អធិច្ចសមុប្បន្នវាទវណ្ណនា

៦៧. ‘‘អធិច្ចសមុប្បន្នោ អត្តា ច លោកោ ចា’’តិ ទស្សនំ អធិច្ចសមុប្បន្នំ. តំ ឯតេសំ អត្ថីតិ អធិច្ចសមុប្បន្និកា. អធិច្ចសមុប្បន្នន្តិ អការណសមុប្បន្នំ.

៦៨-៧៣. អសញ្ញសត្តាតិ ទេសនាសីសមេតំ, អចិត្តុប្បាទា រូបមត្តកអត្តភាវាតិ អត្ថោ. តេសំ ឯវំ ឧប្បត្តិ វេទិតព្ពា – ឯកច្ចោ ហិ តិត្ថាយតនេ បព្ពជិត្វា វាយោកសិណេ បរិកម្មំ កត្វា ចតុត្ថជ្ឈានំ និព្ពត្តេត្វា ឈានា វុដ្ឋាយ – ‘‘ចិត្តេ ទោសំ បស្សតិ, ចិត្តេ សតិ ហត្ថច្ឆេទាទិទុក្ខញ្ចេវ សព្ពភយានិ ច ហោន្តិ, អលំ ឥមិនា ចិត្តេន, អចិត្តកភាវោវ សន្តោ’’តិ, ឯវំ ចិត្តេ ទោសំ បស្សិត្វា អបរិហីនជ្ឈានោ កាលំ កត្វា អសញ្ញសត្តេសុ និព្ពត្តតិ, ចិត្តមស្ស ចុតិចិត្តនិរោធេន ឥធេវ និវត្តតិ, រូបក្ខន្ធមត្តមេវ តត្ថ បាតុភវតិ. តេ តត្ថ យថា នាម ជិយាវេគក្ខិត្តោ សរោ យត្តកោ ជិយាវេគោ, តត្តកមេវ អាកាសេ គច្ឆតិ. ឯវមេវ ឈានវេគក្ខិត្តា ឧបបជ្ជិត្វា យត្តកោ ឈានវេគោ, តត្តកមេវ កាលំ តិដ្ឋន្តិ, ឈានវេគេ បន បរិហីនេ តត្ថ រូបក្ខន្ធោ អន្តរធាយតិ, ឥធ បន បដិសន្ធិសញ្ញា ឧប្បជ្ជតិ. យស្មា បន តាយ ឥធ ឧប្បន្នសញ្ញាយ តេសំ តត្ថ ចុតិ បញ្ញាយតិ, តស្មា ‘‘សញ្ញុប្បាទា ច បន តេ ទេវា តម្ហា កាយា ចវន្តី’’តិ វុត្តំ. សន្តតាយាតិ សន្តភាវាយ. សេសមេត្ថ ឧត្តានមេវ. តក្កីវាទោបិ វុត្តនយេនេវ វេទិតព្ពោតិ.