៥. ពលសុត្តវណ្ណនា

៥. បញ្ចមេ អវិជ្ជាកោសជ្ជសាវជ្ជអស្សទ្ធិយេសុ អកម្បនតោ បញ្ញាពលាទីនិ ទដ្ឋព្ពានិ. អកុសលសង្ខាតាតិ អកុសលាតិ ញាតា. ឯស នយោ សព្ពត្ថ. នាលមរិយាតិ អរិយភាវំ កាតុំ អសមត្ថា, អរិយានំ វា អននុច្ឆវិកា. វោទិដ្ឋាតិ សុដ្ឋុ ទិដ្ឋា. វោចរិតាតិ មនោទ្វារេ សមុទាចារប្បត្តា. អត្ថិកស្សាតិ ធម្មទេសនាយ អត្ថិកស្ស. អាជីវិកាភយន្តិ ជីវិតវុត្តិភយំ. អសិលោកភយន្តិ គរហាភយំ. បរិសាសារជ្ជភយន្តិ បរិសំ បត្វា សារជ្ជំ ឱក្កមនភយំ. ឥមស្មិំ សុត្តេ វដ្ដវិវដ្ដំ កថិតំ.