២. កាយសក្ខិសុត្តវណ្ណនា

៤៣. ទុតិយេ យថា យថា ច តទាយតនន្តិ យេន យេន ការណេន យេន យេនាការេន តំ បឋមជ្ឈានសង្ខាតំ អាយតនំ ហោតិ. តថា តថា នំ កាយេន ផុសិត្វា វិហរតីតិ តេន តេន ការណេន តេន តេនាការេន តំ សមាបត្តិំ សហជាតនាមកាយេន ផុសិត្វា វិហរតិ, សមាបជ្ជតីតិ អត្ថោ. កាយសក្ខិ វុត្តោ ភគវតា បរិយាយេនាតិ យស្មា តេន នាមាកាយេន បឋមជ្ឈានំ សច្ឆិកតំ, តស្មា ឥមិនា បរិយាយេន កាយសក្ខិ វុត្តោ. និប្បរិយាយេនាតិ យត្តកំ កាយេន សច្ឆិកាតព្ពំ, សព្ពស្ស កតត្តា អយំ និប្បរិយាយេន កាយសក្ខិ នាម.