៦. ចម្បកបុប្ផិយត្ថេរអបទានវណ្ណនា

កណិការំវ ជោតន្តន្តិអាទិកំ អាយស្មតោ ចម្បកបុប្ផិយត្ថេរស្ស អបទានំ. អយម្បិ បុរិមពុទ្ធេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ វេស្សភុស្ស ភគវតោ កាលេ ព្រាហ្មណកុលេ និព្ពត្តោ វុទ្ធិប្បត្តោ សកសិប្បេសុ និប្ផត្តិំ បត្វា តត្ថ សារំ អបស្សន្តោ ឃរាវាសំ បហាយ តាបសបព្ពជ្ជំ បព្ពជិត្វា វនន្តរេ វសន្តោ វេស្សភុំ ភគវន្តំ ឧទ្ទិស្ស សិស្សេហិ អានីតេហិ ចម្បកបុប្ផេហិ បូជេសិ. ភគវា អនុមោទនំ អកាសិ. សោ តេនេវ កុសលេន ទេវមនុស្សេសុ សំសរន្តោ ឧភយសម្បត្តិយោ អនុភវិត្វា ឥមស្មិំ ពុទ្ធុប្បាទេ កុលគេហេ និព្ពត្តោ វិញ្ញុតំ បាបុណិត្វា បុព្ពវាសនាពលេន ឃរាវាសេ អនល្លីនោ បព្ពជិត្វា នចិរស្សេវ អរហា អហោសិ.

៤១. សោ អបរភាគេ អត្តនោ បុព្ពបុញ្ញកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ កណិការំវ ជោតន្តន្តិអាទិមាហ. តត្ថ កណិការន្តិ សកលបត្តបលាសានិ បរិភជ្ជ បាតេត្វា បុប្ផគហណសមយេ កណ្ណិកាពទ្ធោ ហុត្វា បុប្ផមកុឡានំ គហណតោ កណ្ណិកាការេន បកតោតិ កណិការោ, ‘‘កណ្ណិការោ’’តិ វត្តព្ពេ និរុត្តិនយេន ឯកស្ស បុព្ព ណ-ការស្ស លោបំ កត្វា ‘‘កណិការ’’ន្តិ វុត្តន្តិ ទដ្ឋព្ពំ. តំ បុប្ផិតំ កណិការរុក្ខំ ឥវ ជោតន្តំ ពុទ្ធំ អទ្ទសន្តិ អត្ថោ. សេសំ ឧត្តានត្ថមេវាតិ.

ចម្បកបុប្ផិយត្ថេរអបទានវណ្ណនា សមត្តា.