១. ពន្ធុជីវកត្ថេរអបទានវណ្ណនា

ចន្ទំវ វិមលំ សុទ្ធន្តិអាទិកំ អាយស្មតោ ពន្ធុជីវកត្ថេរស្ស អបទានំ. អយម្បាយស្មា បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ សិខិស្ស ភគវតោ កាលេ កុលគេហេ និព្ពត្តោ វិញ្ញុតំ បត្តោ ឃរាវាសំ សណ្ឋបេត្វា វសន្តោ សិខិស្ស ភគវតោ រូបកាយសម្បត្តិំ ទិស្វា បសន្នមានសោ ពន្ធុជីវកបុប្ផានិ គហេត្វា ភគវតោ បាទមូលេ បូជេសិ. ភគវា តស្ស ចិត្តប្បសាទវឌ្ឍនត្ថាយ អនុមោទនមកាសិ. សោ យាវតាយុតំ ឋត្វា តេនេវ បុញ្ញេន ទេវលោកេ និព្ពត្តោ ឆ កាមាវចរសម្បត្តិយោ អនុភវិត្វា មនុស្សេសុ ច ចក្កវត្តិអាទិសម្បត្តិយោ អនុភវិត្វា ឥមស្ស អម្ហាកំ សម្មាសម្ពុទ្ធស្ស ឧប្បន្នកាលេ គហបតិកុលេ និព្ពត្តោ រូបគ្គយសគ្គប្បត្តោ សត្ថុ ធម្មទេសនំ សុត្វា សទ្ធាជាតោ គេហំ បហាយ បព្ពជិតោ អរហត្តំ បាបុណិ.

១. សោ បុព្ពេនិវាសញាណេន បុព្ពេ កតកុសលកម្មំ អនុស្សរិត្វា សោមនស្សជាតោ បុព្ពចរិតាបទានំ បកាសេន្តោ ចន្ទំវ វិមលំ សុទ្ធន្តិអាទិមាហ. តត្ថ ចន្ទំវ វិមលំ សុទ្ធន្តិ អព្ភា, មហិកា, ធុមោ, រជោ, រាហូតិ ឥមេហិ ឧបក្កិលេសមលេហិ វិមុត្តំ ចន្ទំ ឥវ ទិយឌ្ឍសហស្សុបក្កិលេសមលានំ បហីនត្តា វិមលំ និក្កិលេសត្តា សុទ្ធំ បសន្នំ សិខិំ សម្ពុទ្ធន្តិ សម្ពន្ធោ. កិលេសកទ្ទមានំ អភាវេន អនាវិលំ. នន្ទីភវសង្ខាតាយ ពលវស្នេហាយ បរិសមន្តតោ ខីណត្តា នន្ទីភវបរិក្ខីណំ. តិណ្ណំ លោកេតិ លោកត្តយតោ តិណ្ណំ ឧត្តិណ្ណំ អតិក្កន្តំ. វិសត្តិកន្តិ វិសត្តិកំ វុច្ចតិ តណ្ហា, និត្តណ្ហន្តិ អត្ថោ.

២. និព្ពាបយន្តំ ជនតន្តិ ធម្មវស្សំ វស្សន្តោ ជនតំ ជនសមូហំ កិលេសបរិឡាហាភាវេន និព្ពាបយន្តំ វូបសមេន្តំ. សយំ សំសារតោ តិណ្ណំ, សព្ពសត្តេ សំសារតោ តារយន្តំ អតិក្កមេន្តំ ចតុន្នំ សច្ចានំ មុននតោ ជាននតោ មុនិំ សិខិំ សម្ពុទ្ធន្តិ សម្ពន្ធោ. វនស្មិំ ឈាយមានន្តិ អារម្មណូបនិជ្ឈានលក្ខណូបនិជ្ឈានេហិ ឈាយន្តំ ចិន្តេន្តំ ចិត្តេន ភាវេន្តំ វនមជ្ឈេតិ អត្ថោ. ឯកគ្គំ ឯកគ្គចិត្តំ សុសមាហិតំ សុដ្ឋុ អារម្មណេ អាហិតំ ឋបិតចិត្តំ សិខិំ មុនិំ ទិស្វាតិ សម្ពន្ធោ.

៣. ពន្ធុជីវកបុប្ផានីតិ ពន្ធូនំ ញាតីនំ ជីវកំ ជីវិតនិស្សយំ ហទយមំសលោហិតំ ពន្ធុជីវកំ ហទយមំសលោហិតសមានវណ្ណំ បុប្ផំ ពន្ធុជីវកបុប្ផំ គហេត្វា សិខិនោ លោកពន្ធុនោ បូជេសិន្តិ អត្ថោ. សេសំ ឧត្តានត្ថមេវាតិ.

ពន្ធុជីវកត្ថេរអបទានវណ្ណនា សមត្តា.