៥. ផាសុវិហារសុត្តវណ្ណនា

១០៥. បញ្ចមេ មេត្តំ កាយកម្មន្តិ មេត្តចិត្តេន បវត្តិតំ កាយកម្មំ. អាវិ ចេវ រហោ ចាតិ សម្មុខេ ចេវ បរម្មុខេ ច. ឥតរេសុបិ ឯសេវ នយោ. យានិ តានិ សីលានីតិអាទិ ចតុបារិសុទ្ធិសីលវសេន វុត្តំ. សមាធិសំវត្តនិកានីតិ មគ្គសមាធិផលសមាធិនិព្ពត្តកានិ. សីលសាមញ្ញគតោតិ សមានសីលតំ គតោ, ឯកសទិសសីលោ ហុត្វាតិ អត្ថោ. តក្ករស្សាតិ យោ នំ ករោតិ, តស្ស. ឥតិ ឥមស្មិំ សុត្តេ សីលំ មិស្សកំ កថិតំ, ទិដ្ឋិ វិបស្សនាសម្មាទិដ្ឋីតិ.