ទេវតារោចនវណ្ណនា

៩១. ឯត្តាវតា ច ឥមិនា វិបស្សិស្ស ភគវតោ អបទានានុសារេន វិត្ថារកថនេន – ‘‘តថាគតស្សេវេសា, ភិក្ខវេ, ធម្មធាតុ សុប្បដិវិទ្ធា’’តិ ឯវំ វុត្តាយ ធម្មធាតុយា សុប្បដិវិទ្ធភាវំ បកាសេត្វា ឥទានិ – ‘‘ទេវតាបិ តថាគតស្ស ឯតមត្ថំ អារោចេសុ’’ន្តិ វុត្តំ ទេវតារោចនំ បកាសេតុំ ឯកមិទាហន្តិអាទិមាហ.

តត្ថ សុភគវនេតិ ឯវំនាមកេ វនេ. សាលរាជមូលេតិ វនប្បតិជេដ្ឋកស្ស មូលេ. កាមច្ឆន្ទំ វិរាជេត្វាតិ អនាគាមិមគ្គេន មូលសមុគ្ឃាតវសេន វិរាជេត្វា. យថា ច វិបស្សិស្ស, ឯវំ សេសពុទ្ធានម្បិ សាសនេ វុត្ថព្រហ្មចរិយា ទេវតា អារោចយិំសុ, បាឡិ បន វិបស្សិស្ស ចេវ អម្ហាកញ្ច ភគវតោ វសេន អាគតា.

តត្ថ អត្តនោ សម្បត្តិយា ន ហាយន្តិ, ន វិហាយន្តីតិ អវិហា. ន កញ្ចិ សត្តំ តបន្តីតិ អតប្បា. សុន្ទរទស្សនា អភិរូបា បាសាទិកាតិ សុទស្សា. សុដ្ឋុ បស្សន្តិ, សុន្ទរមេតេសំ វា ទស្សនន្តិ សុទស្សី. សព្ពេហេវ ច សគុណេហិ ភវសម្បត្តិយា ច ជេដ្ឋា, នត្ថេត្ថ កនិដ្ឋាតិ អកនិដ្ឋា.

ឥធ ឋត្វា ភាណវារា សមោធានេតព្ពា. ឥមស្មិញ្ហិ សុត្តេ វិបស្សិស្ស ភគវតោ អបទានវសេន តយោ ភាណវារា វុត្តា. យថា ច វិបស្សិស្ស, ឯវំ សិខីអាទីនម្បិ អបទានវសេន វុត្តាវ. បាឡិ បន សង្ខិត្តា. ឥតិ សត្តន្នំ ពុទ្ធានំ វសេន អម្ហាកំ ភគវតា ឯកវីសតិ ភាណវារា កថិតា. តថា អវិហេហិ. តថា អតប្បេហិ. តថា សុទស្សេហិ. តថា សុទស្សីហិ. តថា អកនិដ្ឋេហីតិ សព្ពម្បិ ឆព្ពីសតិភាណវារសតំ ហោតិ. តេបិដកេ ពុទ្ធវចនេ អញ្ញំ សុត្តំ ឆព្ពីសតិភាណវារសតបរិមាណំ នាម នត្ថិ, សុត្តន្តរាជា នាម អយំ សុត្តន្តោតិ វេទិតព្ពោ. ឥតោ បរំ អនុសន្ធិទ្វយម្បិ និយ្យាតេន្តោ ឥតិ ខោ ភិក្ខវេតិអាទិមាហ. តំ សព្ពំ ឧត្តានមេវាតិ.

ឥតិ សុមង្គលវិលាសិនិយា ទីឃនិកាយដ្ឋកថាយំ

មហាបទានសុត្តវណ្ណនា និដ្ឋិតា.