៧. ឧគ្គសុត្តវណ្ណនា

៧. សត្តមេ ឧគ្គោ រាជមហាមត្តោតិ បសេនទិកោសលស្ស មហាអមច្ចោ. ឧបសង្កមីតិ ភុត្តបាតរាសោ ឧបសង្កមិ. អឌ្ឍោតិ និធានគតេន ធនេន អឌ្ឍោ. មិគារោ រោហណេយ្យោតិ រោហណសេដ្ឋិនោ នត្តារំ មិគារសេដ្ឋិំ សន្ធាយេវមាហ. មហទ្ធនោតិ វឡញ្ជនធនេន មហទ្ធនោ. មហាភោគោតិ ឧបភោគបរិភោគភណ្ឌស្ស មហន្តតាយ មហាភោគោ. ហិរញ្ញស្សាតិ សុវណ្ណស្សេវ. សុវណ្ណាមេវ ហិស្ស កោដិសង្ខ្យំ អហោសិ. រូបិយស្សាតិ សេសស្ស តដ្ដកសរកអត្ថរណបាវុរណាទិនោ បរិភោគបរិក្ខារស្ស បមាណសង្ខានេ វាទោយេវ នត្ថិ.