៥. បឋមមិត្តសុត្តវណ្ណនា

៣៦. ចតុត្ថស្ស បញ្ចមេ ទុទ្ទទន្តិ ទុប្បរិច្ចជំ មហារហំ ភណ្ឌកំ. ទុក្ករំ ករោតីតិ កាតុំ អសុករំ កម្មំ ករោតិ. ទុក្ខមំ ខមតីតិ សហាយស្ស អត្ថាយ ទុរធិវាសំ អធិវាសេតិ. គុយ្ហមស្ស អាវិករោតីតិ អត្តនោ គុយ្ហំ តស្ស អាវិករោតិ. គុយ្ហមស្ស បរិគុហតីតិ តស្ស គុយ្ហំ អញ្ញេសំ នាចិក្ខតិ. ខីណេន នាតិមញ្ញតីតិ តស្ស ភោគេ ខីណេ តេន ខយេន តំ នាតិមញ្ញតិ, តស្មិំ ឱមានំ អត្តនិ ច អតិមានំ ន ករោតិ.