២. អភិធម្មភាជនីយវណ្ណនា

៤៤៤. អភិធម្មភាជនីយំ ឧត្តានត្ថមេវ. នយា បនេត្ថ គណេតព្ពា. ‘‘ឆន្ទសមាធិបធានសង្ខារសមន្នាគតំ ឥទ្ធិបាទំ ភាវេតី’’តិ វុត្តដ្ឋានស្មិញ្ហិ លោកុត្តរានិ ចត្តារិ នយសហស្សានិ វិភត្តានិ. វីរិយសមាធិអាទីសុបិ ឯសេវ នយោ. តថា ឧត្តរចូឡភាជនីយេ ឆន្ទិទ្ធិបាទេ ចត្តារិ នយសហស្សានិ វិភត្តានិ, វីរិយចិត្តវីមំសិទ្ធិបាទេ ចត្តារិ ចត្តារីតិ សព្ពានិបិ អដ្ឋន្នំ ចតុក្កានំ វសេន ទ្វត្តិំស នយសហស្សានិ វិភត្តានិ. ឯវមេតំ និព្ពត្តិតលោកុត្តរានំយេវ ឥទ្ធិបាទានំ វសេន ទ្វត្តិំសនយសហស្សប្បដិមណ្ឌិតំ អភិធម្មភាជនីយំ កថិតន្តិ វេទិតព្ពំ.