សញ្ញីវាទវណ្ណនា

៧៥. ឧទ្ធមាឃាតនិកាតិ អាឃាតនំ វុច្ចតិ មរណំ, ឧទ្ធមាឃាតនា អត្តានំ វទន្តីតិ ឧទ្ធមាឃាតនិកា. សញ្ញីតិ បវត្តោ វាទោ, សញ្ញីវាទោ, សោ ឯតេសំ អត្ថីតិ សញ្ញីវាទា.

៧៦-៧៧. រូបី អត្តាតិអាទីសុ កសិណរូបំ ‘‘អត្តា’’តិ តត្ថ បវត្តសញ្ញញ្ចស្ស ‘‘សញ្ញា’’តិ គហេត្វា វា អាជីវកាទយោ វិយ តក្កមត្តេនេវ វា ‘‘រូបី អត្តា ហោតិ, អរោគោ បរំ មរណា សញ្ញី’’តិ នំ បញ្ញបេន្តិ. តត្ថ អរោគោតិ និច្ចោ. អរូបសមាបត្តិនិមិត្តំ បន ‘‘អត្តា’’តិ សមាបត្តិសញ្ញញ្ចស្ស ‘‘សញ្ញា’’តិ គហេត្វា វា និគណ្ឋាទយោ វិយ តក្កមត្តេនេវ វា ‘‘អរូបី អត្តា ហោតិ, អរោគោ បរំ មរណា សញ្ញី’’តិ នំ បញ្ញបេន្តិ. តតិយា បន មិស្សកគាហវសេន បវត្តា ទិដ្ឋិ. ចតុត្ថា តក្កគាហេនេវ. ទុតិយចតុក្កំ អន្តានន្តិកវាទេ វុត្តនយេនេវ វេទិតព្ពំ. តតិយចតុក្កេ សមាបន្នកវសេន ឯកត្តសញ្ញី, អសមាបន្នកវសេន នានត្តសញ្ញី, បរិត្តកសិណវសេន បរិត្តសញ្ញី, វិបុលកសិណវសេន អប្បមាណសញ្ញីតិ វេទិតព្ពា. ចតុត្ថចតុក្កេ បន ទិព្ពេន ចក្ខុនា តិកចតុក្កជ្ឈានភូមិយំ និព្ពត្តមានំ ទិស្វា ‘‘ឯកន្តសុខី’’តិ គណ្ហាតិ. និរយេ និព្ពត្តមានំ ទិស្វា ‘‘ឯកន្តទុក្ខី’’តិ. មនុស្សេសុ និព្ពត្តមានំ ទិស្វា ‘‘សុខទុក្ខី’’តិ. វេហប្ផលទេវេសុ និព្ពត្តមានំ ទិស្វា ‘‘អទុក្ខមសុខី’’តិ គណ្ហាតិ. វិសេសតោ ហិ បុព្ពេនិវាសានុស្សតិញាណលាភិនោ បុព្ពន្តកប្បិកា ហោន្តិ, ទិព្ពចក្ខុកា អបរន្តកប្បិកាតិ.