៦. បដិសម្ភិទាប្បត្តសុត្តវណ្ណនា

៨៦. ឆដ្ឋេ អត្ថបដិសម្ភិទាប្បត្តោតិ បញ្ចសុ អត្ថេសុ បភេទគតំ ញាណំ បត្តោ. ធម្មបដិសម្ភិទាប្បត្តោតិ ចតុព្ពិធេ ធម្មេ បភេទគតំ ញាណំ បត្តោ. និរុត្តិបដិសម្ភិទាប្បត្តោតិ ធម្មនិរុត្តីសុ បភេទគតំ ញាណំ បត្តោ. បដិភានបដិសម្ភិទាប្បត្តោតិ តេសុ តីសុ ញាណេសុ បភេទគតំ ញាណំ បត្តោ. សោ បន តានិ តីណិ ញាណានេវ ជានាតិ, ន តេសំ កិច្ចំ ករោតិ. ឧច្ចាវចានីតិ មហន្តខុទ្ទកានិ. កិំករណីយានីតិ ឥតិ កត្តព្ពានិ.