៧. វបកាសសុត្តវណ្ណនា

១២៧. សត្តមេ នាលំ សង្ឃម្ហា វបកាសិតុន្តិ សង្ឃតោ និក្ខមិត្វា ឯកកោ វសិតុំ ន យុត្តោ. កាមញ្ចេស សង្ឃមជ្ឈេបិ វសិតុំ អយុត្តោវ អសង្ឃសោភនតាយ, ឱវាទានុសាសនិប្បដិពទ្ធត្តា បន និប្បរិយាយេនេវ សង្ឃម្ហា វបកាសិតុំ ន យុត្តោ. អលំ សង្ឃម្ហា វបកាសិតុន្តិ ចាតុទ្ទិសត្តា សង្ឃម្ហា និក្ខម្ម ឯកកោ វសិតុំ យុត្តោ, សង្ឃសោភនតាយ បន សង្ឃេបិ វសិតុំ យុត្តោយេវ. អដ្ឋមំ ឧត្តានត្ថមេវ.