៨. អត្តការីសុត្តវណ្ណនា

៣៨. អដ្ឋមេ អទ្ទសំ វា អស្សោសិំ វាតិ អក្ខីនិ ឧម្មីលេត្វា មា អទ្ទសំ, អសុកស្មិំ នាម ឋានេ វសតីតិ មា អស្សោសិំ, កថេន្តស្ស វា វចនំ មា អស្សោសិំ. កថញ្ហិ នាមាតិ កេន នាម ការណេន. អារម្ភធាតូតិ អារភនវសេន បវត្តវីរិយំ. និក្កមធាតូតិ កោសជ្ជតោ និក្ខមនសភាវំ វីរិយំ. បរក្កមធាតូតិ បរក្កមសភាវោ. ថាមធាតូតិ ថាមសភាវោ. ឋិតិធាតូតិ ឋិតិសភាវោ. ឧបក្កមធាតូតិ ឧបក្កមសភាវោ. សព្ពំ ចេតំ តេន តេនាការេន បវត្តស្ស វីរិយស្សេវ នាមំ.