិត្វា ឯតទវោច – ‘‘អហំ, មហាសមណ, តវ សន្តិកេ ឯកំ វិជ្ជំ បរិយាបុណិតុកាមោ, ឱកាសំ មេ ករោហី’’តិ. ‘‘តេន ហិ មម សន្តិកេ បព្ពជាហី’’តិ អាហ. សោ ‘‘វិជ្ជាយ បរិកម្មំ បព្ពជ្ជា’’តិ មញ្ញមានោ បព្ពជិ. តស្ស ភគវា ធម្មំ កថេត្វា ចរិតានុកូលំ កម្មដ្ឋានំ អទាសិ. សោ ឧបនិស្សយសម្បន្នតាយ នចិរស្សេវ វិបស្សនំ បដ្ឋបេត្វា អរហត្តំ បាបុណិ.

៥៥. យា បន បុរិមជាតិយំ តស្សោវាទេ ឋត្វា សគ្គេ និព្ពត្តា ទេវតា, តា កតញ្ញុតំ និស្សាយ តស្មិំ សញ្ជាតពហុមានា សាយំ បាតំ ថេរំ បយិរុបាសិត្វា គច្ឆន្តិ. តស្មា នំ ភគវា ទេវតានំ អតិវិយ បិយមនាបភាវេន អគ្គភាវេ ឋបេសិ ‘‘ឯតទគ្គំ, ភិក្ខវេ, មម សាវកានំ ភិក្ខូនំ ទេវតានំ បិយមនាបានំ យទិទំ បិលិន្ទវច្ឆោ’’តិ (អ. និ. ១.២០៩, ២១៥). ឯវំ សោ បត្តអគ្គដ្ឋានោ អត្តនោ បុព្ពកម្មំ អនុស្សរិត្វា បីតិសោមនស្សវសេន បុព្ពចរិតាបទានំ បកាសេន្តោ និព្ពុតេ លោកនាថម្ហីតិអាទិមាហ.

តត្ថ កាមរូបារូបលោកស្ស នាថោ បធានោតិ លោកនាថោ. មេធា វុច្ចន្តិ សព្ពញ្ញុតញ្ញាណអនាវរណញាណាទយោ, សុន្ទរា, បសដ្ឋា វា មេធា យស្ស សោ សុមេធោ, អគ្គោ ច សោ បុគ្គលោ ចាតិ អគ្គបុគ្គលោ, តស្មិំ សុមេធេ លោកនាយកេ អគ្គបុគ្គលេ ខន្ធបរិនិព្ពានេន និព្ពុតេ សតីតិ សម្ពន្ធោ. បសន្នចិត្តោ សុមនោតិ សទ្ធាយ បសាទិតចិត្តោ សោមនស្សេន សុន្ទរមនោ អហំ តស្ស សុមេធស្ស ភគវតោ ថូបបូជំ ចេតិយបូជំ អកាសិន្តិ អត្ថោ.

៥៦. យេ ច ខីណាសវា តត្ថាតិ តស្មិំ សមាគមេ យេ ច ខីណាសវា បហីនកិលេសា ឆឡភិញ្ញា ឆហិ អភិញ្ញាហិ សមន្នាគតា មហិទ្ធិកា មហន្តេហិ ឥទ្ធីហិ សមន្នាគតា សន្តិ, តេ សព្ពេ ខីណាសវេ អហំ តត្ថ សមានេត្វា សុដ្ឋុ អាទរេន អានេត្វា សង្ឃភត្តំ សកលសង្ឃស្ស ទាតព្ពភត្តំ អកាសិំ តេសំ ភោជេសិន្តិ អត្ថោ.

៥៧. ឧបដ្ឋាកោ តទា អហូតិ តទា មម សង្ឃភត្តទានកាលេ សុមេធស្ស ភគវតោ នាមេន សុមេធោ នាម ឧបដ្ឋាកសាវកោ អហុ អហោសីតិ អត្ថោ. សោ សាវកោ មយ្ហំ បូជាសក្ការំ អនុមោទិត្ថ អនុមោទិតោ អានិសំសំ កថេសីតិ អត្ថោ.

៥៨. តេន ចិត្តប្បសាទេនាតិ តេន ថូបបូជាករណវសេន ឧប្បន្នេន ចិត្តប្បសាទេន ទេវលោកេ ទិព្ពវិមានំ ឧបបជ្ជិំ ឧបគតោ អស្មីតិ អត្ថោ, តត្ថ និព្ពត្តោម្ហីតិ វុត្តំ ហោតិ. ឆឡាសីតិសហស្សានីតិ តស្មិំ វិមានេ ឆ អសីតិសហស្សានិ ទេវច្ឆរាយោ មេ មយ្ហំ ចិត្តំ រមិំសុ រមាបេសុន្តិ សម្ពន្ធោ.

៥៩. មមេវ អនុវត្តន្តីតិ តា អច្ឆរាយោ សព្ពកាមេហិ ទិព្ពេហិ រូបាទិវត្ថុកាមេហិ ឧបដ្ឋហន្តិយោ មមំ ឯវ អនុវត្តន្តិ មម វចនំ អនុករោន្តិ សទា និច្ចកាលន្តិ អត្ថោ. សេសំ សុវិញ្ញេយ្យមេវាតិ.

បិលិន្ទវច្ឆត្ថេរអបទានវណ្ណនា សមត្តា.